Moyizi lɩzaa se ɛsɛɣ Yehowa

Yakɔɔb hɔʋ taa ñɩma mba paawɛ Ejipiti yɔ payaɣaɣ se Izrayɛɛlɩ mba. Yakɔɔb nɛ Yosɛɛfʋ pa-sɩm wayɩ lɛ, Farawɔɔ kɩfalʋ nɔɔyʋ paɣzɩ kewiyitu tɔɔʋ. Sɔɔndʋ kpaɣaɣ Farawɔɔ ɛnʋ se Izrayɛɛlɩ mba ɩtaakɔɔ nɛ pɛwɛɛ ɖoŋ nɛ pakpaɖɩ Ejipiti mba. Pʋyɔɔ eyeba nɛ Izrayɛɛlɩ mba pɩsɩ yomaa. Ɛñɩkaɣ pɔ-yɔɔ se palɩzɩ filikinaa nɛ pala ɖɔɖɔ tʋma wena awɛ ɖoŋ yɔ hayɩm taa. Ɛlɛ Izrayɛɛlɩ mba kaawɛɛ nɛ pɔɖɔʋ pɩdɩɩfɛyɩ, paa Ejipiti mba ɛnazaɣ-wɛ yɔ. Ɛzɩma Izrayɛɛlɩ mba kaawɛɛ nɛ pɔɖɔʋ yɔ, pɩtaakɛdɩɣnɩ Farawɔɔ. Pʋyɔɔ ɛɖʋ paɣtʋ se ye Izrayɛɛlɩ tʋ nɔɔyʋ ɛlʋlɩ abalɩbɩɣa yɔ, pakʋ-kɛ. Maɣzɩ nɛ ŋna sɔɔndʋ ndʋ tɩ-taa Izrayɛɛlɩ mba kaawɛɛ yɔ!

Payaɣaɣ Izrayɛɛlɩ halʋ nɔɔyʋ se Yokebɛɛdɩ, ɛlʋlɩ abalɩbɩɣa nakɛyɛ nɛ keɖewa pɩdɩɩfɛyɩ. Ɛtaasɔɔlɩ se pakʋ-kɛ, pʋyɔɔ ɛɖʋ-kɛ ɖɔkʋ nakʋyʋ taa nɛ ewona nɛ ɛmɛsɩ ñɩtʋ tɛɛ Niili Pɔɔ nɔɔ. Pɩɣa ŋga, payaɣ kɔ-kɔɔ se Miriyam, nɛ ɛlɛ ñaasɩŋ Niili Pɔɔ nɔɔ peeɖe se ɛna se ɛbɛ kaɣ labʋ.

Farawɔɔ pɛlɛ tibi lɩm sɔʋ Niili Pɔɔ taa lɛ, ɛlɩɩ ɖɔkʋ ŋgʋ kɩ-yɔɔ. Ɛcɔnɩ kɩ-taa lɛ, ɛna pɩɣa nakɛyɛ keɖiɣni wiu, nɛ pɩlabɩ-ɩ pʋtɔdɩyɛ. Miriyam pɔzɩ Farawɔɔ pɛlɛ se: “Manpɩzɩɣ mowolo nɛ mañɩnɩ halʋ nɔɔyʋ nɛ ɛcalɩ-ŋ pɩɣa kanɛ yɔ?” Farawɔɔ pɛlɛ cosaa se ɛɛɛ lɛ, Miriyam wolo nɛ ɛyaa ɛ-maɣmaɣ e-ɖoo Yokebɛɛdɩ. Farawɔɔ pɛlɛ heyi Yokebɛɛdɩ se: “Mʋ pɩɣa kanɛ yɔ, calɩ-m kɛ camɩyɛ, mankaɣ-ŋ hɛyʋʋ.”

Pɩɣa kɔm nɛ kapaɣlɩ lɛ, Yokebɛɛdɩ woni-kɛ nɛ ɛcɛlɩ Farawɔɔ pɛlɛ, nɛ ɛlɛ yaa-kɛ se Moyizi nɛ ɛcalɩ-kɛ ɛzɩ ɛ-maɣmaɣ ɛ-pɩɣa yɔ. Pʋyɔɔ Moyizi kaawɛ ɛzɩ awumbu yɔ Farawɔɔ ɖɩɣa taa, nɛ ɛpɩzaɣ se ɛwɛɛnɩ mbʋ payɩ ɛɛsɔɔlaa yɔ. Ɛlɛ Moyizi tɩsɔɔ Yehowa yɔɔ kpa. Ɛlɩzaa se ɛsɛɣ Yehowa.

Moyizi kɔm nɛ ɛwɛɛnɩ pɩnzɩ 40 lɛ, ɛɖʋ ɛ-taa se ɛsɩɣnɩ ɛ-samaɣ. Kɩyakʋ nakʋyʋ ɛna Ejipiti tʋ nɔɔyʋ wɛɛ nɛ ɛmakɩ Izrayɛɛlɩ tʋ nɔɔyʋ lɛ, ewolo ɛma Ejipiti tʋ nɛ ɛlɛ sɩ. Moyizi mɛsɩ Ejipiti tʋ ɛnʋ kañɩŋa taa. Farawɔɔ kɔm nɛ ɛnɩɩ tɔm ndʋ lɛ, ɛpaɣzɩ ñɩnʋʋ se ɛkʋ Moyizi. Peeɖe Moyizi sewa nɛ ɛɖɛɛ Madiyaŋ ɛjaɖɛ taa. Yehowa cɔnɩ ɛ-yɔɔ peeɖe.