Cɔkɔyɛ mʋʋ miŋ

Moyizi caɣ Madiyaŋ pɩnzɩ 40. Ɛkpaɣ halʋ nɛ ɛlʋlɩ piya. Kɩyakʋ nakʋyʋ ɛwɛɛ nɛ eɖiyiɣ heŋ Sinayii Pʋʋ cɔlɔ lɛ, ɛna nabʋyʋ nɛ pɩlabɩ-ɩ piti kpem. Cɔkɔyɛ naɖɩyɛ wɛɛ nɛ ɖɩmʋʋ miŋ, ɛlɛ ɖɩɩñakɩ. Moyizi ñɔtaa se ɛna se ɛbɛ yɔɔ pɩwɛ mbʋ lɛ, ɛnɩɩ nɔɔ nakɛyɛ taŋ cɔkɔyɛ taa nɛ kɔtɔŋ se: “Moyizi! Taakɩlɩ ñɔtɩnʋʋ. Hɔzɩ ña-naataŋgbala, mbʋ pʋyɔɔ yɔ ŋsɩŋ lone kiɖeɖeye taa.” Yehowa kaatɩŋnɩ tiyiyu nɔɔyʋ yɔɔ nɛ ɛyɔɔdʋʋnɩ Moyizi.

Sɔɔndʋ kpa Moyizi nɛ ehuuzi ɛ-ɛsa yɔɔ. Nɔɔ ŋga kɔyɔɔdaa se: “Mana kʋñɔŋ ŋgʋ kɩ-taa Izrayɛɛlɩ mba wɛɛ yɔ. Mankaɣ-wɛ lɩzʋʋ Ejipiti nɛ mowoni-wɛ tɛtʋ kɩbandʋ natʋyʋ taa. Ñakaɣnɩ man-samaɣ lɩzʋʋ Ejipiti ɛjaɖɛ taa.” Pɩtʋʋ fɛyɩ se tɔm ndʋ tɩɖɩɣzɩ Moyizi, yaa we?

Moyizi pɔzaa se: “Ye samaɣ ɛpɔzɩ-m se atiyi-m kɔ-cɔlɔ, suwe mankaɣ-kɛ cosuu?” Ɛsɔ cosi-i se: “Heyi-kɛ se Yehowa, Abraham tɛ Ɛsɔ, Izaakɩ tɛ Ɛsɔ nɛ Yakɔɔb tɛ Ɛsɔ tiyini-ŋ pɔ-cɔlɔ.” Moyizi tasɩ pɔzʋʋ se: “Ye samaɣ ekizaa se kaawelisiɣni-m, ɛzɩma malakɩ?” Yehowa la nabʋyʋ nɛ ɛwɩlɩ Moyizi se ɛkaɣ-ɩ sɩnʋʋ. Eheyi Moyizi se ɛpɛɖɩ ɛ-ɖaʋ tataa. Ɛpɛɖaa lɛ, ɖaʋ ŋgʋ kɩpɩsɩ ɖʋm. Moyizi ɖɔkɩ ɖʋm ɛnʋ e-suu lɛ, ɛpɩsɩ ɖaʋ. Yehowa heyi Moyizi se: “Ye ŋwoba nɛ ŋla piti lakasɩ sɩnɛ yɔ, pakaɣ naʋ se mentiyini-ŋ.”

Moyizi cosi Yehowa se: “Maapɩzɩɣ yɔɔdʋʋ.” Yehowa heyi-i se: “Mankaɣ-ŋ heyuu ndʋ ŋkaɣ yɔɔdʋʋ yɔ, nɛ ña-ɖalʋ Aarɔɔnɩ kaɣ-ŋ sɩnʋʋ.” Lɛɛlɛɛyɔ, Moyizi nawa se Yehowa sɩɣnɩ-ɩ lɛ, ɛkpaɣ ɛ-halʋ nɛ ɛ-pɩyalaa nɛ papɩsɩ Ejipiti.