Ɛsɔ sɛtʋ kɩɖanɖʋʋ

Moyizi kpa Sinayii Pʋʋ yɔɔ lɛ, Yehowa heyi-i se esiɣ ŋgee kizinziku nakʋyʋ nɛ Izrayɛɛlɩ mba sɛɛ-ɩ kɩ-tɛɛ. Ye pacaɣ kʋyʋʋ lone naɖɩyɛ taa yɔ, pɩwɛɛ se pɛkpɛzɩ-kʋ, nɛ patalɩɣ ɖenɖe powoki yɔ lɛ, paɖaɣnɩ-kʋ siɣu.

Yehowa heyi-i se: “Heyi samaɣ se kala haɖɛ faaa nɛ pɩsɩna nɛ pama Ɛsɔ sɛtʋ kɩɖanɖʋʋ.” Nɛ Izrayɛɛlɩ mba ha sika, liidiye nɛ ñɩm wondu lɛɛtʋ. Paha ɖɔɖɔ wondu ndʋ palʋʋnɩ pɩsaŋ yɔ, tɔna nɛ wondu lɛɛtʋ sakɩyɛ. Paha wondu siŋŋ nɛ Moyizi heyi-wɛ se: “Pɩmaɣ mbʋ! Ɩtaatasɩ nabʋyʋ kɔnʋʋ.”

Abalaa nɛ halaa sakɩyɛ ɖʋ nesi nɛ pala Ɛsɔ sɛtʋ kɩɖanɖʋʋ ŋgʋ. Yehowa ha-wɛ lɔŋsɩnɖɛ nɛ papɩzɩ pala tʋmɩyɛ nɖɩ camɩyɛ. Nabɛyɛ lakaɣ pɩsatʋ nɛ palʋʋ pɩsaŋ nɛ pʋwayɩ lɛ pacanɩɣ pɩsaŋ ɛnɩ. Lalaa ñesikaɣ pɛɛ, palakɩnɩ sika tʋmɩyɛ nɛ pasakɩ tɩŋ ɖɔɖɔ.

Samaɣ la Ɛsɔ sɛtʋ kɩɖanɖʋʋ ɖeyi ɖeyi ɛzɩ Yehowa kaapɔzʋʋ-kɛ yɔ. Pakpaɣ pɩsaʋ kɩbaŋʋ nakʋyʋ nɛ patayɩ Ɛsɔ sɛtʋ kɩɖanɖʋʋ taa tam nabʋlɛ: Paya hɔɔlʋʋ kʋɖʋmʋʋ se Lone Kiɖeɖeye, nɛ payaa lɛɛkʋ se Lone Kiɖeɖeye nɖɩ ɖɩkpaɖaa yɔ. Aɖakaɣ nakɛyɛ kaawɛ Lone Kiɖeɖeye nɖɩ ɖɩkpaɖaa yɔ ɖɩ-taa nɛ payaɣ-kɛ se ɛgbɛyɛ ɖʋʋ aɖakaɣ. Paalabɩ-kɛ nɛ akasɩya ɖaŋ nɛ sika. Nɛ Lone Kiɖeɖeye taa lɛ, pasɩ sika kanɖʋnaa ɖɩzɩyɛ, taabɩlɩ nɛ altaaru ŋgʋ kɩ-yɔɔ pañazɩɣ ŋgee tɩlaaɖɩ yɔ. Ñɩɣyʋʋ kɩsɛɛmʋʋ ñanaɣ sɔsɔɔ nakɛyɛ nɛ altaaru sɔsɔʋ nakʋyʋ kaawɛ kadaɣ taa. Ɛgbɛyɛ ɖʋʋ aɖakaɣ tɔzaɣ Izrayɛɛlɩ mba se poɖuwaa se pañaŋ Yehowa. Ŋsɩm mbʋ ɛgbɛyɛ ɖʋʋ kɛwa yɔ? Pɩkɛ ŋgee ɖuutu ndʋ tɩ-taa nabɛyɛ nɩɣnɩ ɖama se palakɩ nabʋyʋ yɔ.

Yehowa lɩzɩ Aarɔɔnɩ nɛ ɛ-pɩyalaa se pɛkɛ cɔjɔnaa nɛ pala tʋmɩyɛ Ɛsɔ sɛtʋ kɩɖanɖʋʋ tɛɛ. Pɩwɛɛ se pɔcɔnɩ Ɛsɔ sɛtʋ kɩɖanɖʋʋ yɔɔ camɩyɛ nɛ palaɣ kɩlaŋ kɩ-tɛɛ. Cɔjɔ kɩlɩm Aarɔɔnɩ ɖeke kaawɛnɩnɩ waɖɛ se ɛsʋʋ Lone Kiɖeɖeye nɖɩ ɖɩkpaɖaa yɔ ɖɩ-taa. Ɛsʋʋ ɖɩ-taa tam kʋɖʋmam pɩnaɣ taa se ɛlaa kɩlaʋ ɛ-maɣmaɣ ɛ-kɩwɛɛkɩm, ɛ-hɔʋ kɩwɛɛkɩm nɛ Izrayɛɛlɩ samaɣ kpeekpe kɩwɛɛkɩm yɔɔ.

Izrayɛɛlɩ mba lɩnɩ Ejipiti nɛ pɩla pɩnaɣ lɛ, palabɩ Ɛsɔ sɛtʋ kɩɖanɖʋʋ ŋgʋ. Lɛɛlɛɛyɔ, pɛwɛnɩ lone nɖɩ ɖɩ-taa papɩzɩɣ nɛ pɛsɛɛ Yehowa yɔ.

Yehowa wɩlaa se ɛ-taa labɩ leleŋ nɛ Ɛsɔ sɛtʋ kɩɖanɖʋʋ ŋgʋ nɛ eyele nɛ mɩndʋ natʋyʋ lɩɩ kɩ-ñʋʋ taa. Izrayɛɛlɩ mba naɣaɣ mɩndʋ Ɛsɔ sɛtʋ kɩɖanɖʋʋ ñʋʋ taa lɛ, panɩɣ pɩ-taa se pɩwɛɛ se pacaɣ ɖenɖe pɛwɛɛ yɔ. Ɛlɛ mɩndʋ ndʋ tɩkʋyʋʋ lɛ, pɩwɩlɩɣ se pɩwɛɛ se pakʋyɩ nɛ pɛlɛɣzɩ lone. Pɩpɔzʋʋ se pɛkpɛzɩ Ɛsɔ sɛtʋ kɩɖanɖʋʋ nɛ patɩŋ mɩndʋ ndʋ tɩ-wayɩ.