Cɔŋɩyaa 12

Izrayɛɛlɩ mba kʋyɩ Sinayii Pʋʋ cɔlɔ nɛ patɩŋnɩ Paraanɩ kañɩmbusuu taa nɛ powolo ɖenɖe payaɣ se Kadɛɛsɩ yɔ. Peeɖe Yehowa heyi Moyizi se: “Lɩzɩ abalaa 12, paa cejewiye nɖɩ ɖɩ-taa lɛ, abalʋ kʋɖʋm nɛ ŋtiyi-wɛ nɛ powolo pɔcɔŋ Kanaŋ ɛjaɖɛ nɖɩ mankaɣ cɛlʋʋ Izrayɛɛlɩ mba yɔ.” Moyizi lɩzɩ abalaa 12 nɛ eheyi-wɛ se: “Iwolo Kanaŋ ɛjaɖɛ taa nɛ ɩna se ɖɩwɛ ɖeu nɛ tɔɔnasɩ lakɩ ɖɩ-taa camɩyɛ yaa we? Ɩcɔna nɛ ɩna se ɛyaa mba pɛwɛ peeɖe yɔ, pɛwɛ ɖoŋ yaa pɛfɛyɩ ɖoŋ; nɛ pɛwɛ tɛtʋ sɔsɔtʋ taa yaa kizinzikiŋ tɛɛ pasʋʋ?” Yozuwee nɛ Kalɛɛb paawɛ abalaa 12 waa mba pa-taa, nɛ pɛɖɛɛ powolo Kanaŋ.

Kɩyakɩŋ 40 wayɩ lɛ, cɔŋɩyaa pɩsaa, pɔɖɔkɩ pe-nesi tɛɛ fiigi pee, girenaadɩ tɩŋ pee nɛ viiñi pee. Pɔkɔma lɛ, pɔyɔɔdɩ se: “Pɩkɛ ɛjaɖɛ kɩbanɖɛ. Ɛlɛ mba pɛwɛ peeɖe yɔ, pɛwɛ ɖoŋ kpem nɛ pɔcɔzɩ pɛ-tɛtʋ kolonzi sɔsɔsɩ.” Ɛlɛ Kalɛɛb yɔɔdɩ se: “Ðɩpɩzɩɣ nɛ ɖɩwabɩ-wɛ. Ðɩkpaɣ nʋmɔʋ nɛ ɖɩɖɛɛ kpaagbaa.” Ŋsɩm mbʋ pʋyɔɔ Kalɛɛb yɔɔdɩ mbʋ yɔ? Mbʋ pʋyɔɔ yɔ ɛ nɛ Yozuwee pataɣaɣ Yehowa liu. Ɛlɛ cɔŋɩyaa 10 waa lalaa tɔ se: “Aayɩ! Ɛyaa mba patalɩ ɛyaa kpem, pɛwɛ ɛzɩ ɖogowaa yɔ! Ðɩwɛ ɛzɩ nakaŋ yɔ pɛ-ɛsɩndaa.”

Pitii Izrayɛɛlɩ mba yɔɔɔ nɛ papaɣzɩ miduu nɛ peheyiɣ ɖama se: “Ðɩlɩzɩ ɖa-tɩ ñʋʋdʋ kɩfalʋ nɛ ɖɩpɩsɩ Ejipiti. Mbʋ pʋyɔɔ yɔ, ye ɖiwobi ɛjaɖɛ nɖɩ ɖɩ-taa yɔ, sɩm pɩtɛŋnɩ-ɖʋ?” Yozuwee nɛ Kalɛɛb peheyi samaɣ se: “Sɔɔndʋ ɛtaakpa-mɩ. Ɩtaamaanɩ Yehowa paɣtʋ yɔɔ. Yehowa kaɣ ɖɔ-yɔɔ kandɩyʋʋ.” Ɛlɛ Izrayɛɛlɩ mba tiwelisini-wɛ. Halɩ pañɩnaɣ se pakʋ Yozuwee nɛ Kalɛɛb!

Ɛbɛ Yehowa laba? Eheyi Moyizi se: “Mbʋ pɩtɩŋa payɩ malabɩ Izrayɛɛlɩ mba yɔ, pɩtɩmaɣ-wɛ. Pa-ñʋʋ taa wɛ ɖoŋ mbʋ. Pʋyɔɔ lɛ, pɛwɛɣ nɛ poyotuu kañɩmbusuu taa cɩnɛ pɩnzɩ 40 nɛ pɔkɔɔ pasɩ. Pe-piya nɛ Yozuwee nɛ Kalɛɛb pe-ɖeke pakaɣnɩ wobu Kanaŋ ɛjaɖɛ nɖɩ manɖʋwa se mɛncɛlɩɣ-wɛ yɔ, tɩ-taa.”