Pakʋyɩ Yehowa yɔɔ

Izrayɛɛlɩ mba wɛ kañɩmbusuu taa nɛ pɩla alɩwaatʋ pazɩ lɛ, Kora, Dataanɩ, Abiram nɛ ɛyaa 250 waa nabɛyɛ kʋyɩ Moyizi yɔɔ. Peheyi-i se: “Ñɔ-tɔm nɩ-ɖʋ. Ɛbɛ yɔɔ pɩwɛɛ se ŋkɛ ɖa-ñʋʋdʋ nɛ Aarɔɔnɩ kɛ cɔjɔ kɩlɩm? Pɩtɩkɛ mi-ɖeke Yehowa wazɩɣ, ɛwazɩɣ ɖa-tɩŋa.” Pa-lakasɩ nzɩ, sɩtɩkɛdɩnɩ Yehowa. Ɛ-lɩmaɣza taa lɛ, ɛ-maɣmaɣ ɛ-yɔɔ ɛyaa mba pakʋyaa.

Moyizi heyi Kora nɛ mba payɩ patɩŋaɣ ɛ-wayɩ yɔ se: “Cee lɛ, ɩɖɔkɩ mɩ-ñanzɩ nzɩ sɩ-taa pañaɣzɩɣ ŋgee tɩlaaɖɩ yɔ nɛ ɩkɔɔ Ɛsɔ sɛtʋ kɩɖanɖʋʋ tɛɛ. Yehowa kaɣ-ɖʋ wɩlʋʋ mba ɛlɩzaa yɔ.”

Tɛʋ fema lɛ, Kora nɛ ɛyaa 250 powolo pakatɩ Moyizi, Ɛsɔ sɛtʋ kɩɖanɖʋʋ tɛɛ. Kora nɛ ɛ-ɛyaa paawɛɛ nɛ pañaɣzɩɣ ŋgee tɩlaaɖɩ ɛzɩ mba kɛnɩ cɔjɔnaa yɔ. Yehowa heyi Moyizi nɛ Aarɔɔnɩ se: “Iposi mɩ-tɩ nɛ Kora nɛ ɛ-ɛyaa.”

Paa Kora kaawoba nɛ ɛkatɩ Moyizi yɔ, Dataanɩ, Abiram nɛ pɔ-hɔŋ taa mba paba ñekizaa se paawoki. Yehowa heyi Izrayɛɛlɩ mba se pataañɔtɩnɩ Kora, Dataanɩ nɛ Abiram pe-kizinzikiŋ. Peeɖe peeɖe lɛ, Izrayɛɛlɩ mba kɛzɩ pa-tɩ hɔɔlʋʋ. Dataanɩ, Abiram nɛ pɔ-hɔŋ taa ñɩma paasɩŋ pe-kizinzikiŋ nɔnɔsɩ taa. Peeɖe lɛ, tɛtʋ caŋ tɩfaɣ nɛ tilibi-wɛ. Nɛ Kora nɛ ɛ-ɛyaa 250 waa mba paawɛ Ɛsɔ sɛtʋ kɩɖanɖʋʋ cɔlɔ yɔ? Miŋ nɩɩyɩ lɩnɩ ɛsɔdaa nɛ ɛñaɣ pa-tɩŋa.

Pʋwayɩ lɛ, Yehowa heyi Moyizi se: “Kpaɣ paa cejewiye nɖɩ lɛ ɖɩ-ñʋʋdʋ ɖaʋ nɛ ŋma kɩ-yɔɔ ɛ-hɩɖɛ. Ma Aarɔɔnɩ hɩɖɛ Leevi mba ɖaʋ yɔɔ. Woni ɖaŋ ɛnɩ nɛ ŋsɩɩ kizinziku tɛɛ, nɛ weyi malɩzɩɣ yɔ ɛ-ɖaʋ yɔɔ hɛtʋ kaɣ lɩʋ.”

Tɛʋ fema lɛ, Moyizi lɩnɩ ɖaŋ ɛnɩ ɩ-tɩŋa nɛ ɛwɩlɩ cejewe ñʋndɩnaa. Aarɔɔnɩ ɖaʋ yɔɔ nɛ hɛtʋ. Yehowa tɩŋnɩ nʋmɔʋ ŋgʋ kɩ-yɔɔ nɛ ɛwɩlɩ kpayɩ kpayɩ se Aarɔɔnɩ ɛlɩzaa se ɛkɛ cɔjɔ kɩlɩm.