Yɛftee ɖuutu

Izrayɛɛlɩ mba ɖaɣnɩ yebu Yehowa nɛ pɛsɛɣ cɛtɩm ɛsɔnaa. Amooni mba yoni Izrayɛɛlɩ mba lɛ, cɛtɩm ɛsɔnaa mba patɩpɩzɩ nɛ pasɩnɩ-wɛ. Izrayɛɛlɩ mba tɔɔ kʋñɔŋ pɩnzɩ sakɩyɛ. Pɩkɔma lɛ, pɛtɛzɩ heyuu Yehowa se: “Ðɩlabɩ kɩdɛkɛdɩm. Ðitendi-ŋ, ya ɖa-ñʋʋ ɖo-koyindinaa nesi tɛɛ.” Izrayɛɛlɩ mba yɔkɩ pa-sɩʋ kpelisi nɛ paɖaɣnɩ paɣzʋʋ sɛʋ Yehowa. Yehowa taasɔɔlɩ se pɛwɛɛ kʋñɔŋ taa mbʋ.

Yehowa lɩzɩ you laɖʋ nɔɔyʋ se ɛɖɛɛ Izrayɛɛlɩ mba nɔɔ nɛ poyooni Amooni mba; payaɣ-ɩ se Yɛftee. Yɛftee heyi Yehowa se: “Ye ŋsɩnɩ-m nɛ mawa you kʋnɛ yɔ, monɖuuni-ŋ se maapɩsɩɣ ɖɩɣa lɛ, ɛyʋ kajalaɣ tʋ weyi ɛlɩɣnɩ ma-ɖɩɣa taa nɛ ɛkatɩ-m yɔ, mɛncɛlɩɣ-ŋ ɛyʋ ɛnʋ.” Yehowa welisini Yɛftee nɛ ɛsɩnɩ-ɩ nɛ ɛwa you.

Yɛftee pɩsaɣ ɖɩɣa lɛ, ɛyʋ kajalaɣ tʋ weyi ɛkatɩ-ɩ yɔ, ɛnʋ lɛ ɛ-pɛlɛ ɛgbamɩyɛ. Ɛɛwɛɛ ɛpaɣ nɛ ɛmakɩ nesi tɛɛ suuye naɖɩyɛ. Ɛbɛ Yɛftee kaɣ labʋ? Ɛtɔzɩ e-ɖuutu yɔɔ nɛ ɛyɔɔdɩ se: “Hayɩ, mɛn-pɛlɛ! Ŋɖʋ-m kaɖɛ taa. Monɖuuni Yehowa. Nɛ pʋcɔ mɔnɖɔ mon-ɖuutu ndʋ tɩ-yɔɔ lɛ, pɩwɛɛ se mowoni-ŋ Ɛsɔ sɛtʋ kɩɖanɖʋʋ tɛɛ Siiloo nɛ ŋsɛɛ Yehowa peeɖe.” Ɛlɛ ɛ-pɛlɛ cosi-i nɛ ɛyɔɔdɩ se: “Paaba, ye ŋɖuuni Yehowa yɔ, la pɩ-yɔɔ. Mbʋ mɔnpɔzʋʋ-ŋ yɔ lɛ se ŋha-m fenasɩ naalɛ nɛ ma nɛ man-taabalaa ɖɩpɩzɩ ɖɩkpa pʋŋ ñʋŋ taa nɛ ɖileɣyi. Nɛ pʋwayɩ lɛ, manpɩzɩɣ nɛ mɛnɖɛɛ.” Yɛftee pɛlɛ sɛ Yehowa Ɛsɔ sɛtʋ kɩɖanɖʋʋ tɛɛ e-wezuu kpeekpe. Paa pɩnaɣ ŋga lɛ, ɛ-taabalaa woki ɛ-cɔlɔ Siiloo nɛ panaɣ-ɩ.