Daviid nɛ Sɔɔlɩ

Daviid kʋ Gooliyaatɩ lɛ, Wiyaʋ Sɔɔlɩ lɩzɩ-ɩ pʋwayɩ se ɛkɛ ɛ-sɔɔjanaa ñʋʋdʋ. Daviid pɩzaa nɛ ɛwa yoŋ sakɩyɛ nɛ pɔyɔɔdʋʋ ɛ-tɔm paa le. Daviid lɩɣnɩ you nɛ ekpeŋ ɖɩɣa lɛ, halaa paɣ nɛ peteɣ hendu se: “Sɔɔlɩ kʋ ɛyaa kudokiŋ nɛ Daviid kʋ ɛyaa kudokiŋ hiŋ sakɩyɛ!” Pʋyɔɔ Sɔɔlɩ paɣzɩ sʋsʋʋ Daviid nɛ ɛñɩnɩɣ se ɛkʋ-ɩ.

Daviid sɩm cɩmʋʋ mabʋ pɩdɩɩfɛyɩ. Kɩyakʋ nakʋyʋ Daviid wɛɛ nɛ ɛmakɩ cɩmʋʋ se pɩhɛzɩ Sɔɔlɩ laŋɩyɛ lɛ, ɛlɛ kpaɣ kɩgbɛzɛŋ nɛ ɛtɔ se ɛkʋ-ɩ. Ɛlɛ Daviid wɛlɩ ɛ-tɩ nɛ kɩgbɛzɛŋ wolo nɛ kisiɣ koloŋa yɔɔ. Pʋwayɩ lɛ, Sɔɔlɩ ñaɣ pana tam sakɩyɛ se ɛkʋ Daviid. Pɩtɛmnaa se Daviid kɔma ese nɛ ɛɖɛɛ kañɩmbusuu taa.

Sɔɔlɩ kpaɣ sɔɔjanaa 3000 nɛ ɛɖʋ Daviid wayɩ. Sɔɔlɩ wolo nɛ ɛsʋʋ ɛwaɣ pɔʋ ŋgʋ kɩ-taa ɖeyi ɖeyi Daviid nɛ ɛ-ɛyaa paamɛlaa yɔ. Peeɖe Daviid ɛyaa wɛɛtɩ-ɩ se: “Lɛɛlɛɛyɔ ŋhiɣ waɖɛ se ŋkʋ Sɔɔlɩ.” Daviid ñɔtɩnɩ Wiyaʋ Sɔɔlɩ nɛ ɛsɛtɩ e-toko sɔsɔʋ ŋgʋ eesuwa yɔ kɩ-hɔɔlʋʋ nakʋyʋ, ɛlɛ Sɔɔlɩ tɩna. Pʋwayɩ lɛ, Daviid ɛhʋyɛ cɛyɩ-ɩ siŋŋ, mbʋ pʋyɔɔ yɔ, ɛtɩwɩlɩ ñamtʋ wiyaʋ weyi Yehowa ta num yɔ. Daviid tɩha ɛ-ɛyaa nʋmɔʋ se pakʋ Sɔɔlɩ. Halɩ Sɔɔlɩ lɩnɩ pɔʋ taa nɛ ɛɖɛɣ lɛ, Daviid ma kubuka nɛ ɛyaa-ɩ nɛ eheyi-i se ɛnʋ kaahiɣ waɖɛ se ɛkʋ-ɩ, ɛlɛ ɛtɩla mbʋ. Ɛzɩ piyeba nɛ Sɔɔlɩ lɛɣzɩ lɩmaɣza wena ɛɛwɛnɩ Daviid yɔɔ yɔ?

Aayɩ. Sɔɔlɩ wɛ Daviid wayɩ mbʋ. Ðoo naayɛ taa, Daviid nɛ e-koou Abisayii palabɩ hɛɛɛ nɛ pasʋʋ Sɔɔlɩ nɛ ɛ-sɔɔjanaa ɖigbeɣliye taa. Halɩ Abnɛɛrɩ weyi ɛɛkɛ Sɔɔlɩ yɔɔ kandɩyʋ yɔ eɖowaɣ. Nɛ Abisayii tɔ se: “Pɩkɛnɩ-ɖʋ waɖɛ sɔsɔɖɛ! Yele mankʋ-ɩ.” Ɛlɛ Daviid cosi-i se: “Yehowa kaɣnɩ hʋʋ Sɔɔlɩ tɔm. Yele nɛ ɖɩkpaɣ ɛ-kɩgbɛzɛŋ nɛ ɛ-lɩm kokoɖe nɛ ɖɩɖɛɛ.”

Daviid kpa pʋʋ nakʋyʋ yɔɔ peeɖe se pɩsa nɛ ɛcɔnɩ Sɔɔlɩ nɛ ɛ-sɔɔjanaa ɖigbeɣliye taa. Ɛma kubuka nɛ ɛtɔ se: “Abnɛɛrɩ, pɩlabɩ ɛzɩma nɛ ŋtɩpɩzɩ nɛ ŋkandɩyɩ ñe-wiyaʋ yɔɔ? Le Sɔɔlɩ lɩm kokoɖe nɛ ɛ-kɩgbɛzɛŋ pɛwɛɛ?” Sɔɔlɩ nɩ Daviid nɔɔ lɛ, ɛtɔ se: “Ŋpɩzaɣ se ŋkʋ-m, ɛlɛ ŋtɩla mbʋ. Manawa se ñakaɣnɩ kɛʋ Izrayɛɛlɩ wiyaʋ kɩfalʋ.” Sɔɔlɩ pɩsɩ e-kewiyaɣ ɖɩɣa taa. Ɛlɛ pɩtɩkɛ Sɔɔlɩ hɔʋ taa mba tɩŋa paɖaɣnɩ Daviid.