KPƐLƖKƲƲ 43
Wiyaʋ Daviid kɩwɛɛkɩm
Sɔɔlɩ sɩba lɛ, Daviid pɩsɩ wiyaʋ. Ɛɛwɛnɩ pɩnzɩ 30. Ɛpaɣzɩ tɔɔʋ kewiyitu nɛ pɩla pɩnzɩ nasɩyɩ lɛ, ɛla nabʋyʋ nɛ pɩfɛyɩ ɖeu paa ññɩɩ. Ðanaɣ nakɛyɛ yɔɔ, ɛɛwɛ e-kuduyuu ñʋʋ taa lɛ, ɛna halʋ nɔɔyʋ, ɛtʋʋzaa pɩdɩɩfɛyɩ. Daviid kɔɔ nɛ ɛna se payaɣ halʋ ɛnʋ se Bat-Seeba nɛ ɛkɛ sɔɔja weyi payaɣ se Uriya yɔ ɛ-halʋ. Nɛ Daviid yele nɛ pɔkɔnɩ Bat-Seeba ɛ-ɖɩɣa taa. Ɛ nɛ ɩ pasʋʋ nɛ ɛlɛ haɣ hoɣa. Daviid ñaɣ pana se ɛmɛsɩ mbʋ ɛlaba yɔ. Eheyi ɛ-sɔɔjanaa ñʋʋdʋ se powobi you taa lɛ, ɛsɩɩ Uriya sɔɔjanaa nɔɔ nɛ pʋwayɩ lɛ poposini-i nɛ peyele e-ɖeke. Pakʋ Uriya you taa nɛ pɩtɛ lɛ, Daviid kpaɣ Bat-Seeba nɛ ɛpɩsɩ-ɩ ɛ-halʋ.
Ɛlɛ Yehowa na mbʋ pɩtɩŋa payɩ pɩlaba yɔ. Ɛbɛ ɛkaɣ labʋ? Yehowa tiyi nayʋ Naataanɩ Daviid cɔlɔ. Naataanɩ heyi Daviid se: “Ñɩm tʋ nɔɔyʋ wɛnɩ heŋ sakɩyɛ, nɛ kʋñɔndʋ nɔɔyʋ ñɛwɛnɩ heɣa kʋɖʋmaɣ ɖeke nɛ ɛsɔɔlɩ-kɛ siŋŋ. Ñɩm tʋ ɛnʋ ewolo nɛ ɛmʋ heɣa kʋɖʋmaɣ ŋga kʋñɔndʋ wɛna yɔ.” Daviid nɩ mbʋ lɛ, ɛ-taa wɩɩ nɛ ɛyɔɔdɩ se: “Ñɩm tʋ ɛnʋ, ɛmʋnɩ sɩm!” Peeɖe Naataanɩ heyi Daviid se: “Ña lɛ ñɩm tʋ ɛnʋ!” Daviid sʋʋ laŋwɛɛkɩyɛ taa nɛ ekpiɖi ɛ-kɩwɛɛkɩm yɔɔ nɛ eheyi Naataanɩ se: «Malabɩ kɩwɛɛkɩm Yehowa ɛsɩndaa.» Kɩwɛɛkɩm mbʋ, pɩkɔnɩ kʋñɔmɩŋ sakɩyɛ Daviid nɛ ɛ-hɔʋ pɔ-yɔɔ. Yehowa hɔ Daviid nɩŋgbaŋʋʋ, ɛlɛ ɛha-ɩ waɖɛ se ɛcaɣ wezuu, mbʋ pʋyɔɔ yɔ, eluzi ɛ-tɩ nɛ ɛwɛɛ ɖɔɖɔ toovenim.
Daviid kaasɔɔlaa se ɛma Yehowa templo, ɛlɛ Yehowa lɩzɩ Daviid pɩyalʋ Salomɔɔ se ɛnʋ ɛmanɩ-ɩ templo ŋgʋ. Daviid paɣzɩ wondu ndʋ pamaɣnɩ templo yɔ kpeɣluu se pɩɩsɩnɩ Salomɔɔ, nɛ ɛyɔɔdɩ se: “Pɩwɛɛ se Yehowa templo ɛwɛɛ kajʋka. Salomɔɔ kɛ pɩɣa evelaɣ, ɛlɛ mansɩɣnɩ-ɩ nɛ mɔñɔɔzɩ-ɩ mbʋ payɩ pɩpɔzʋʋ-ɩ yɔ.” Daviid ha liidiye sakɩyɛ se pamanɩ templo. Ɛñɩnɩ tʋmlaɖaa mba pasɩm tʋmɩyɛ labʋ camɩyɛ yɔ. Ekpeɣli sika nɛ liidiye ñɩɣtʋ nɛ eyele nɛ powolo Tiirɩ nɛ Siidɔɔ nɛ pɔkɔnɩ sɛɛdrɩ tɩŋ kpoŋgbolonaa. Pʋcɔ nɛ Daviid sɩkɩ lɛ, ɛwɩlɩ ɛ-pɩyalʋ ɛzɩma pɩwɛɛ se ɛma templo ŋgʋ yɔ, nɛ eheyi-i se: “Yehowa hanɩ-m nʋmɔʋ se mama tɔm tʋnɛ nɛ mɛncɛlɩ-ŋ. Yehowa kaɣ-ŋ sɩnʋʋ. Sɔɔndʋ ɛtaakpa-ŋ. Wɛɛ abalɩtʋ nɛ ŋla tʋmɩyɛ.”
«Weyi ehuuzuu ɛ-kɩwɛɛkɩm yɔɔ yɔ, pɩɩkaɣ-ɩ ɖenuu, ɛlɛ weyi ekuluu ɛ-kɩwɛɛkɩm yɔɔ nɛ eyeki pɩ-labʋ yɔ, pakaɣ ɛ-pʋtɔdɩyɛ naʋ.»—Aduwa 28:13