Yehowa templo

Salomɔɔ pɩsɩ wiyaʋ Izrayɛɛlɩ ɛjaɖɛ taa lɛ, Yehowa pɔzɩ-ɩ se: “Ɛbɛ ŋsɔɔlaa se maha-ŋ?” Salomɔɔ cosi-i se: “Mɛnkɛ evebu nɛ maasɩŋ mbʋ pɩtʋʋzaa yɔ. Mentendi-ŋ, ha-m lɔŋsɩnɖɛ nɛ menɖiyi ña-samaɣ.” Yehowa cosi-i se: “Ŋtɩpɔzɩ ñɩm sakɩyɛ, ɛlɛ ŋpɔzɩ lɔŋsɩnɖɛ, pʋyɔɔ lɛ, mankaɣ labʋ nɛ ŋkɛ weyi ɛkɩlɩ lɔŋ ɛyaa kpeekpe ɛjaɖɛ yɔɔ yɔ. Nɛ mankaɣ-ŋ haʋ ɖɔɖɔ ñɩm sakɩyɛ. Pɩtasɩ lɛ, ye ŋwelisiɣni-m yɔ, ñe-wezuu kaɣ ɖaɣlʋʋ.”

Salomɔɔ paɣzɩ maʋ templo. Ɛlabɩnɩ tʋmɩyɛ sika, liidiye ñɩɣtʋ, kpoŋgbolonaa nɛ pɛɛ. Abalaa nɛ halaa mba pɛwɛ niye pɩdɩɩfɛyɩ yɔ, mba manɩ templo. Pɩnzɩ 7 pakpaɣaa nɛ pamanɩ templo, nɛ lɛɛlɛɛyɔ lɛ pɛtɛm-kʋ nɛ pɩtalaa se paɖʋzɩ-kʋ Yehowa nesi tɛɛ. Altaaru nakʋyʋ kaawɛ templo taa, kɩ-yɔɔ nɛ kpɩna wena palaɣ-yɛ kɩlaʋ yɔ. Salomɔɔ luŋ ɛ-nʋmbɔla yɔɔ nɛ ɛha ɛsa nɛ altaaru nɛ ɛtɩmnɩ Yehowa se: “Hayɩ Yehowa, templo kʋnɛ kɩtɩpaɣlɩ nɛ kɩfɛyɩ kajʋka nɛ pɩmʋna se ŋsʋʋ kɩ-taa. Ɛlɛ ɖitendi-ŋ, mʋ ɖɛ-sɛtʋ nɛ ŋwelisi ɖa-adɩma.” Yehowa maɣzɩ suwe templo nɛ Salomɔɔ adɩma ana a-yɔɔ? Salomɔɔ tɩɩtɛm tɩmʋʋ lɛ, miŋ nɩɩyɩ lɩɩnɩ ɛsɔdaa nɛ ɩñaɣ kpɩna wena aawɛ altaaru yɔɔ yɔ. Pɩwɩlaa se Yehowa taa labɩ leleŋ nɛ templo ŋgʋ. Izrayɛɛlɩ mba na mbʋ lɛ, pɩlabɩ-wɛ leleŋ pɩdɩɩfɛyɩ.

Paasɩm Wiyaʋ Salomɔɔ Izrayɛɛlɩ ɛjaɖɛ kpeekpe taa se ɛkɛ lɔŋsɩnɖʋ nɛ halɩ panɩ ɛ-lɔŋsɩnɖɛ taŋ lona wena aawɛ ɖooo poliŋ yɔ a-taa. Pʋyɔɔ ɛyaa ndɩ ndɩ kɔŋaɣ ɛ-cɔlɔ se ɛsɩnɩ-wɛ. Halɩ Seba Abiɖe kɔm nɛ ɛna Salomɔɔ nɛ tɔm ndʋ tɩwɛ kaɖɛ siŋŋ yɔ. Ɛzɩma Salomɔɔ cosi-i yɔ, pɩlabɩ ɛ-yɔɔ tʋmɩyɛ siŋŋ nɛ ɛyɔɔdɩ se: “Mantaatisi tɔm ndʋ ɛyaa yɔɔdaɣ ñɔ-yɔɔ yɔ tɩ-yɔɔ. Ɛlɛ lɛɛlɛɛyɔ lɛ, mbʋ manawa yɔ, pɩcɛzɩ ndʋ maanɩwa yɔ. Ñɛ-Ɛsɔ Yehowa wazɩ-ŋ siŋŋ.” Wezuu caɣʋ kaawɛ leleŋ Izrayɛɛlɩ ɛjaɖɛ taa, nɛ samaɣ kaawɛ koboyaɣ taa. Ɛlɛ pɩkaɣ lɛɣzʋʋ.