Kewiyaɣ taa tayaa

Laŋhɛzɩyɛ kaawɛ Izrayɛɛlɩ ɛjaɖɛ taa alɩwaatʋ ndʋ Salomɔɔ sɛɣaɣ Yehowa camɩyɛ yɔ. Ɛlɛ ɛkɔm nɛ ɛkpaɣ ajɛɛ lɛɛna taa halaa, nɛ halaa mba, pɛsɛɣaɣ sɩʋ kpelisi. Pazɩ pazɩ lɛ, Salomɔɔ lɩmaɣza lɛɣzɩ nɛ ɛpaɣzɩ sɛʋ ɖɔɖɔ sɩʋ kpelisi. Yehowa taa wɩɩ nɛ eheyi Salomɔɔ se: “Pakaɣ mʋʋ kewiyaɣ ñɔ-hɔʋ cɔlɔ nɛ patayɩ ka-taa nabʋlɛ. Mɛncɛlɩɣ hɔɔlʋʋ sɔsɔʋ ña-lɩmɖʋyʋ nɔɔyʋ nɛ pɩkazɩ hɔɔlʋʋ cikpeluu ñɔ-hɔʋ.”

Yehowa tɩŋnɩ nʋmɔʋ lɛɛkʋ yɔɔ ɖɔɖɔ nɛ ɛlɩzɩ tɔm tʋnɛ tɩ-taa camɩyɛ. Salomɔɔ lɩmɖʋyʋ weyi payaɣ se Yerobowam yɔ, ɛɖɔŋaɣ nʋmɔʋ nakʋyʋ lɛ, ɛkatɩ nayʋ Ahiya. Ahiya cɩyɩ ɛ-maɣmaɣ e-toko nɛ ɛtayɩ-kʋ hɔɔlasɩ 12 nɛ eheyi Yerobowam se: “Yehowa kaɣ mʋʋ kewiyitu Salomɔɔ hɔʋ cɔlɔ nɛ ɛtayɩ tɩ-taa nabʋlɛ. Mʋ hɔɔlasɩ 10, mbʋ pʋyɔɔ yɔ, ŋkaɣ tɔɔʋ kewiyitu cejewe 10 yɔɔ.” Wiyaʋ Salomɔɔ nɩ tɔm tʋnɛ lɛ, ɛpaɣzɩ ñɩnʋʋ se ɛkʋ Yerobowam. Pɩlabɩ mbʋ lɛ, Yerobowam se nɛ ɛɖɛɛ Ejipiti. Pʋwayɩ lɛ, Salomɔɔ sɩ nɛ ɛ-pɩyalʋ Robowam pɩsɩ wiyaʋ e-lone taa. Peeɖe Yerobowam nawa se ɛpɩzɩɣ nɛ ɛpɩsɩ Izrayɛɛlɩ.

Izrayɛɛlɩ ɛjaɖɛ taa ɛzʋtʋyaa heyi Robowam se: “Ye ŋcɔŋnɩ samaɣ ɖeɖe camɩyɛ yɔ, kakaɣ-ŋ nɩnʋʋ.” Ɛlɛ Robowam ɖaɣʋnaa heyi-i se: “Pɩwɛɛ se ŋñazɩ samaɣ! Sɔzɩ-kɛ tʋma wena a-labʋ wɛ kaɖɛ yɔ.” Robowam ɖɔ ɛ-ɖaɣʋnaa lɔŋ tasʋʋ yɔɔ. Ɛnazaɣ samaɣ siŋŋ nɛ samaɣ kʋyɩ ɛ-yɔɔ. Pɩla mbʋ nɛ samaɣ sɩɩ Yerobowam wiyaʋ cejewe 10 yɔɔ. Cejewe ana payaɣ se Izrayɛɛlɩ kewiyaɣ. Cejewe 2 wena akazaa yɔ, ana payaɣ se Yuuda kewiyaɣ nɛ añɔnɩ Robowam kpam. Lɛɛlɛɛyɔ lɛ, Izrayɛɛlɩ cejewe 12 taa tayaa.

Yerobowam taasɔɔlɩ se ɛ-samaɣ ewolo Yeruzalɛm tɛtʋ ndʋ tɩwɛ Robowam kewiyaɣ taa yɔ tɩ-taa nɛ kɛsɛɛ Yehowa. Ŋsɩm mbʋ pʋyɔɔ yɔ? Sɔɔndʋ kpaɣaɣ-ɩ se samaɣ ɛtaaha-ɩ siɣye nɛ kɔñɔɔnɩ Robowam. Peeɖe ɛlabɩ sika newee 2 nɛ eheyi samaɣ se: “Yeruzalɛm kɩlɩ posuu nɛ cɩnɛ. Ɩpɩzɩɣ nɛ ɩsɛɛ Ɛsɔ cɩnɛ.” Samaɣ paɣzɩ sɛʋ sika newee ana nɛ kɔsɔɔ Yehowa yɔɔ.