Kewiyaɣ ŋga kɛwɛ ɛzɩ tɩʋ sɔsɔʋ yɔ

Ðoo naayɛ taa, Nabukodonozɔɔrɩ ɖozi ɖoziye naɖɩyɛ nɛ ɖɩkpa-ɩ sɔɔndʋ siŋŋ. Peeɖe ɛya ɛ-tɛtʋ taa lɔŋsɩnɖaa se pɔkɔɔ nɛ palɩzɩ-ɩ ɖɩ-tɔbʋʋ. Ɛlɛ pa-taa nɔɔyʋ tɩpɩzɩ nɛ ɛlɩzɩ-ɩ ɖoziye nɖɩ ɖɩ-tɔbʋʋ. Pʋwayɩ lɛ, wiyaʋ kɛdɩ ɖoziye nɖɩ Danɩyɛɛlɩ.

Nabukodonozɔɔrɩ heyi Danɩyɛɛlɩ se: “Mana ɖoziye taa tɩʋ nakʋyʋ. Kɩkʋyaa nɛ kɩtalɩ ɖooo ɛsɔdaa. Paa tɛtʋ hɔɔlʋʋ ŋgʋ kɩ-yɔɔ ɛyʋ ɛwɛɛ yɔ, ɛnaɣ-kʋ. Kɩ-hatʋ kaawɛ kajʋka nɛ kɩlʋlɩ ɖɔɖɔ pee sakɩyɛ. Kpɩna wokaɣ nɛ ahɛzɩɣ tɩʋ ŋgʋ ki-kuzotuu tɛɛ nɛ sumasɩ ñowoki nɛ sɩɖʋʋ ɖandʋ ki-pilinzi yɔɔ. Pʋwayɩ lɛ, tiyiyu nɔɔyʋ lɩɩnɩ ɛsɔdaa. Tiyiyu ɛnʋ ɛyɔɔdɩ se: «Iti tɩʋ ŋgʋ, nɛ ɩsɛtɩ ki-pilinzi. Ɛlɛ iyele ki-kiɖe nɛ ki-lila tɛtɛɛ, nɛ ɩhɔkɩ-ɖɩ nɛ ñɩɣyʋʋ nɛ ñɩɣyʋʋ kɩsɛɛmʋʋ. Pakaɣ lɛɣzʋʋ tɩʋ ŋgʋ kɩ-laŋɩyɛ se ɖɩtaatasɩ kɛʋ ɛyʋ laŋɩyɛ nɛ paha-kʋ tɛtɛgbɩnɛ laŋɩyɛ, nɛ alɩwaatʋ 7 kaɣ ɖɛʋ kɩ-yɔɔ. Nɛ ɛyaa kpeekpe kaɣ tɩlʋʋ se Ɛsɔ kɛnɩ Wiyaʋ nɛ ɛpɩzɩɣ nɛ ɛcɛlɩ kewiyaɣ weyi ɛsɔɔlaa yɔ.»”

Yehowa yeba nɛ Danɩyɛɛlɩ nɩɩ ɖoziye nɖɩ ɖɩ-tɔbʋʋ. Danɩyɛɛlɩ nɩ ɖoziye nɖɩ ɖɩ-tɔbʋʋ lɛ, sɔɔndʋ kpa-ɩ. Nɛ ɛyɔɔdɩ se: “Oo wiyaʋ, mamaɣzaɣ se ño-koyindinaa tɔm ɖoziye nɖɩ ɖɩyɔɔdʋʋ, ɛlɛ ña-maɣmaɣ ñɔ-tɔm ɖɩyɔɔdʋʋ. Ña, ñɛkɛnɩ tɩʋ sɔsɔʋ ŋgʋ petim-kʋ yɔ. Ŋkaɣ ñe-kewiyaɣ lesuu nɛ ŋtɔɔ ñɩtʋ ɛzɩ ñɩtʋ taa kpɩnɛ yɔ. Ɛlɛ ɛzɩma tiyiyu yɔɔdaa se peyele tɩʋ ŋgʋ ki-kiɖe nɛ ki-lila yɔ, pɩwɩlɩɣ se ŋkaɣ ɖaɣnʋʋ pɩsʋʋ wiyaʋ.”

Pɩnaɣ kʋɖʋmaɣ wayɩ lɛ, kɩyakʋ nakʋyʋ Nabukodonozɔɔrɩ kpa ɛ-ɖɩɣa ñʋʋ taa nɛ ɛcɔŋnɩ ɛzɩma Babilɔɔnɩ tɛtʋ wɛ kajʋka yɔ. Ɛyɔɔdɩ se: “Ɩna tɛtʋ kɩbandʋ ndʋ mamawa yɔ. Lɛɛlɛɛyɔ, mɛnkɛ ɛyʋ sɔsɔ siŋŋ!” Ɛwɛɛ nɛ ɛyɔɔdʋʋ mbʋ lɛ, nɔɔ nakɛyɛ lɩɩnɩ ɛsɔdaa nɛ kɔtɔ se: “Nabukodonozɔɔrɩ! Kpaɣnɩ sɔnɔ ŋlesi ñe-kewiyaɣ.”

Kpaɣnɩ mbʋ lɛ, Nabukodonozɔɔrɩ sʋʋ kpaaŋ nɛ ɛlakɩ ɛzɩ ñɩtʋ taa kpɩnɛ yɔ. Eyele ɛ-ɖɩɣa nɛ ɛɖɛɛ ɛsʋʋ ñɩtʋ nɛ ɛwɛɛ ñɩtʋ taa kpɩna hɛkʋ taa. Nabukodonozɔɔrɩ ñɔsɩ ɖaɣlɩ ɛzɩ kpeluu hʋndʋ yɔ nɛ ɛ-cɩkpaŋ kaawɛ ɛzɩ sumaɣ cɩkpaŋ yɔ.

Pɩnzɩ 7 kɔm nɛ sɩɖɛɛ lɛ, Nabukodonozɔɔrɩ yɔɔ cɛ, nɛ Yehowa yele nɛ ɛɖaɣnɩ pɩsʋʋ Babilɔɔnɩ wiyaʋ. Peeɖe Nabukodonozɔɔrɩ yɔɔdaa se: “Mansaŋ Yehowa, ɛsɔdaa kpeekpe Wiyaʋ. Lɛɛlɛɛyɔ manawa se Yehowa kɛnɩ Wiyaʋ. Eluzuu tɩ kpazɩyaa, nɛ ɛpɩzɩɣ nɛ ɛcɛlɩ kewiyaɣ weyi ɛsɔɔlaa yɔ.”