Yeruzalɛm kolonzi

Yele nɛ ɖɩpɩsɩnɩ wayɩ pɩnzɩ cabɩ. Wiyaʋ Artaazɛɛrɩzɛɛsɩ lɩmɖʋyʋ Nehemiya kaakɛ Izrayɛɛlɩ tʋ weyi ɛɛwɛ Pɛrɩsɩ tɛtʋ ndʋ payaɣ se Susaŋ yɔ tɩ-taa. Nehemiya koobu nɔɔyʋ lɩnɩ Yuuda nɛ ɛkɔnɩ-ɩ tɔm kɩdɛkɛdɩtʋ natʋyʋ; tɔm ndʋ yɔ: “Samaɣ ŋga kapɩsɩ Yeruzalɛm yɔ, kɛfɛyɩ pɛɛyɛ taa. Tɛtʋ kolonzi nzɩ Babilɔɔnɩ mba kaayɔkaa yɔ, patɩñɔɔzɩ-sɩ.” Tɔm ndʋ tiyeba nɛ Nehemiya sʋʋ kʋñɔŋ taa. Ɛɛsɔɔlaa se ewolo Yeruzalɛm nɛ ɛsɩnɩ e-koobiya, pʋyɔɔ ɛtɩmnɩ Yehowa se eyele nɛ wiyaʋ ha-ɩ nʋmɔʋ.

Pʋwayɩ lɛ, wiyaʋ kɔɔ nɛ ɛna se nabʋyʋ wɛɛ nɛ pɩcɛyɩɣ Nehemiya. Nɛ eheyi-i se: “Wiɖiyi mantɩna ñɛ-ɛsɩndaa ñɩŋ mbʋ. Ɛbɛ laba?” Nehemiya cosi-i se: “Mɛ-ɛsɩndaa ɛɛñɩŋɩɣ suwe? Mɛn-tɛtʋ Yeruzalɛm pɩsɩ njɛyɛ.” Wiyaʋ pɔzɩ-ɩ se: “Nɛ ŋcaɣ se malabɩ-ŋ we yɔ?” Kpaagbaa mbʋ lɛ, Nehemiya tɩmnɩ Yehowa ɛ-laŋɩyɛ taa. Pʋwayɩ lɛ, ɛyɔɔdɩ se: “Mentendi-ŋ, ha-m nʋmɔʋ nɛ mowolo Yeruzalɛm nɛ manɖaɣnɩ maʋ kolonzi.” Wiyaʋ Artaazɛɛrɩzɛɛsɩ heyi Nehemiya se ɛpɩzɩɣ nɛ ewolo; nɛ wiyaʋ ñaɣ pana se kɩdɛkɛdɩm nabʋyʋ ɛtaatalɩ Nehemiya nʋmɔʋ kɩɖaɣlʋʋ ŋgʋ ɛkaɣ ɖɔm yɔ kɩ-taa. Wiyaʋ yele nɛ Nehemiya pɩsɩ Yuuda egeetiye ñʋʋdʋ, nɛ ɛha-ɩ kpoŋgbolonaa se ɛlabɩnɩ Yeruzalɛm tɛtʋ nɔnɔsɩ pɔɔyɩŋ.

Nehemiya talɩ Yeruzalɛm lɛ, ɛcɔɔ se ɛna ɛzɩma kolonzi wɛɛ yɔ. Pʋwayɩ lɛ, ekpeɣli cɔjɔnaa nɛ awumbiya nɛ eheyi-wɛ se: “Pɩlabɩ kaɖɛ. Pɩwɛɛ se ɖɩpaɣzɩ tʋmɩyɛ.” Peeɖe samaɣ tisaa nɛ kapaɣzɩ ɖaɣnʋʋ maʋ kolonzi.

Ɛlɛ Izrayɛɛlɩ mba koyindinaa nabɛyɛ paɣzɩ-wɛ woŋuu nɛ pɔtɔŋ se: “Sɔŋgɔlɔ haɣ maɣmaɣ pɩzɩɣ nɛ kotuzi koloŋa ŋga iɖiɣni maʋ yɔ.” Kolonzi mayaa tikemni-wɛ, ɛlɛ powobi pɩ-yɔɔ nɛ pamaɣ kolonzi. Kolonzi wɛɛ kpaʋ yɔɔ nɛ sɩcɛyɩsɩɣ.

Koyindinaa ɖʋ pa-taa se palɩɣnɩ hɔɔlɩŋ ndɩ ndɩ taa nɛ pɔkɔɔ potudi tʋmlaɖaa nɛ pɔyɔkɩ Yeruzalɛm. Yuuda mba nɩ mbʋ lɛ, sɔɔndʋ kpa-wɛ pɩdɩɩfɛyɩ. Ɛlɛ Nehemiya heyi-wɛ se: “Sɔɔndʋ ɛtaakpa-mɩ. Yehowa wɛ ɖɔ-cɔlɔ.” Peeɖe ɛsɩ feŋiyaa se pakandɩyɩ tʋmlaɖaa yɔɔ, nɛ koyindinaa tɩpɩzɩ nɛ palabɩ-wɛ pʋyʋ.

Pɩlabɩ cɛɛkɛ avema 52 lɛ, pɛtɛm kolonzi nɛ nɔnɔsɩ tʋmɩyɛ. Nehemiya kpeɣli Leevi mba tɩŋa Yeruzalɛm se patʋlɩ kolonzi nɔnɔsɩ. Ɛñɔɔzɩ-wɛ tindima naalɛ taa se petee hendu. Patɩŋnɩ Hiɖe Nɔnɔɔ nɛ pakpa koloŋa ñʋʋ taa nɛ pɔɖɔŋ tuluŋa nɛ pɔcɔʋ tɛtʋ. Pahʋlɩ aganda, nɔndɔŋ, nɛ hendu wondu lɛɛtʋ ndɩ ndɩ nɛ petee hendu nɛ pasamnɩ Yehowa. Ɛsɩdrasɩ nɛ tindimiye kʋɖʋmɖɩyɛ pɔɖɔŋaɣ, nɛ Nehemiya nɛ tindimiye lɛɛɖɛ pɔɖɔŋ nɛ pɔkɔɔ pakatɩ templo taa. Ɛyaa kpeekpe, halaa, abalaa nɛ piya, palaa kɩlaŋ Yehowa nɛ pala kazandʋ. Papɩzaɣ se panɩɩ taa leleŋ kubusi nzɩ pamakaɣ yɔ sɩ-taŋ ɖooo poliŋ taa.