Elizaabɛɛtɩ lʋlɩ pɩɣa

Cɔjɔ weyi payaɣ se Zakarii yɔ, ɛ nɛ ɛ-halʋ Elizaabɛɛtɩ paawɛ tɛtʋ ndʋ tɩñɔtɩnɩ Yeruzalɛm yɔ tɩ-taa. Alɩwaatʋ ndʋ lɛ, paatɛm maʋ Yeruzalɛm kolonzi nɛ pɩla ɛzɩ pɩnzɩ 400 mbʋ yɔ. Palabɩ nesi ɖɔkʋʋ nɛ pɩla pɩnzɩ sakɩyɛ ɛlɛ pɛfɛyɩnɩ pɩɣa. Kɩyakʋ nakʋyʋ Zakarii ñaɣzaɣ ŋgee tɩlaaɖɩ templo taa lɛ, tiyiyu Gabrɩyɛɛlɩ lɩɩ ɛ-yɔɔ. Zakarii na-ɩ lɛ, sɔɔndʋ kpa-ɩ, ɛlɛ Gabrɩyɛɛlɩ heyi-i se: “Taase sɔɔndʋ. Yehowa tiyini-m se meheyi-ŋ tɔm kɩbandʋ natʋyʋ. Ña-halʋ kaɣ lʋlʋʋ abalɩbɩɣa nakɛyɛ nɛ ŋyaa-kɛ se Yohanɛɛsɩ. Yehowa lɩzɩ Yohanɛɛsɩ se ɛlabɩ-ɩ tʋmɩyɛ sɔsɔɖɛ naɖɩyɛ.” Zakarii pɔzɩ-ɩ se: “Ɛzɩma malakɩ nɛ mana se pɩkɛ toovenim? Ma nɛ ma-halʋ ɖɩkpadɩyaa. Ɛzɩma ɖɩpɩzɩɣ nɛ ɖɩwɛɛnɩ pɩɣa?” Gabrɩyɛɛlɩ cosi-i se: “Ɛsɔ tiyini-m se meheyi-ŋ tɔm ndʋ. Ɛlɛ ɛzɩma ŋtitisi mɔn-tɔm yɔɔ yɔ pʋyɔɔ lɛ, ŋkaɣ pɩsʋʋ kaayɔɔdaɣ pɩkɔɔ nɛ pɩsɩɩnɩ alɩwaatʋ ndʋ palʋlɩ pɩɣa ŋga yɔ.”

Zakarii tɩlɩɩnɩ kooka kiɖeɖeɣa taa lɔŋ puwiye. Pʋyɔɔ ɛkɔm nɛ ɛlɩɩ lɛ, ɛyaa mba paaɖaŋɩ-ɩ awayɩ yɔ, pañɩnaɣ se patɩlɩ mbʋ pʋyɔɔ eleɖi mbʋ yɔ. Ɛlɛ Zakarii taapɩzɩɣ se ɛyɔɔdɩ. E-nesi ɛlakaɣnɩ tʋmɩyɛ nɛ ɛyɔɔdʋʋnɩ ɛyaa. Peeɖe ɛyaa ɖiɣzinaa se Ɛsɔ heyi Zakarii tɔm natʋyʋ.

Pʋwayɩ lɛ, Elizaabɛɛtɩ haɣ hoɣa nɛ ɛkɔɔ ɛlʋlɩ abalɩbɩɣa, ɛzɩ Ɛsɔ tiyiyu kaayɔɔdʋʋ yɔ. Ɛ-taabalaa nɛ ɛ-hɔʋ taa mba pɔkɔɔ se pana pɩɣa. Pa-taa kaawɛ leleŋ kpem. Elizaabɛɛtɩ heyi-wɛ se: “Ka-hɩɖɛ lɛ Yohanɛɛsɩ.” Pocosi-i se: “Paayaɣ mɩ-hɔʋ taa tʋ nɔɔyʋ se Yohanɛɛsɩ. Yaa-kɛ ka-caa hɩɖɛ, Zakarii.” Ɛlɛ Zakarii ma kpenzalaɣ yɔɔ se: “Ka-hɩɖɛ lɛ Yohanɛɛsɩ.” Nɛ alɩwaatʋ ndʋ tɩ-taa lɛ, ɛɖaɣnɩ paɣzʋʋ yɔɔdʋʋ. Yuudee ɛyaa kpeekpe nɩɩ pɩɣa ŋga kɔ-tɔm nɛ pɔpɔzʋʋ se: “Anɩ pɩɣa kanɛ kakaɣ kɛʋ?”

Pʋwayɩ lɛ, fezuu kiɖeɖeu tii Zakarii yɔɔ nɛ ɛyɔɔdɩ natʋ tɔm tʋnɛ: “Pasa Yehowa. Ɛlabɩ tamaɣ Abraham se ɛkaɣ tiyuu ñʋʋ yaɖʋ, Mesiya nɛ ɛya ɖa-ñʋʋ. Yohanɛɛsɩ kaɣ kɛʋ nayʋ nɛ ɛñɔɔzɩ nʋmɔʋ Mesiya.”

Piti nakʋyʋ ɖɔɖɔ kaalabɩ Elizaabɛɛtɩ hɔʋ taa tʋ weyi payaɣ-ɩ se Maarɩɩ yɔ e-wezuu caɣʋ taa. Yele nɛ ɖɩyɔɔdɩ pɩ-tɔm ñʋʋ ŋgʋ kɩkɔŋ yɔ kɩ-taa.