Gabrɩyɛɛlɩ wobi Maarɩɩ cɔlɔ

Pɛlɛ nɔɔyʋ kaawɛ Elizaabɛɛtɩ hɔʋ taa, payaɣ-ɩ se Maarɩɩ. Ɛɛwɛ Nazarɛɛtɩ tɛtʋ taa, Galilee egeetiye taa. Maarɩɩ kaawɛnɩ ɖaŋ nɔɔyʋ, payaɣ-ɩ se Yosɛɛfʋ nɛ ɛɛkɛ kafɩnda. Elizaabɛɛtɩ kaawɛnɩ hoɣa nɛ pɩla fenasɩ 6 lɛ, tiyiyu Gabrɩyɛɛlɩ wolo Maarɩɩ cɔlɔ nɛ eheyi-i se: “Ŋlɩwa lɛ, Maarɩɩ. Yehowa wazɩ-ŋ siŋŋ.” Maarɩɩ taanɩɩ ɛ-tɔm ndʋ tɩ-taa. Peeɖe Gabrɩyɛɛlɩ heyi-i se: “Ŋkaɣ haɣʋ hoɣa nɛ ŋlʋlɩ abalɩbɩɣa nɛ ŋyaa-kɛ se Yesu. Kakaɣ kɛʋ Wiyaʋ. Ke-Kewiyaɣ kaɣ wɛʋ tam.”

Maarɩɩ cosi-i se: “Maasɩŋ abalʋ. Ɛzɩma manpɩzɩɣ nɛ malʋlɩ pɩɣa?” Gabrɩyɛɛlɩ cosi-i se: “Nabʋyʋ fɛyɩ Yehowa kaɖɛ. Fezuu kiɖeɖeu kaɣ tibu ñɔ-yɔɔ nɛ ŋhaɣ hoɣa. Ñɔ-hɔʋ taa tʋ Elizaabɛɛtɩ haɣ hoɣa ɖɔɖɔ.” Peeɖe Maarɩɩ cosaa se: “Mɛnkɛ Yehowa yom. Pɩlabɩ-m ɛzɩ ŋyɔɔdʋʋ yɔ.”

Maarɩɩ wolo Elizaabɛɛtɩ cɔlɔ, tɛtʋ ndʋ tɩɩwɛ piyaɣ yɔɔ yɔ tɩ-taa. Maarɩɩ talaa nɛ ɛsɛɛ Elizaabɛɛtɩ lɛ, ɛlɛ nɩɩ ɛ-pɩɣa ciɣdi e-lotu taa. Fezuu kiɖeɖeu tii ɛ-yɔɔ nɛ ɛyɔɔdɩ se: “Maarɩɩ, Yehowa wazɩ-ŋ siŋŋ. Pɩkɛnɩ-m hɩɖɛ ɖʋʋ se man-Kɩbaɣlʋ ɖoo kɔm mɛn-tɛ.” Maarɩɩ cosi se: “Mansaŋ Yehowa nɛ ma-laŋɩyɛ pilim.” Nɛ Maarɩɩ caɣ Elizaabɛɛtɩ cɔlɔ fenasɩ 3. Pʋwayɩ lɛ, ɛpɩsɩ nɛ ekpe ɛ-tɛ Nazarɛɛtɩ.

Yosɛɛfʋ nɩwa se Maarɩɩ haɣ hoɣa lɛ, ɛla lɩmaɣza se ɛɛtasɩɣ-ɩ kpaɣʋ halʋ. Ɛlɛ tiyiyu nɔɔyʋ heyi-i ɖoziye taa se: “Sɔɔndʋ ɛtaakpa-ŋ. Kpaɣ-ɩ nɛ ɛpɩsɩ ña-halʋ. Ɛtɩla kɩwɛɛkɩm nabʋyʋ.” Pɩla mbʋ nɛ Yosɛɛfʋ kpaɣ Maarɩɩ nɛ ewoni-i ɛ-tɛ nɛ ɛpɩsɩ ɛ-halʋ.