Ɛsɔ tiyiyaa susi Yesu lʋlʋʋ tɔm

Roma kewiyaɣ wiyaʋ Sezaarɩ Ogusti kaaɖʋ paɣtʋ se paa Yuuda tʋ weyi lɛ ɛpɩsɩ ɛ-tɛtʋ taa nɛ pama ɛ-hɩɖɛ. Pʋyɔɔ Yosɛɛfʋ kpaɣ Maarɩɩ nɛ powolo Bɛtɩlɛhɛm, ɖenɖe ɛ-cɔzɔnaa lɩnaa yɔ. Alɩwaatʋ ndʋ tɩ-taa lɛ, pɩɩkazɩ pazɩ se Maarɩɩ ɛlʋlɩ.

Patalɩ Bɛtɩlɛhɛm tɛtʋ taa lɛ, kalakʋ nakʋyʋ taa papɩzaa nɛ pehiɣ lone. Peeɖe Maarɩɩ lʋlɩ ɛ-pɩyalʋ Yesu. Ɛhɔkɩ-ɩ pɩsaʋ hɔɔlasɩ taa nɛ ɛhɩzɩ-ɩ ɖenɖe paɖʋʋ kpɩna tɔɔnaɣ yɔ.

Ninɖiɣyaa nabɛyɛ kaawɛɛ nɛ peɖiyiɣ pa-kpɩna Bɛtɩlɛhɛm cɔlɔ kpam ɖoo ana a-taa. Nɛ tuda lɛ, Ɛsɔ tiyiyu nɔɔyʋ lɩɩ nɛ ɛsɩŋ pɔ-cɔlɔ nɛ Yehowa samtʋ ñandɩ pɔ-cɔlɔ kpɛɛɛ. Nɛ sɔɔndʋ kpa ninɖiɣyaa mba, ɛlɛ Ɛsɔ tiyiyu heyi-wɛ se: “Sɔɔndʋ ɛtaakpa-mɩ. Mɔnkɔnɩ-mɩ tɔm kɩbandʋ natʋyʋ. Sɔnɔ palʋlɩ Mesiya Bɛtɩlɛhɛm tɛtʋ taa.” Alɩwaatʋ ndʋ tɩ-taa lɛ, Ɛsɔ tiyiyaa sakɩyɛ lɩɩ ɛsɔdaa, nɛ pɔyɔɔdʋʋ se: “Pasa Ɛsɔ ɛsɔdaa, nɛ tɛtʋ yɔɔ lɛ laŋhɛzɩyɛ wɛɛ.” Pʋwayɩ lɛ, tiyiyaa mba pamʋʋ. Ninɖiɣyaa mba panɩ mbʋ lɛ, ɛbɛ palaba?

Peheyi ɖama se: “Ðɩkʋyɩ nɛ ɖɩɖɛɛ Bɛtɩlɛhɛm kpaagbaa.” Nɛ pakʋyɩ lɛɛ lɛɛ nɛ powolo nɛ pana Yosɛɛfʋ nɛ Maarɩɩ nɛ pɩɣa ɛjam, pahɩzɩ-kɛ ɖenɖe paɖʋʋ kpɩna tɔɔnaɣ yɔ.

Nɛ mba payɩ panɩ tɔm ndʋ Ɛsɔ tiyiyu heyi ninɖiɣyaa yɔ pɩɖɩɣzɩ-wɛ siŋŋ. Maarɩɩ maɣzɩ tɔm ndʋ Ɛsɔ tiyiyu yɔɔdaa yɔ tɩ-yɔɔ siŋŋ nɛ ɛtɩsɔɔ-tʋ wiɖiyi. Ninɖiɣyaa pɩsaɣ pa-kpɩna cɔlɔ lɛ, pɛwɛɛ nɛ pɛsɛɣ Yehowa se ɛlabaɣ lɛ, mbʋ payɩ panawa nɛ ndʋ payɩ panɩwa yɔ tɩ-yɔɔ.