Yehowa kandɩyɩ Yesu yɔɔ

Ɛjaɖɛ naɖɩyɛ kaawɛ Izrayɛɛlɩ wɩsɩ ɖɩlɩyɛ taa kiŋ, nɛ ɖɩ-taa ɛyaa maɣzaɣ se tɩɩnzɩ pɩzɩɣ nɛ siɖiyi-wɛ. Ðoo naayɛ taa, abalaa nabɛyɛ na nabʋyʋ ɛsɔdaa, pɩwɛ ɛzɩ tɩɩŋa ŋga kañɩlɩsɩɣ yɔ nɛ pɩwɛɛ nɛ pɩɖɔŋ ɛsɔdaa, nɛ patɩŋ pɩ-wayɩ. Abalaa mba, paalɩnɩ Wɩsɩ ɖɩlɩyɛ taa. Nɛ «tɩɩŋa» ŋga, kowoni-wɛ Yeruzalɛm. Patalɩ Yeruzalɛm lɛ, papaɣzɩ ɛyaa pɔzʋʋ se: “Le pɩɣa ŋga kakaɣ kɛʋ Yuuda mba wiyaʋ yɔ kɛwɛɛ? Ðɩkɔm se ɖɩsɛɛ-kɛ.”

Yeruzalɛm Wiyaʋ Eroodi nɩ wiyaʋ kɩfalʋ tɔm lɛ, sɔɔndʋ paɣzɩ-ɩ kpaʋ. Ɛpɔzɩ cɔjɔnaa sɔsaa se: “Le pɔyɔɔdaa se pakaɣ wiyaʋ ɛnʋ lʋlʋʋ?” Pocosi-i se: “Nayaa tɔm se pakaɣ-ɩ lʋlʋʋ Bɛtɩlɛhɛm.” Eroodi nɩ mbʋ lɛ, eheyi Wɩsɩ ɖɩlɩyɛ taa abalaa mba se: “Iwolo Bɛtɩlɛhɛm nɛ ɩñɩnɩ pɩɣa ŋga. Ɩna-kɛ lɛ, ɩpɩsɩ nɛ ɩkɔɔ nɛ iheyi-m ɖenɖe kɛwɛɛ yɔ. Ma ɖɔɖɔ mɔnsɔɔlaa se mowolo nɛ mɛnsɛɛ-kɛ.” Ɛlɛ Eroodi kaawɛɛ nɛ ɛcɛtɩɣ kɩcɛtʋ.

Tɩɩŋa ŋga, kaɖaɣnɩ paɣzʋʋ ɖɔm nɛ abalaa mba patɩŋ ka-wayɩ nɛ patalɩ Bɛtɩlɛhɛm. Patalɩ peeɖe lɛ, tɩɩŋa ŋga kasɩŋ ɖɩɣa nakɛyɛ ñʋʋ taa nɛ abalaa mba, pɛɖɛɛ pasʋʋ ɖɩɣa ŋga ka-taa. Pana Yesu nɛ e-ɖoo Maarɩɩ. Poluŋ nɛ pɛsɛɛ Yesu nɛ palabɩ-ɩ kʋjɔŋ: sika, tɩlaaɖɩ kʋhʋlʋmʋʋ nɛ num mbʋ payaɣ se miiri yɔ. Ɛlɛ ɛzɩ Yehowa tiyini abalaa mba se powolo Yesu cɔlɔ? Aayɩ!

Ðoo ana a-taa Yehowa heyi Yosɛɛfʋ ɖoziye naɖɩyɛ taa se: “Eroodi ñɩnɩɣ se ɛkʋ Yesu. Kpaɣ ña-halʋ nɛ ña-pɩɣa nɛ ise ɩɖɛɛ Ejipiti. Ɩcaɣ peeɖe pɩkɔɔ nɛ pɩsɩɩnɩ alɩwaatʋ ndʋ meheyiɣ-mɩ se ɩpɩsɩ yɔ.” Kpaagbaa mbʋ lɛ, Yosɛɛfʋ kpaɣ ɛ-hɔʋ nɛ pɛɖɛɛ Ejipiti.

Yehowa heyi abalaa mba se pataapɩsɩ Eroodi cɔlɔ. Eroodi nawa se abalaa mba, paapɩsɩɣ ɛ-cɔlɔ lɛ, ɛkɔ pana siŋŋ. Ɛnɩ pɩ-taa se ɛɛpɩzɩɣ nɛ ɛna Yesu lɛ, ɛɖʋ paɣtʋ se pakʋ abalɩbiya nzɩ sɩwɛnɩ Yesu pɩnzɩ yɔ sɩ-tɩŋa Bɛtɩlɛhɛm tɛtʋ taa. Ɛlɛ Yesu ñɛtɛm wɛʋ ɖooo Ejipiti.

Eroodi sɩba lɛ, Yehowa heyi Yosɛɛfʋ se: “Lɛɛlɛɛyɔ, ɩpɩzɩɣ nɛ ɩpɩsɩ.” Yosɛɛfʋ, Maarɩɩ nɛ Yesu papɩsɩ Izrayɛɛlɩ nɛ pacaɣ Nazarɛɛtɩ tɛtʋ taa.