Yesu pɩsɩ Mesiya

Yohanɛɛsɩ kaawɛɛ nɛ esusuu se: “Weyi ɛkɩlɩ-m yɔ, eɖiɣni kɔm.” Yesu kaawɛnɩ pɩnzɩ ɛzɩ 30 mbʋ yɔ lɛ, ɛkʋyɩ Galilee nɛ ewolo Yɔɔrdaŋ Pɔɔ taa, ɖenɖe Yohanɛɛsɩ kaawɛɛ nɛ ɛmɩyɩsɩɣ ɛyaa lɩm yɔ. Yesu ñɩnaɣ se Yohanɛɛsɩ ɛmɩyɩsɩ-ɩ lɩm. Ɛlɛ Yohanɛɛsɩ pɩsɩnɩ-ɩ se: “Pɩtɩkɛ ma pɩwɛɛ se mamɩyɩsɩ-ŋ lɩm. Ɛlɛ ña pɩwɛɛ se ŋmɩyɩsɩ-m lɩm.” Peeɖe Yesu pɩsɩnɩ-ɩ se: “Yehowa sɔɔlaa se ŋmɩyɩsɩ-m lɩm.” Pɩla mbʋ nɛ petii Yɔɔrdaŋ Pɔɔ taa, nɛ Yohanɛɛsɩ mɩyɩsɩ Yesu lɩm.

Yesu lɩnɩ lɩm tɛɛ lɛ, ɛla adɩma. Alɩwaatʋ ndʋ tɩ-taa, ɛsɔdaa tʋlɩ nɛ fezuu kiɖeɖeu tii Yesu yɔɔ ɛzɩ ehooye yɔ. Pʋwayɩ lɛ, Yehowa yɔɔdɩnɩ ɛsɔdaa nɛ ɛtɔ se: «Ŋkɛ man-Pɩyalʋ, weyi mɔnsɔɔlɩ-ɩ yɔ; ñɔ-tɔm kɛdɩnɩ-m.»

Yehowa fezuu tibi Yesu yɔɔ lɛ, ɛpɩsɩ Krɩstʋ yaa Mesiya. Lɛɛlɛɛyɔ, ɛpaɣzɩɣ labʋ tʋmɩyɛ nɖɩ ɖɩ-yɔɔ Yehowa tiyi-i tɛtʋ yɔɔ yɔ.

Patɩɩmɩyɩsɩ Yesu lɩm nɛ pɩtɛ lɛ, ewolo kañɩmbusuu taa nɛ ɛcaɣ peeɖe kɩyakɩŋ 40. Ɛpɩsaa nɛ ɛkɔɔ lɛ, ewolo Yohanɛɛsɩ cɔlɔ. Yesu kaawɛɛ nɛ ɛɖɔŋ nɛ ɛñɔtʋʋnɩ Yohanɛɛsɩ lɛ, Yohanɛɛsɩ tɔ se: “Ɩɩnaɣ Ɛsɔ Heɣa ŋga kahɩzɩɣ ɛjaɖɛ kɩwɛɛkɩm yɔ.” Yohanɛɛsɩ yɔɔdɩ mbʋ se piyele nɛ samaɣ na se Yesu kɛnɩnɩ Mesiya. Ŋsɩm mbʋ pɩtalɩ Yesu alɩwaatʋ ndʋ ɛɛwɛ kañɩmbusuu taa yɔ? Yele nɛ ɖɩyɔɔdɩ pɩ-tɔm.