Yesu lɩzɩ apostoloowaa 12

Yesu susi tɔm nɛ pɩla ɛzɩ pɩnaɣ nɛ hɔɔlʋʋ mbʋ yɔ lɛ, pɩpɔzɩ se ɛkpaɣ lɩmaɣzɩyɛ sɔsɔɖɛ naɖɩyɛ. Mba ɛkaɣ lɩzʋʋ se pasɩnɩ-ɩ tʋmɩyɛ labʋ? Mba ɛkaɣ falɩsʋʋ se pɛɖɛɛ nɔɔ Krɩstʋ ɛgbɛyɛ taa? Pʋcɔ nɛ Yesu kpaɣ lɩmaɣzɩyɛ sɔsɔɖɛ nɖɩ lɛ, pɩɩwɛɛ se Yehowa ɛsɩnɩ-ɩ. Pʋyɔɔ ɛkpa pʋʋ nakʋyʋ yɔɔ e-ɖeke nɛ ɛla adɩma ɖoo pilim. Tɛʋ fema lɛ, Yesu yaa ɛ-tɔmkpɛlɩkɩyaa nabɛyɛ nɛ ɛlɩzɩ pa-taa apostoloowaa 12. Ŋtɔzʋʋ pa-taa nabɛyɛ hɩla yɔɔ? Pa-hɩla yɔ: Pɩyɛɛrɩ, Andree, Yakubu, Yohanɛɛsɩ, Filiipu, Bartelemii, Tomaa, Maatiyee, Alfee pɩyalʋ Yakubu, Taadee, Siimɔɔ nɛ Yudaasɩ Isɩkarɩyɔɔtɩ.

Apostoloowaa 12 waa panɛ, pa nɛ Yesu pakaɣnɩ nʋmɔʋ ɖɔm. Ɛfalɩsɩ-wɛ nɛ pɩtɛ lɛ, etiyi-wɛ se powolo nɛ posusi tɔm. Yehowa ha-wɛ ɖoŋ se pɔɖɔɔnɩ aleewaa nɛ pawaa kʋdɔmɩŋ.

Yesu ta apostoloowaa 12 waa mba liu nɛ ɛyaa-wɛ se ɛ-taabalaa. Farɩsɩ mba maɣzaɣ se apostoloowaa kɛ ɛyaa mba patɩla sukuli nɛ pɛ-ɛsa tikuli yɔ. Ɛlɛ Yesu ñafalɩsɩ-wɛ se pala tɔm susuu tʋmɩyɛ camɩyɛ. Pakaɣ wɛʋ Yesu cɔlɔ e-wezuu caɣʋ taa alɩwaatʋ ndʋ tɩ-tɔm kɩlɩ cɛyʋʋ yɔ tɩ-taa, ɛzɩ alɩwaatʋ ndʋ ɛ-sɩm ñɔtaa yɔ nɛ e-femtu wayɩ. Yesu apostoloowaa 12 waa mba pa-taa sakɩyɛ kaakɛ Galilee mba ɛzɩ ɛ-maɣmaɣ yɔ. Pa-taa nabɛyɛ kpaɣ halaa.

Apostoloowaa kaakɛ ɛyaa mantɩtalɩ pilimwaa nɛ picoɖaɣ-wɛ. Nabʋyʋ taa lɛ, pataamaɣzɩɣ tɔm ndʋ pacaɣ yɔɔdʋʋ yɔ tɩ-yɔɔ camɩyɛ nɛ pakpakaɣ lɩmaɣza kɩdɛkɛda. Alɩwaatʋ natʋyʋ taa lɛ, pa-lakasɩ wɩlaɣ se pɛfɛyɩnɩ suuɖu. Halɩ nabʋyʋ taa poyowaɣ se pana se akɛ sɔsɔ pa-taa. Ɛlɛ paa mbʋ yɔ, paakɛ ɛyaa kɩbama, nɛ paasɔɔlɩ Yehowa. Mba kɛnɩ Krɩstʋ ɛgbɛyɛ tigiɖe alɩwaatʋ ndʋ Yesu kpa ɛsɔdaa yɔ.