Pɩyɛɛrɩ kpɛzaa se ɛɛsɩŋ Yesu

Yesu nɛ ɛ-apostoloowaa paawɛ ɛsɔdaa kuduyuu ŋgʋ kɩ-tɛɛ paatɔɔ Paska yɔ lɛ, eheyi-wɛ se: “Mɩ-tɩŋa payɩ ɩkaɣ seu nɛ eyele men-ɖeke ɖoo anɛ.” Ɛlɛ Pɩyɛɛrɩ yɔɔdɩ se: “Aayɩ! Paa lalaa iseɣ se peyebi-ŋ yɔ, ma lɛ, maakaɣ seu nɛ meyebi-ŋ kpa.” Ɛlɛ Yesu heyi Pɩyɛɛrɩ se: “Pʋcɔ nɛ kalɩmaʋ koo lɛ, ŋkaɣ kpɛzʋʋ tam nabudozo se ŋŋsɩŋɩ-m.”

Alɩwaatʋ ndʋ sɔɔjanaa kpa Yesu nɛ powokini-i Kayifu ɖɩɣa taa yɔ, apostoloowaa sakɩyɛ kaasewa. Apostoloowaa 2 ɖeke kaatɩŋnɩ pa-wayɩ. Pa-taa lɛlʋ lɛ Pɩyɛɛrɩ. Ɛɖɔm nɛ ewolo Kayifu ɖɩɣa taa nɛ ehoyuu miŋ kadaɣ taa. Miŋ ɛnɩ eyebina nɛ pɛlɛ lɩmɖʋyʋ nɔɔyʋ cɔnɩ Pɩyɛɛrɩ ɛsɩndaa nɛ eheyi-i se: “Mansɩmɩ-ŋ! Ña nɛ Yesu ɛɖɔŋaɣna!”

Pɩyɛɛrɩ cosi se: “Aayɩ, pɩtɩkɛ ma! Maasɩŋ ndʋ ŋyɔɔdʋʋ yɔ!” Ɛɖɔ nɛ ɛlɩɩnɩ nɔnɔɔ yɔɔ kiŋ. Nɛ pitileɖi lɛ, pɛlɛ lɩmɖʋyʋ lɛlʋ ɖaɣnɩ-ɩ naʋ nɛ eheyi samaɣ se: “Abalʋ ɛnɛ, Yesu wayɩ tɩŋɩyʋ lɛlʋ ɛkɛnaa!” Pɩyɛɛrɩ tasɩ yɔɔdʋʋ se: “Maatɩɩsɩŋ Yesu ɛnʋ!” Abalʋ nɔɔyʋ kitina se: “Yesu wayɩ tɩŋɩyaa taa kʋɖʋm ŋkɛnaa. Ñɔ-yɔɔdaɣ wɩlɩɣ se ŋkɛ Galilee tʋ ɛzɩ Yesu yɔ.” Nɛ Pɩyɛɛrɩ ɖuu nɛ ɛyɔɔdɩ se: “Maasɩŋɩ-ɩ kpa!”

Alɩwaatʋ ndʋ lɛ, kalɩmaʋ nakʋyʋ koo. Pɩyɛɛrɩ na Yesu kisaa nɛ ɛcɔnɩ-ɩ. Peeɖe ɛtɔzɩ tɔm ndʋ Yesu kaaheyi-i yɔ tɩ-yɔɔ nɛ ɛlɩɩ awayɩ nɛ ewii cɔɔɔ.

Pɩlakaɣ mbʋ lɛ, Sahedrɛɛ taa mba kaawoni Yesu Kayifu ɖɩɣa taa nɛ pahʋʋnɩ-ɩ tɔm. Palabɩ lɩmaɣza se pakʋʋ Yesu ɛlɛ paanaɣ se pawaanɩ suwe nɛ pakʋ-ɩ, mbʋ pʋyɔɔ yɔ patɩna kɩwɛɛkɩm nabʋyʋ ɛ-yɔɔ. Peeɖe lɛ, Kayifu pɔzɩ Yesu se: “Ñɛkɛnɩ Ɛsɔ Pɩyalʋ?” Yesu cosi se: “Ɛɛɛ.” Kayifu yɔɔdɩ se: “Ɛyɔɔdɩ tɔm kɩdɛkɛdɩtʋ Ɛsɔ yɔɔ! Aseɣɖe tɔm ndʋ ɖɩtasɩɣ ñɩnʋʋ ɖɔɖɔ yɔ?” Tɔm hʋyaa lalaa tisi ɛ-tɔm yɔɔ nɛ pɔtɔ se: “Abalʋ ɛnɛ ɛmʋnɩ sɩm.” Pɛcɛ Yesu kadanzɩ, pɔtɔ ɛ-yɔɔ ndaatʋ, pohuuzi ɛ-ɛsa yɔɔ nɛ pamakɩ-ɩ nɛ pɔtɔŋ se: “Ye ŋkɛnɩ nayʋ kɔyɔ, heyi-ɖʋ weyi ɛmabɩ-ŋ yɔ!”

Tɛʋ fema lɛ, powoni Yesu Sahedrɛɛ kʋjɔŋ tɛɛ nɛ paɖaɣnɩ-ɩ pɔzʋʋ se: “Ñɛkɛnɩ Ɛsɔ Pɩyalʋ?” Yesu cosi se: “Mɩyɔɔdʋʋna se mɛnkɛ Ɛsɔ Pɩyalʋ.” Lɛɛlɛɛyɔ, pa-naʋ taa lɛ, tɔm ndʋ Yesu yɔɔdɩ mbʋ yɔ, tɩwɩlɩɣ se ɛyɔɔdɩ tɔm kɩdɛkɛdɩtʋ Ɛsɔ yɔɔ, pʋyɔɔ pakpaɣ-ɩ nɛ powoni-i Roma mba wiyaʋ lone taa caɣyʋ Pɔɔnsɩ Pilaatɩ cɔlɔ. Ɛbɛ labɩ pʋwayɩ? Pɩ-tɔm ɖɩkaɣ yɔɔdʋʋ.