Yesu sɩbɩ Goligota

Cɔjɔnaa sɔsaa woni Yesu Pilaatɩ cɔlɔ. Pilaatɩ pɔzɩ-wɛ se: «Ɩtɔŋ se abalʋ ɛnɛ ɛwɛɛkɩ we?» Pocosi-i se: “Ɛtɔm se ɛkɛ wiyaʋ!” Pilaatɩ pɩsɩnɩ Yesu yɔɔ nɛ ɛpɔzɩ-ɩ se: «Ñɛkɛnɩ Yuuda mba Wiyaʋ yaa we?» Yesu cosi-i se: «Men-Kewiyaɣ tɩkɛ ɛjaɖɛ ɖɩnɛ ɖɩ-hɔɔlʋʋ nakʋyʋ.»

Pʋwayɩ lɛ, Pilaatɩ yele nɛ powoni Yesu Eroodi weyi ɛkɛ Galilee egeetiye yɔɔ cɔnɩyʋ yɔ, ɛ-cɔlɔ se ɛlɛ ɛñɩnɩ nɛ ɛna se ɛlabɩ kɩwɛɛkɩm nabʋyʋ yaa we. Ɛlɛ Eroodi tɩna kɩwɛɛkɩm nabʋyʋ Yesu yɔɔ nɛ ɛpɩsɩnɩ-ɩ Pilaatɩ cɔlɔ. Pilaatɩ heyi samaɣ se: “Ma nɛ Eroodi ɖɩtɩna kɩwɛɛkɩm nabʋyʋ abalʋ ɛnɛ ɛ-yɔɔ. Meyeki-i nɛ ɛɖɛɛ.” Samaɣ koo nɛ kɔtɔ se: “Kʋ-ɩ! Kʋ-ɩ!” Sɔɔjanaa kpaɣ ɛgbazɩyɛ nɛ polu Yesu, pɔtɔ ɛ-yɔɔ ndaatʋ nɛ pamabɩ-ɩ. Papamɩ-ɩ awiya hulaɣ ŋga palʋnɩ sɔɔ yɔ nɛ pohoŋuu-i nɛ pɔyɔɔdʋʋ se: “Ðɩha-ŋ sɛtʋ, Yuuda mba Wiyaʋ.” Pilaatɩ tasɩ samaɣ heyuu se: “Mantɩna kɩwɛɛkɩm nabʋyʋ abalʋ ɛnɛ ɛ-yɔɔ.” Pokoo ɛ-yɔɔ nɛ pɔyɔɔdɩ se: «Kamɩ-ɩ sizika yɔɔ!» Pɩtɛzɩnaa se Pilaatɩ ɖʋzɩ Yesu pe-nesi tɛɛ se pakʋ-ɩ.

Powoni Yesu lone nɖɩ payaɣ se Goligota yɔ ɖɩ-taa lɛ, pakamɩ-ɩ sizika yɔɔ nɛ pakʋsɩ sizika ŋga nɛ pesiɣ. Yesu tɩmnɩ Ɛsɔ se: “Caa, kpeɣ-wɛ, mbʋ pʋyɔɔ yɔ paasɩŋ mbʋ palakɩ yɔ.” Ɛyaa hoŋuu Yesu nɛ pɔyɔɔdʋʋ se: “Ye ŋkɛ Ɛsɔ Pɩyalʋ toovenim yɔ, tii sizika yɔɔ! Ya ña-maɣmaɣ ña-ñʋʋ lɛ.”

Mɩlaa mba paakam Yesu cɔlɔ yɔ, pa-taa lɛlʋ heyi-i se: «Tɔzɩ mɔ-yɔɔ alɩwaatʋ ndʋ ŋsʋʋ ñe-Kewiyaɣ taa yɔ.» Yesu pɩsɩnɩ-ɩ se: «Ma nɛ ŋ ɖɩkaɣnɩ wɛʋ Paradisuu taa.» Pɩtalɩ wɩsɩ wɛlʋʋ lɛ, cɩkpɛndʋʋ nakʋyʋ yu ɛjaɖɛ tɩŋa taa nɛ pileɖi ɛzɩ ñɩɣtʋ 3 mbʋ yɔ. Yesu tɔmkpɛlɩkɩyaa nabɛyɛ kaasɩŋ sizika cɔlɔ, pa-taa lɛlʋ lɛ Yesu ɖoo Maarɩɩ. Yesu heyi Yohanɛɛsɩ se ɛcɔnɩ Maarɩɩ yɔɔ ɛzɩ e-ɖoo maɣmaɣ yɔ.

Pɩkɛdaa lɛ, Yesu yɔɔdɩ se: «Pɩtɩŋa pɩlaba!» Yesu sɔ ɛ-ñʋʋ nɛ etisi fezuu kɛdɛzaɣ ñɩŋgʋ. Peeɖe lɛ, tɛtʋ ñamsɩ siŋŋ. Templo taa lɛ, pɩsaʋ kikenduu ŋgʋ kɩtayɩɣ Lone Kiɖeɖeye nɛ Lone Kiɖeɖeye nɖɩ ɖɩkpaɖaa yɔ pɛ-hɛkʋ taa yɔ, kɩcɩyɩ kpaɣnɩ hayo nɛ pitii pɩ-tɛɛ. Sɔɔja weyi ɛɛwɛ peeɖe yɔ ɛna mbʋ lɛ, ɛyɔɔdɩ se: “Ɛnɛ ɛkɛ Ɛsɔ Pɩyalʋ toovenim.”