Yesu lɩzɩ ɛ-tɩ nɛ ɛwɩlɩ kpakpasɩ kpayaa

Yesu lɩzɩ ɛ-tɩ nɛ ɛwɩlɩ apostoloowaa nɛ pɩla alɩwaatʋ pazɩ lɛ, Pɩyɛɛrɩ wolo se ɛkpaɣ kpakpasɩ Galilee Teŋgu taa. Ɛ nɛ Tomaa, Yakubu, Yohanɛɛsɩ nɛ tɔmkpɛlɩkɩyaa lalaa paawobina. Pɔlɔ piyuu ɖoo kpeekpe, ɛlɛ patɩkpa kpakpayaɣ nakɛyɛ.

Pɩtalɩ tanaŋ tɛɛ cu lɛ, pana abalʋ nɔɔyʋ, ɛsɩŋ kidiiliŋ yɔɔ. Abalʋ ɛnʋ ɛyaa-wɛ nɛ ɛpɔzɩ-wɛ se: “Ɩpɩzaa nɛ ɩkpa kpakpasɩ na?” Pocosi-i se: «Aayɩ.» Nɛ abalʋ ɛnʋ eheyi-wɛ se: “Ɩlɔ mi-piyuu kpɩyʋʋ nɩwaŋ yɔɔ.” Pɔlɔ piyuu lɛ, pakpa kpakpasɩ sakɩyɛ, pisu piyuu taa nɛ pɔhɔŋ-kʋ se palɩzɩ paapɩzɩɣ. Yohanɛɛsɩ na kpaagbaa se abalʋ ɛnʋ ɛkɛ Yesu nɛ ɛyɔɔdɩ se: «Kɩbaɣlʋ na!» Kpaagbaa mbʋ lɛ, Pɩyɛɛrɩ kʋyɩ nɛ ɛmaa lɩm taa nɛ ɛya nɛ ɛlɩɩ Yesu cɔlɔ kidiiliŋ yɔɔ. Yesu tɔmkpɛlɩkɩyaa lalaa saa kpɩyʋʋ nɛ patɩŋ ɛ-wayɩ.

Palɩ kidiiliŋ yɔɔ lɛ, panaɣ kpɔnɔ nɛ kpakpasɩ nasɩyɩ miŋ yɔɔ. Yesu heyi-wɛ se pɔkɔnɩ kpakpasɩ nzɩ pakpawa yɔ sɩ-taa nasɩyɩ nɛ pɔsɔzɩ tɔɔnaɣ yɔɔ. Nɛ eheyi-wɛ se: «Ɩkɔɔ nɛ ɩlɩzɩ sɔntɔ.»

Pɛtɛm sɔntɔ lɩzʋʋ lɛ, Yesu pɔzɩ Pɩyɛɛrɩ se: “Ŋsɔɔlɩ-m nɛ pɩkɩlɩ kpakpasɩ kpaʋ na?” Pɩyɛɛrɩ cosi se: “Ɛɛɛ, Kɩbaɣlʋ ña-maɣmaɣ ŋnawa se mɔnsɔɔlɩ-ŋ.” Yesu kitini-i se: “Ye mbʋ, calɩ me-heɣsi.” Yesu tasɩ-ɩ pɔzʋʋ se: “Pɩyɛɛrɩ, ŋsɔɔlɩ-m?” Pɩyɛɛrɩ cosi se: “Kɩbaɣlʋ, ña-maɣmaɣ ŋnawa se mɔnsɔɔlɩ-ŋ.” Yesu tɔ se: «Ðiyi me-heŋ cikpeŋ.». Yesu tasɩ-ɩ tɔm kʋɖʋmtʋ ndʋ pɔzʋʋ nabudozo ɖeɖe. Pɩyɛɛrɩ laŋɩyɛ wɛɛkɩ. Ecosi se: “Kɩbaɣlʋ, ŋsɩm pɩtɩŋa payɩ. Ŋnawa se mɔnsɔɔlɩ-ŋ.” Yesu pɩsɩnɩ-ɩ se: «Calɩ me-heŋ cikpeŋ.» Pʋwayɩ lɛ, eheyi Pɩyɛɛrɩ se: «Wɛɛ ma-wayɩ tɩŋʋʋ yɔɔ.»