Fezuu kiɖeɖeu tibi tɔmkpɛlɩkɩyaa yɔɔ

Yesu pɩsɩ ɛsɔdaa nɛ pɩla kɩyakɩŋ 10 lɛ, fezuu kiɖeɖeu tii ɛ-tɔmkpɛlɩkɩyaa yɔɔ. Pɩɩkɛ pɩnaɣ 33 tɛ Pantekooti kɩyakʋ wiye, nɛ ɛyaa kaalɩnɩ hɔɔlɩŋ ndɩ ndɩ taa nɛ pɔkɔɔ Yeruzalɛm se pɔtɔɔ Pantekooti kazandʋ ndʋ. Yesu tɔmkpɛlɩkɩyaa ɛzɩ 120 mbʋ yɔ kaakpeɣli ɛsɔdaa kuduyuu nakʋyʋ taa. Nɛ pɩkɛdaa lɛ, piti lakasɩ nasɩyɩ la tuda yem. Nabʋyʋ lɩ paa tɔmkpɛlɩkɩyʋ weyi lɛ ɛ-ñʋʋ taa ɛzɩ miŋ nzʋlʋmɩyɛ yɔ, nɛ papaɣzɩ yɔɔdʋʋ kʋnʋmɩŋ ndɩ ndɩ. Kɔkɔɖɛ naɖɩyɛ lɩɩnɩ ɛsɔdaa kiŋ, ɛzɩ helim sɔsɔm nabʋyʋ makʋʋ yɔ, nɛ ɖisu ɖɩɣa ŋga ka-taa paakpeɣlaa yɔ ka-taa.

Agɔma mba paalɩnɩ ajɛɛ lɛɛna taa nɛ pɔkɔɔ Yeruzalɛm yɔ, panɩ kɔkɔɖɛ nɖɩ ɖɩ-taŋ lɛ, pese powolo ɖenɖe tɔmkpɛlɩkɩyaa kaakpeɣlaa yɔ se pana se ɛbɛ ɖiɣni labʋ. Pɩɖɩɣzɩ agɔma mba siŋŋ se tɔmkpɛlɩkɩyaa wɛɛ nɛ pɔyɔɔdʋʋ kʋnʋmɩŋ ɛnɩ. Peeɖe pɔyɔɔdaa se: “Ɛyaa panɛ Galilee mba pɛkɛnaa. Pɩlabɩ ɛzɩma nɛ pɔyɔɔdʋʋ ɖa-kʋnʋmɩŋ?”

Ðɩnɛ ɛlɛ, Pɩyɛɛrɩ nɛ apostoloowaa lalaa pakʋyɩ nɛ pasɩŋ samaɣ ɛsɩndaa. Pɩyɛɛrɩ heyi samaɣ ɛzɩma pakʋ Yesu nɛ Yehowa fezi-i nɛ sɩɖaa taa yɔ pɩ-tɔm. Pɩyɛɛrɩ yɔɔdaa se: “Lɛɛlɛɛyɔ, Yesu wɛ ɛsɔdaa, Ɛsɔ nesi kɩbanzɩ yɔɔ. Ɛnʋ labɩna nɛ fezuu kiɖeɖeu tii, ɛzɩ ɛɛyɔɔdʋʋ yɔ. Mbʋ yebina nɛ ɩnaɣ piti lakasɩ nzɩ siɖiɣni labʋ yɔ.”

Tɔm ndʋ Pɩyɛɛrɩ yɔɔdaa yɔ, titukuni samaɣ taa ɛyaa laŋa nɛ pɔpɔzɩ se: «Ɛbɛ pɩwɛɛ se ɖɩla?» Nɛ Pɩyɛɛrɩ cosi-wɛ se: “Ikpiɖi mɩ-kɩwɛɛkɩm yɔɔ nɛ iyele nɛ pamɩyɩsɩ-mɩ lɩm Yesu hɩɖɛ taa. Ɩkaɣ mʋʋ ɖɔɖɔ fezuu kiɖeɖeu.” Ɛyaa ɛzɩ 3000 mbʋ yɔ paamɩyɩsɩ lɩm kɩyakʋ ŋgʋ ki-wiye. Kpaɣnɩ puwiye lɛ, tɔmkpɛlɩkɩyaa paɣzɩ huuu lɛɛ lɛɛ Yeruzalɛm tɛtʋ taa. Fezuu kiɖeɖeu sɩnɩ apostoloowaa nɛ paɖʋ agbaa sakɩyɛ se pɩsa nɛ pawɩlɩ tɔmkpɛlɩkɩyaa mbʋ payɩ Yesu pɔzɩ-wɛ se pala yɔ.