Nabʋyʋ taapɩzɩɣ se pɩsɩnzɩ-wɛ

Abalʋ nɔɔyʋ cakaɣ templo nɔnɔɔ taa nɛ ɛsʋlʋmʋʋ ɛyaa liidiye; ɛkɛ kaakalaɣ. Ðanaɣ nakɛyɛ yɔɔ, abalʋ ɛnʋ ɛna Pɩyɛɛrɩ nɛ Yohanɛɛsɩ pasʋwaɣ templo taa. Nɛ eheyi-wɛ se: “Mentendi-mɩ, ɩha-m nabʋyʋ.” Pɩyɛɛrɩ cosi-i se: “Mɛwɛnɩ nabʋyʋ se mahaɣ-ŋ, nɛ pɩkpaɖɩ liidiye. Yesu hɩɖɛ taa lɛ, kʋyɩ nɛ ŋɖɔ.” Pɩyɛɛrɩ sɩnɩ-ɩ nɛ ɛkʋyɩ, nɛ ɛpaɣzɩ ɖɔm! Piti lakasɩ nzɩ sɩkɛdɩnɩ samaɣ pɩdɩɩfɛyɩ. Siyeba nɛ ɛyaa sakɩyɛ wɛɛnɩ tisuu.

Ɛlɛ cɔjɔnaa nɛ Saduki mba ñɔkɔ pana siŋŋ. Pakpa apostoloowaa mba, powoni-wɛ tɔm hʋyaa cɔlɔ nɛ pɔpɔzɩ-wɛ se: “Aha-mɩ ɖoŋ nɛ ɩwaa abalʋ ɛnʋ?” Pɩyɛɛrɩ cosi-wɛ se: “Yesu Krɩstʋ weyi ɩkʋwa yɔ, ɛnʋ hanɩ-ɖʋ ɖoŋ.” Ɛsɔ sɛtʋ ñʋndɩnaa ma kubuka se: “Ɩtaatasɩ yɔɔdʋʋ Yesu tɔm.” Ɛlɛ apostoloowaa cosi-wɛ se: “Ðɩɩpɩzɩɣ nɛ ɖiyele yɔɔdʋʋ ɛ-tɔm. Pɩpɔzʋʋ se ɖɩyɔɔdɩ-tʋ.”

Patiiyebi Pɩyɛɛrɩ nɛ Yohanɛɛsɩ lɛ, pɛɖɛɛ powolo tɔmkpɛlɩkɩyaa lalaa cɔlɔ nɛ pɛkɛdɩ-wɛ mbʋ pɩlaba yɔ. Pa-tɩŋa pala adɩma nɛ pɔpɔzɩ Yehowa se: “Ðitendi-ŋ, ha-ɖʋ abalɩtʋ nɛ ɖiwolo pɩ-yɔɔ nɛ ɖɩlakɩ ña-tʋmɩyɛ.” Nɛ Yehowa ha-wɛ e-fezuu kiɖeɖeu nɛ powolo pɩ-yɔɔ nɛ posusuu tɔm nɛ pawaɣ kʋdɔmɩŋ. Piyeba nɛ ɛyaa sakɩyɛ wɛɛnɩ tisuu. Pɩwɩzɩ Saduki mba nɛ pakpa apostoloowaa nɛ paɖɩɣ-wɛ salaka. Ɛlɛ ɖoo yuwa lɛ, Yehowa tiyi e-tiyiyu nɔɔyʋ nɛ ewolo ɛtʋlɩ salaka nɔnɔsɩ nɛ eheyi apostoloowaa mba se: “Ɩpɩsɩ templo taa nɛ ɩwɩlɩ tɔm peeɖe.”

Tɛʋ fema lɛ, powolo peheyi Ɛsɔ sɛtʋ ñʋndɩnaa, pʋ-tɔbʋʋ se tɔm ɖɩhʋyɛ sɔsɔɖɛ nɖɩ payaɣ se Sahedrɛɛ yɔ ɖɩ-taa mba se: “Patɩtʋlɩ salaka nɔnɔsɩ, ɛlɛ ɛyaa mba ɩkpawa yɔ, patɩtasɩ wɛʋ ka-taa. Peɖiɣni ɛyaa wɩlʋʋ tɔm templo taa!” Peeɖe paɖaɣnɩ kpaʋ apostoloowaa nɛ powoni Sahedrɛɛ ɛsɩndaa. Nɛ cɔjɔ kɩlɩm pɔzɩ-wɛ se: “Pɩcaɣ ɖiikizini-mɩ se ɩtaatasɩ wɩlʋʋ ɛyaa Yesu yɔɔ tɔm na?” Ɛlɛ Pɩyɛɛrɩ cosi-wɛ se: «Ɛsɔ pɩwɛɛ se ɖɩña ɛzɩ ɖa-ñʋʋdʋ yɔ, pɩtɩkɛ ɛyaa.»

Ɛsɔ sɛtʋ ñʋndɩnaa kɔ pana siŋŋ nɛ pañɩnɩɣ se pakʋ-wɛ. Ɛlɛ Farɩsɩ tʋ weyi payaɣ se Gamaalɩyɛɛlɩ yɔ, ɛkʋyɩ ɛsɩŋ pɛ-ɛsɩndaa nɛ eheyi-wɛ se: “Ɩkpa mɩ-tɩ nɛ mbʋ ɩcaɣ labʋ yɔ. Pɩtʋʋ fɛyɩ se Ɛsɔ wɛɛ nɛ ɛsɩɣnɩ-wɛ. Ɩsɔɔlaa se ɩlʋbɩnɩ Ɛsɔ?” Peeɖe pɔɖɔm ɛ-lɔŋ tasʋʋ yɔɔ nɛ peyele apostoloowaa nɛ pɛɖɛɛ. Ɛlɛ pʋcɔ nɛ peyebi-wɛ lɛ, polu-wɛ ɖaŋ nɛ patasɩ kam pa-ñʋŋ taa se peyele tɔm susuu. Ɛlɛ apostoloowaa tɩkpaɣ pɔ-tɔm ndʋ nɛ palabɩnɩ tʋmɩyɛ. Powobi pɩ-yɔɔ nɛ posusuu tɔm nɛ abalɩtʋ templo taa nɛ kpaɣ ɖɩɣa nɛ ŋwolo ɖɩɣa.