Fezuu kiɖeɖeu tibi Kɔɔrnɛɛyɩ yɔɔ

Roma sɔɔja sɔsɔ nɔɔyʋ kaawɛ Sezaaree tɛtʋ taa nɛ payaɣ-ɩ se Kɔɔrnɛɛyɩ. Ɛtɩkɛ Yuuda tʋ, ɛlɛ Yuuda mba ñaŋaɣ-ɩ. Ɛɛkɛ kʋjɔʋ tʋ, ɛsɩɣaɣnɩ kʋñɔndɩnaa nɛ mba pɛwɛ kɩcɛyɩm taa yɔ. Kɔɔrnɛɛyɩ kaawɛnɩ tisuu Yehowa yɔɔ nɛ ɛtɩmɩɣnɩ-ɩ ɖoŋ ɖoŋ. Kɩyakʋ nakʋyʋ lɛ, Ɛsɔ tiyiyu nɔɔyʋ yɔɔdɩnɩ-ɩ nɛ eheyi-i se: “Ɛsɔ welisi ña-adɩma. Tiyi nabɛyɛ Yopee tɛtʋ taa, ɖenɖe Pɩyɛɛrɩ wɛɛ yɔ, nɛ peheyi-i se ɛkɔɔ nɛ ɛna-ŋ.” Kpaagbaa mbʋ lɛ, Kɔɔrnɛɛyɩ tiyi abalaa 3 Yopee tɛtʋ taa. Tɛtʋ ndʋ, tɩɩwɛ Sezaaree nɛ hadɛ kiŋ, nɛ tiiposini Sezaaree ɛzɩ kilomɛtanaa 50 mbʋ yɔ.

Alɩwaatʋ ndʋ tɩ-taa lɛ, Pɩyɛɛrɩ kaawɛ Yopee nɛ ɛna natʋ natʋyʋ. Ɛna kpɩna ndɩ ndɩ wena paɖʋ paɣtʋ Yuuda ñɩma se pataatɔɔ yɔ. Nɛ ɛnɩɩ nɔɔ nakɛyɛ taŋ nɛ keheyi-i se ɛtɔɔ kpɩna ana a-nandʋ. Pɩyɛɛrɩ kizi nɛ ɛyɔɔdɩ se: “Wiɖiyi mantɩtɔɔ kpɩna wena afɛyɩ kele kele yɔ a-nandʋ.” Pʋwayɩ lɛ, nɔɔ ŋga keheyi-i se: “Taayɔɔdɩ se kpɩna ana afɛyɩ kele kele. Ɛsɔ yeba nɛ awɛɛ kele kele.” Peheyi Pɩyɛɛrɩ ɖɔɖɔ se: “Abalaa nabɛyɛ wɛ ñɔ-nɔnɔɔ taa, pɛkpɛndɩ 3. Tɩŋ pa-wayɩ.” Pɩyɛɛrɩ wolo nɔnɔɔ taa nɛ ɛpɔzɩ abalaa mba se ɛbɛ yɔɔ pɔkɔma? Pocosi-i se: “Roma sɔɔja sɔsɔ weyi payaɣ se Kɔɔrnɛɛyɩ yɔ, ɛnʋ tiyini-ɖʋ. Pɩpɔzʋʋ se ŋwolo ɛ-tɛ Sezaaree tɛtʋ taa.” Pɩyɛɛrɩ heyi abalaa mba se pasʋʋ ɛ-tɛ ɖoo ana. Tɛʋ fema lɛ, ɛ nɛ Yopee koobiya nabɛyɛ patɩŋ abalaa mba pa-wayɩ nɛ powolo Sezaaree.

Kɔɔrnɛɛyɩ tɩɩna Pɩyɛɛrɩ lɛ, eluŋ ɛ-nʋmbɔla yɔɔ. Ɛlɛ Pɩyɛɛrɩ heyi-i se: “Kʋyɩ! Mɛnkɛ ɛyʋ ɛzɩ ña yɔ. Ɛsɔ heyini-m se mɔnkɔɔ ñɛ-tɛ, paa Yuuda mba ɩɩsʋʋ sɩɩnaa layaa ɖɩsɩ taa yɔ. Lɛɛlɛɛyɔ, mentendi-ŋ, heyi-m mbʋ pʋyɔɔ ŋtiyaa se paya-m yɔ.”

Kɔɔrnɛɛyɩ heyi Pɩyɛɛrɩ se: “Sɔnɔ labɩ kɩyakɩŋ 4 yɔ, maawɛɛ nɛ mantɩmɩɣnɩ Ɛsɔ, nɛ tiyiyu nɔɔyʋ heyi-m se mentiyi nɛ paya-ŋ. Mentendi-ŋ, wɩlɩ-ɖʋ Yehowa tɔm.” Pɩyɛɛrɩ yɔɔdɩ se: “Manɩ pɩ-taa se Ɛsɔ ɛɛtʋkʋʋ ɛyaa taa. Ɛmʋʋ mba payɩ pɔsɔɔlaa se pɛsɛɛ-ɩ yɔ.” Pɩyɛɛrɩ wɩlɩ-wɛ tɔm sakɩyɛ Yesu yɔɔ. Pʋwayɩ lɛ, fezuu kiɖeɖeu tii Kɔɔrnɛɛyɩ nɛ mba payɩ paawɛ ɛ-cɔlɔ peeɖe yɔ pɔ-yɔɔ, nɛ pamɩyɩsɩ-wɛ lɩm.