Krɩstʋ mba tɔm talɩ ajɛɛ sakɩyɛ taa

Apostoloowaa ɖɔm paɣtʋ ndʋ Yesu ɖʋwa se posusi tɔm kɩbandʋ tɛtʋ kpeekpe yɔɔ yɔ tɩ-yɔɔ. Pɩnaɣ 47 taa, Antɩyɔɔsɩ koobiya tiyi Pɔɔlɩ nɛ Barnaabaasɩ se powolo nɛ posusi tɔm. Tɔm susuyaa kpekpeka tɩnaa mba, powolo Aazii Cikpeluu tɩŋa taa ɛzɩ Dɛɛrɩbee, Lisɩtrɩ nɛ Ikoniyɔm mbʋ yɔ.

Pɔɔlɩ nɛ Barnaabaasɩ posusi tɔm ɛyaa kpeekpe, paa patɩɩkɛ kʋñɔndɩnaa yaa ñɩm tɩnaa, piya yaa sɔsaa yɔ. Ɛyaa sakɩyɛ tisi Krɩstʋ yɔɔ toovenim tɔm yɔɔ. Alɩwaatʋ ndʋ Pɔɔlɩ nɛ Barnaabaasɩ posusaɣ tɔm Siiprɩ egeetiye ñʋʋdʋ Sɛrɩjiyuusi Poluusi yɔ, alɩfaa nɔɔyʋ ñaɣ pana se ɛsɩnzɩ pɔ-tɔm susuu. Peeɖe Pɔɔlɩ pɩsɩnɩ alɩfaa ɛnʋ ɛ-yɔɔ nɛ eheyi-i se: “Yehowa kaɣ ña-nɩŋgbaŋʋʋ hɔm.” Kpaagbaa mbʋ lɛ, alɩfaa ɛnʋ ɛpɩsɩ yʋlʋm. Egeetiye ñʋʋdʋ Poluusi na mbʋ lɛ, etisi pɔ-tɔm yɔɔ.

Pɔɔlɩ nɛ Barnaabaasɩ posusi tɔm paa le, kpaɣ ɖɩɣa nɛ ŋwolo ɖɩɣa, kɩyakɩŋ taa, habɛɛ yɔɔ nɛ sinaagɔɔgɩwaa taa. Pawa kaakalaɣ nakɛyɛ Lisɩtrɩ lɛ, ɛyaa mba paawɛ peeɖe nɛ pana piti lakasɩ nzɩ yɔ, pakpaɣ-wɛ ɛzɩ ɛsɔnaa yɔ, nɛ pañɩnaɣ se pɛsɛɛ-wɛ. Ɛlɛ Pɔɔlɩ nɛ Barnaabaasɩ pekizini-wɛ nɛ peheyi-wɛ se: “Ɛsɔ ɖeke pɩmʋnaa se ɩsɛɛ! Ða ɖɔɖɔ ɖɩkɛ ɛyaa ɛzɩ mɩ yɔ.” Pʋwayɩ lɛ, Yuuda mba nabɛyɛ kɔɔ nɛ pɛlɛɣzɩ samaɣ ŋga ka-lɩmaɣza nɛ kakʋyɩ Pɔɔlɩ yɔɔ. Samaɣ ŋga kayaɣ-ɩ pɛɛ nɛ kotuu-i nɛ kalɩzɩ-ɩ tɛtʋ wayɩ, kamaɣzaɣ se ɛsɩba. Ɛlɛ Pɔɔlɩ tɩsɩ! Pitileɖi lɛ, koobiya wolo nɛ paya ɛ-ñʋʋ nɛ pakpaɣ-ɩ nɛ papɩsɩnɩ tɛtʋ taa. Pʋwayɩ lɛ, Pɔɔlɩ pɩsɩ Antɩyɔɔsɩ.

Pɩnaɣ 49 taa lɛ, Pɔɔlɩ ɖaɣnɩ paɣzʋʋ nʋmɔʋ lɛɛkʋ ɖɔm. Ɛpɩsaa nɛ ɛna koobiya Aazii Cikpeluu taa nɛ pɩtɛ lɛ, ewoni tɔm kɩbandʋ ɖooo poliŋ, Erɔɔpɩ ajɛɛ taa. Ewobi Atɛɛnɩ, Filiipi, Tesalooniiki nɛ lona lɛɛna taa. Silaasɩ, Luka nɛ pɩɣa evelaɣ ŋga payaɣ se Timootee yɔ, patɩŋ Pɔɔlɩ nʋmɔʋ ŋgʋ kɩ-ɖɔm taa. Peyeba nɛ agbaa sakɩyɛ ñɔ nɛ pasɩnɩ-yɛ nɛ akpa ɖoŋ fezuu taa. Halɩ Pɔɔlɩ caɣ Kɔrɛntɩ pɩnaɣ nɛ hɔɔlʋʋ nɛ ɛkpazɩ peeɖe koobiya ɖoŋ. Esusaɣ tɔm nɛ ɛwɩlɩɣ-tʋ. Ɛɛma ɖɔɖɔ takayɩsɩ nɛ etiyini agbaa sakɩyɛ. Ɛlakaɣ ɖɔɖɔ kizinzikiŋ tʋmɩyɛ. Pɩlabɩ alɩwaatʋ pazɩ lɛ, Pɔɔlɩ pɩsɩ Antɩyɔɔsɩ.

Pɩnaɣ 52 taa, Pɔɔlɩ paɣzɩ ɖɔm nʋmɔʋ 3 ñɩŋgʋ. Ɛpaɣzɩnɩ Aazii Cikpeluu. Ewobi ɖooo hayo kiŋ hɔɔlʋʋ taa nɛ ɛtalɩ Filiipi nɛ pʋwayɩ lɛ, etii Kɔrɛntɩ. Pɔɔlɩ caɣ Efɛɛzɩ pɩnzɩ sakɩyɛ nɛ esusuu tɔm, ɛwaɣ kʋdɔndɩnaa nɛ ɛsɩɣnɩ ɛgbɛyɛ. Ɛyɔɔdaɣ ɖɔɖɔ samaɣ taa tɔm sukuli nakʋyʋ taa paa evemiye nɖɩ. Ɛyaa sakɩyɛ welisaɣni-i nɛ pɛlɛɣzɩɣ pe-wezuu caɣʋ. Pɔɔlɩ susi tɔm kɩbandʋ ajɛɛ sakɩyɛ taa nɛ pɩtɛ lɛ, ewolo Yeruzalɛm.