Salaka yɔɔ cɔnɩyʋ nɔɔyʋ mʋ toovenim tɔm

Pɛlɛ eliikenu nɔɔyʋ kaakɛ yom Filiipi tɛtʋ taa. Pɛlɛ ɛnʋ ɛtɩyaɣ nɛ pɩkɔŋnɩ liidiye sakɩyɛ mba pɔ-cɔlɔ ɛɛwɛɛ yɔ. Pɔɔlɩ nɛ Silaasɩ powobi Filiipi lɛ, pɛlɛ ɛnʋ ɛtɩŋ-wɛ kɩyakɩŋ sakɩyɛ. Eleeu weyi ekema yɔ eyele nɛ ɛmakɩ kubusi se: «Ɛyaa panɛ pɛkɛ Ɛsɔ Kɩlɩm yomaa.» Nɛ Pɔɔlɩ heyi eleeu ɛnʋ se: “Yesu hɩɖɛ taa lɛ, lɩɩ pɛlɛ ɛnɛ yɔ ɛ-taa.” Nɛ eleeu lɩɩ pɛlɛ taa ɖɔɖɔ.

Mba pɔ-cɔlɔ pɛlɛ ɛnʋ ɛɛwɛɛ yɔ, panawa se ɛɛtasɩɣ tɩyʋʋ se pɩkɔnɩ-wɛ liidiye lɛ, pa-taa wɩɩ siŋŋ. Pakpa Pɔɔlɩ nɛ Silaasɩ nɛ pɔhɔm-wɛ nɛ powoni tɛtʋ taa ñʋndɩnaa cɔlɔ nɛ pɔyɔɔdɩ pɔ-yɔɔ se: “Ɛyaa panɛ yɔ, pamanɩ paɣtʋ yɔɔ nɛ pañamsɩɣ tɛtʋ kpeekpe.” Ñʋndɩnaa ɖʋ paɣtʋ se pama Pɔɔlɩ nɛ Silaasɩ nɛ paɖʋ-wɛ salaka. Salaka yɔɔ cɔnɩyʋ sʋnɩ-wɛ pɩ-taa salaka taa, hɔɔlʋʋ ŋgʋ kɩ-taa cɩkpɛndʋʋ wɛ siŋŋ yɔ nɛ ɛsʋzɩ pa-nɩŋgbanzɩ kpoŋgbolonaa pɔŋ taa.

Paa mbʋ yɔ, ɛyaa lalaa mba paawɛ salaka taa yɔ, panɩɣaɣ samtʋ hendu ndʋ Pɔɔlɩ nɛ Silaasɩ paawɛɛ nɛ peteɣ nɛ pasaŋnɩ Yehowa yɔ. Pɩkɛdɩ ɖoo hɛkʋ taa lɛ, tɛtʋ ñamsɩ ɖoŋ tuda yem. Peeɖe salaka nɔnɔsɩ tʋlaa nɛ kpasɩ nzɩ pɔhɔkɩnɩ mba pɛwɛ salaka taa yɔ, sɩcɛ. Salaka yɔɔ cɔnɩyʋ se nɛ ɛsʋʋ salaka taa nɛ ɛna se nɔnɔsɩ tʋlaa. Ɛmaɣzaa se mba paawɛ salaka taa yɔ pa-tɩŋa pesewa, pʋyɔɔ ɛkpaɣ laɣɖɛ se ɛkʋʋ ɛ-tɩ.

Kpaagbaa mbʋ lɛ, Pɔɔlɩ heyi-i se: “Taala ña-tɩ kɩdɛkɛdɩm! Ða-tɩŋa ɖɩwɛ cɩnɛ!” Salaka yɔɔ cɔnɩyʋ wolo nɛ eluŋ Pɔɔlɩ nɛ Silaasɩ pɛ-tɛɛ. Ɛpɔzɩ-wɛ se: «Ɛbɛ pɩwɛɛ se mala nɛ mehiɣ ñʋʋ yabʋ?» Pocosi-i se: “Pɩpɔzʋʋ se ña nɛ ña-ɖɩɣa taa mba itisi Yesu yɔɔ.” Nɛ Pɔɔlɩ nɛ Silaasɩ peheyi-wɛ Yehowa tɔm, nɛ ɛ nɛ ɛ-ɖɩɣa kpeekpe petisi nɛ pamɩyɩsɩ-wɛ lɩm.