KPƐLƖKƲƲ 18

Tɔm ndʋ tɩkpɛlɩkɩɣ ñɔ-tɔm welisiyaa lɔŋ yɔ

1 Kɔrɛntɩ mba 9:19-23

LƖMAƔZƖYƐ SƆSƆÐƐ: Sɩnɩ ñɔ-tɔm welisiyaa nɛ pa-maɣmaɣ pamaɣzɩ tɔm ndʋ ŋyɔɔdʋʋ yɔ tɩ-yɔɔ nɛ piyele nɛ pamaɣzɩ se pɛkpɛlɩkɩ tɔm ndʋ tɩwazɩɣ-wɛ yɔ.

Maɣzɩ mbʋ ñɔ-tɔm welisiyaa tɛm sɩm yɔ pɩ-yɔɔ. Mbʋ ɛzɩ ŋŋɖaɣnɩ yɔɔdʋʋ tɔm ndʋ pɛtɛm sɩm yɔ lɛ, sɩnɩ-wɛ nɛ pɛkpɛlɩkɩ tɔm kɩfatʋ natʋyʋ ñɔ-tɔm yɔɔdʋʋ taa.

Ŋŋyɔɔdʋʋ tɔm ndʋ pɛtɛm sɩm yɔ lɛ taawɛɛkɩ alɩwaatʋ; ɛlɛ ŋŋyɔɔdʋʋ lɩmaɣza kɩfana tɔm lɛ, kpaɣ ña-alɩwaatʋ.
Ñɩnɩ tɔm nɛ ŋmaɣzɩ. Ye pɩsaŋ yɔ, tɩŋnɩ kɩɖaŋ weyi ɛyaa ɩɩsɩŋɩ-ɩ camɩyɛ yaa mbʋ piɖiɣni labʋ yɔ pɩ-yɔɔ nɛ ŋlɩzɩnɩ lɩmaɣza kɩcɛya taa. Maɣzɩ camɩyɛ ñɔ-tɔm yɔɔdʋʋ yɔɔ nɛ nɔɔ kʋɖʋmaɣ ŋga kɛwɛ ñɔ-tɔm yɔɔdʋʋ mbʋ nɛ kɩɖaŋ weyi ŋcaɣ yɔɔdʋʋ ɩ-tɔm yɔ pɩ-hɛkʋ taa yɔ kɔ-yɔɔ.

Ŋŋñɔɔzʋʋ ñɔ-tɔm yɔɔdʋʋ lɛ, tɩŋnɩ tɔm pɔzʋʋ pʋnɛ pɩ-yɔɔ nɛ pɩsɩnɩ-ŋ nɛ ŋlabɩnɩ ña-maɣzɩm tʋmɩyɛ: ‘Ɛbɛ, ɛbɛ yɔɔ, ɛzɩmtaa, le, anɩ, nɛ ɛzɩma.’ Yele nɛ kpekpeka wɛɛ ñɔ-tɔm wɩlʋʋ taa; pɩsa nɛ ŋla mbʋ lɛ pɔzɩ tɔm ndʋ tɩ-taa natʋyʋ nɛ ŋcosi tɩ-yɔɔ ñɔ-tɔm yɔɔdʋʋ tɩŋa taa.
Wɩlɩ ñɔ-tɔm yɔɔdʋʋ wazaɣ. Yɔɔdɩ ɛzɩma Masɩ taa tɔm pɩzɩɣ nɛ tɩsɩnɩ ñɔ-tɔm welisiyaa pe-wezuu caɣʋ taa paa evemiye nɖɩ yɔ. Tazɩ wɛtʋ, lɩmaɣza, nɛ lakasɩ nzɩ ɖeyi ɖeyi sɩ-tɔm cɛyɩ ñɔ-tɔm welisiyaa ɛsɩndaa yɔ sɩ-taa.