Ɛbɛ Ɛsɔ Kewiyaɣ kɛnaa?

Tɔm ndʋ tɩ-tɔm kɩlɩ cɛyʋʋ Bibl taa yɔ, ndʋ lɛ tɔm ndʋ kɩyɔɔdʋʋ Ɛsɔ Kewiyaɣ yɔɔ yɔ. Yehowa kaɣ tɩŋnʋʋ e-Kewiyaɣ ŋga kɔ-yɔɔ nɛ eyele nɛ tamaɣ ŋga ɛɛwɛnɩ tɛtʋ yɔɔ kiɖe tɛɛ yɔ kala. Ɛbɛ Kewiyaɣ ŋga kɛkɛnaa? Nɛ ɛzɩma ɖɩlaba nɛ ɖɩna se keɖiɣni labʋ tʋmɩyɛ sɔnɔ? Ɛbɛ nɛ ɛbɛ kɛtɛm labʋ? Nɛ ɛbɛ kakaɣ labʋ cee wayɩ? Ðɩkaɣ cosuu tɔm pɔzʋʋ mbʋ pɩ-yɔɔ tɔm ñʋʋ kʋnɛ nɛ tɔm ñʋŋ naalɛ weyi ɩkɔŋ pʋwayɩ yɔ ɩ-taa.

1. Ɛbɛ Ɛsɔ Kewiyaɣ kɛnaa nɛ akɛ ke-Wiyaʋ?

Kewiyaɣ ŋga kɛkɛ komina ŋgʋ Ɛsɔ maɣmaɣ sɩwa yɔ. Yesu Krɩstʋ kɛnɩ ke-Wiyaʋ, nɛ ɛsɔdaa ɛwɛɛ nɛ ɛtɔkɩ kewiyitu. (Maatiyee 4:17; Yohanɛɛsɩ 18:36) Bibl yɔɔdaa se Yesu «[kaɣ] tɔɔʋ kewiyitu . . . tam tam.» (Luka 1:32, 33) Yesu, Ɛsɔ Kewiyaɣ Wiyaʋ, kaɣ tɔɔʋ kewiyitu ɛyaa kpeekpe yɔɔ tɛtʋ yɔɔ.

2. Mba nɛ Yesu pakaɣ kewiyitu tɔɔʋ?

Pɩtɩkɛ Yesu ɖeke kaɣnɩ tɔɔʋ kewiyitu. Ɛyaa mba palɩnɩ «cejewe kpeekpe nɛ kʋnʋmɩŋ kpeekpe nɛ samasɩ kpeekpe nɛ ajɛɛ kpeekpe taa yɔ», pakaɣ tɔɔʋ «kewiyitu tɛtʋ yɔɔ.» (Natʋ 5:9, 10) Yesu nɛ ɛyaa ɛzɩma kaɣ tɔɔʋ kewiyitu? Kpaɣnɩ alɩwaatʋ ndʋ Yesu kɔm tɛtʋ yɔɔ yɔ, ɛyaa miiliyɔɔwaa sakɩyɛ pɩsɩ ɛ-tɔmkpɛlɩkɩyaa. Ɛlɛ ɛyaa mba pa-taa lɛ, ɛyaa 144000 ɖeke kaɣnɩ kpaʋ ɛsɔdaa se pa nɛ Yesu pɔtɔɔ kewiyitu. (Kalɩ Natʋ 14:1-4.) Krɩstʋ mba lalaa kpeekpe lɛ, pakaɣ wɛʋ tɛtʋ yɔɔ nɛ Kewiyaɣ ŋga keɖiyi-wɛ.—Keɣa 37:29.

3. Ɛbɛ yɔɔ pɔtɔŋ se Ɛsɔ Kewiyaɣ kpaɖɩ ɛyaa kominawaa?

Ɛyaa kominawaa sɔɔlaa se pala mbʋ pɩwɛ ɖeu yɔ, ɛlɛ pɛfɛyɩnɩ ɖoŋ se pala mbʋ payɩ pɔsɔɔlaa yɔ paa ɛzɩmtaa. Nabʋyʋ taa ɖiyiyaa lalaa lɛɣzɩɣ po-lone taa nɛ pɩtɩla yɔ, paba fɛyɩnɩ lɩmaɣza kɩbana wena lalaa wɛna yɔ. Ɛlɛ nɔɔyʋ ɛɛkaɣ lɛɣzʋʋ Yesu weyi ɛkɛ Ɛsɔ Kewiyaɣ wiyaʋ yɔ e-lone taa. Ɛsɔ sɩ «kewiyaɣ nakɛyɛ . . . nɛ paakaɣ-kɛ ɖɩzʋʋ kpa.» (Danɩyɛɛlɩ 2:44) Yesu kaɣ ɖiyuu tɛtʋ kpeekpe nɛ ɛɛkaɣ ɖʋʋ tʋkaɣ ɛyaa taa. Ɛwɛnɩ sɔɔlɩm, camɩyɛ lakasɩ nɛ siɣsiɣ wɛtʋ, nɛ ɛkaɣ wɩlʋʋ ɛyaa nɛ pɛwɛɛnɩ wɛtʋ kɩbandʋ ndʋ ɛ-maɣmaɣ ɛwɛna yɔ; pʋ-tɔbʋʋ lɛ se ɛkaɣ-wɛ wɩlʋʋ nɛ pɛwɛɛnɩ sɔɔlɩm, camɩyɛ lakasɩ nɛ siɣsiɣ wɛtʋ.—Kalɩ Izaayii 11:9.

4. Komina ŋgʋ kɩwɛnɩ ɖoŋ siŋŋ, nɛ kɩkaɣ ɖiyuu ɛjaɖɛ yɔ

Yesu Krɩstʋ wɛnɩ ɖoŋ nɛ pɩkpaɖɩ ɖiyiyaa mba payɩ paatɔɔ kewiyitu nɛ pɩɖɛɛ nɛ mba peɖiɣni kewiyitu tɔɔʋ lɛɛlɛɛyɔ yɔ. Ɩkalɩ Maatiyee 28:18, nɛ pʋwayɩ lɛ ɩtazɩ tɔm tʋnɛ tɩ-taa:

• Tʋkaɣ ŋga wɛ Yesu ɖoŋ nɛ awiya kpeekpe ɖoŋ pɛ-hɛkʋ taa?

Pɛlɛɣzɩɣ ɛyaa kominawaa ɖoŋ ɖoŋ; nɛ paa ɖiyiyu weyi lɛ, ɛtɔkɩ kewiyitu tɛtʋ hɔɔlʋʋ nakʋyʋ yɔɔ na. Ɛzɩma pɩwɛ Ɛsɔ Kewiyaɣ hɔɔlʋʋ taa? Ɩkalɩ Danɩyɛɛlɩ 7:14, nɛ pʋwayɩ lɛ ɩtazɩ tɔm tʋnɛ tɩ-taa:

• «Paakaɣ ɖɩzʋʋ» Ɛsɔ Kewiyaɣ. Ɛbɛ yɔɔ pɩkɛnɩ tɔm kɩbandʋ?

• Ɛsɔ Kewiyaɣ kaɣ ɖiyuu tɛtʋ kpeekpe. Ɛbɛ yɔɔ pɩkɛnɩ tɔm kɩbandʋ?

5. Pɩpɔzʋʋ se pɛlɛɣzɩ ɛyaa kominawaa

Ɛbɛ yɔɔ pɩpɔzʋʋ se Ɛsɔ Kewiyaɣ ɛlɛɣzɩ ɛyaa kominawaa lone taa? Ɩcɔnɩ VIDEO, nɛ pʋwayɩ lɛ ɩtazɩ tɔm tʋnɛ tɩ-taa.

VIDEO: Ɛbɛ Ɛsɔ Kewiyaɣ kɛnaa?—Hɔɔlʋʋ nakʋyʋ (1:41)

• Pee wena ɛyaa kewiyitu tɔɔʋ lʋlaa?

Ɩkalɩ Eklezɩyasɩtɩ 8:9, nɛ pʋwayɩ lɛ ɩtazɩ tɔm tʋnɛ tɩ-taa:

• Ŋmaɣzɩɣ se pɩpɔzʋʋ se Ɛsɔ Kewiyaɣ ɛlɛɣzɩ ɛyaa kominawaa lone taa? Ɛbɛ yɔɔ?

6. Ɛsɔ Kewiyaɣ wɛnɩ awiya wena anɩɣ ɖɔ-tɔm taa yɔ

Yesu kaacaɣ wezuu ɛzɩ ɛyʋ yɔ; pʋyɔɔ lɛ, ɛpɩzɩɣ «nɛ ɛnɩɩ ɖɛ-ɛjandʋ taa.» (Ebree mba 4:15) Halaa nɛ abalaa siɣsiɣ ñɩma 144 000 waa mba pa nɛ Yesu pakaɣ kewiyitu tɔɔʋ yɔ, «cejewe kpeekpe nɛ kʋnʋmɩŋ kpeekpe nɛ samasɩ kpeekpe nɛ ajɛɛ kpeekpe taa» Yehowa lɩzɩ-wɛ.—Natʋ 5:9

• Yesu nɛ mba ɛ nɛ wɛ pakaɣ kewiyitu tɔɔʋ yɔ, pasɩm ɛyʋ wɛtʋ camɩyɛ. Ŋtɩlʋʋ tɔm ndʋ yɔ, pɩhɛzɩɣ ña-laŋɩyɛ na? Ɛbɛ yɔɔ?

7. Ɛsɔ Kewiyaɣ wɛnɩ paɣtʋ ndʋ tɩkpaɖaa yɔ

Kominawaa ɖʋʋ paɣtʋ ndʋ yɔ, pɔsɔɔlaa se tɩwazɩ nɛ tɩkandɩyɩ pɛ-ɛyaa yɔɔ. Ɛsɔ Kewiyaɣ ɖɔɖɔ wɛnɩ paɣtʋ; nɛ pɩwɛɛ se mba keɖiyiɣ yɔ, pɔɖɔ tɩ-yɔɔ. Ɩkalɩ 1 Kɔrɛntɩ mba 6:9-11, nɛ pʋwayɩ lɛ ɩtazɩ tɔm tʋnɛ tɩ-taa:

• Ŋmaɣzɩɣ se ɛzɩma ɛjaɖɛ kaɣ wɛʋ alɩwaatʋ ndʋ ɛyaa tɩŋa kaɣ yebu nɛ Ɛsɔ paɣtʋ ɖiyi pɔ-ɖɔnɛ yɔ?a

• Ŋmaɣzɩɣ se Yehowa wɛnɩ waɖɛ se ɛpɔzɩ mba e-Kewiyaɣ ɖiyiɣ yɔ se paña ɛ-paɣtʋ na? Ɛbɛ yɔɔ?

• Ɛbɛ wɩlɩɣ se ɛyaa mba paañaŋ paɣtʋ ndʋ yɔ papɩzɩɣ nɛ pɛlɛɣzɩ?—Cɔnɩ kalɩtʋ 11.

TOBI LƐ

Ɛsɔ Kewiyaɣ kɛnɩ komina keekee ŋgʋ kɩwɛ ɛsɔdaa yɔ, nɛ kɩkaɣ ɖiyuu tɛtʋ kpeekpe.

Tɔm taa tazʋʋ

• Mba kɛnɩ Ɛsɔ Kewiyaɣ ɖiyiyaa?

• Ɛbɛ yɔɔ pɔtɔŋ se Ɛsɔ Kewiyaɣ kpaɖɩ ɛyaa kominawaa?

• Yehowa pɔzʋʋ mba e-Kewiyaɣ ɖiyiɣ yɔ se pɔɖɔ paɣtʋ ndɩ ndɩ yɔɔ. Ŋsɩm tɩ-taa natʋyʋ?

WONDU LƐƐTƲ

Kalɩ nɛ ŋna tɔm ndʋ Yesu wɩlaa pɩlɩɩnɩ ɖenɖe Kewiyaɣ wɛɛ yɔ pɩ-yɔɔ yɔ.

«Le royaume de Dieu est-il dans votre cœur?» (Intɛrnɛɛtɩ yɔɔ tɔm ñʋʋ)

Ɛbɛ yɔɔ Yehowa Aseɣɖe Tɩnaa lɩzaa se paawɛɣ ɛyaa kominawaa hɔɔlʋʋ yɔɔ, ɛlɛ pɛwɛɣ Ɛsɔ Kewiyaɣ hɔɔlʋʋ yɔɔ na?

Pɔñɔnɩ Ɛsɔ kewiyaɣ kpam (1:43)

Kalɩ nɛ ŋna tɔm ndʋ Bibl yɔɔdʋʋ pɩlɩɩnɩ ɛyaa 144000 waa mba palɩzaa se pa nɛ Yesu pɔtɔɔ kewiyitu yɔ pɔ-yɔɔ yɔ.

«Qui va au ciel?» (Intɛrnɛɛtɩ yɔɔ tɔm ñʋʋ)

Ɛbɛ sɩnɩ salaka taa halʋ nɔɔyʋ nɛ ɛ-taa tɛ se Ɛsɔ ɖeke pɩzɩɣna nɛ ɛkɔnɩ siɣsiɣ wɛtʋ ɛjaɖɛ yɔɔ?

«J’ai découvert la solution à l’injustice» (Réveillez-vous!, novembre 2011)