Ñɔ-tɔm wɩlʋʋ ɛwɛɛ kɛlɛʋ

Mbʋ Yesu laba yɔ

VIDEO: Yesu tɩŋnɩ kɩɖaʋ nakʋyʋ yɔɔ nɛ ɛwɩlɩ ɛzɩma ɖa-Caa cɔŋnɩ ɖɔ-yɔɔ yɔ

1. Cɔnɩ VIDEO, yaa kalɩ Maatiyee 6:​25-27. Pʋwayɩ lɛ ŋmaɣzɩ tɔm tʋnɛ tɩ-yɔɔ:

1. Pɩsa nɛ Yesu wɩlɩ se Yehowa cɔŋnɩ ɖɔ-yɔɔ lɛ, kɩɖaʋ ŋgʋ ɛlabɩnɩ tʋmɩyɛ?

2. Paa Yesu kaasɩm tɔm sakɩyɛ sumasɩ yɔɔ yɔ, sɩ-yɔɔ tɔm kɛlɛʋ ñɩndʋ ndʋ ɛɛyɔɔdaa? Nʋmɔʋ ŋgʋ kɩ-yɔɔ ɛɛtɩŋnaa nɛ ɛwɩlɩ tɔm yɔ kɩɩkɛ nʋmɔʋ kɩbaŋʋ. Ɛbɛ yɔɔ?

Ɛbɛ ɖɩkpɛlɩkɩɣ Yesu kɩɖaʋ taa?

2. Ye ɖɔ-tɔm wɩlʋʋ ɛwɛ kɛlɛʋ yɔ, ɛyaa kaɣ tɔzʋʋ tɔm ndʋ ɖɩwɩlɩ-wɛ yɔ tɩ-yɔɔ nɛ pɩkaɣ tukunuu pa-laŋa.

Maɣzɩnɩ Yesu

3. Taakɩlɩ yɔɔdʋʋ. Taayɔɔdɩ mbʋ payɩ ŋsɩm tɔm natʋyʋ yɔɔ yɔ pɩ-tɔm, ɛlɛ ka ñʋʋ nɛ mbʋ pɩ-tɔm pɔyɔɔdɩ kpɛlɩkʋʋ taa yɔ. Ŋpɔzʋʋ tɔm lɛ, ɖʋ suuɖu nɛ Bibl kpɛlɩkɩyʋ cosi. Ye ɛɛsɩŋ tɔm cosuu yaa ndʋ ecosaa yɔ tɩɩlakɩ nɔɔ kʋɖʋmaɣ nɛ Bibl wɩlɩtʋ yɔ, ɖaɣnɩ pɔzʋʋ tɔm lɛɛtʋ nɛ ŋcɔlɩnɩ ɛ-lɩmaɣza tɔm ndʋ tɩ-yɔɔ. Ye kpɛlɩkɩyʋ ɛnɩ tɔm ndʋ tɩ-taa yɔ, iwolo kpɛlɩkʋʋ yɔɔ.

4. Tɩŋnɩ tɔm ndʋ ñe-Bibl kpɛlɩkɩyʋ tɛm sɩm yɔ tɩ-yɔɔ nɛ ŋsɩnɩ-ɩ nɛ ɛnɩɩ wɩlɩtʋ kɩfatʋ taa. Kɩɖaʋ nakʋyʋ yɔ: Pʋcɔ nɛ ña nɛ kpɛlɩkɩyʋ ɩpaɣzɩ tazʋʋ tɔm ñʋʋ ŋgʋ kɩyɔɔdʋʋ sɩɖaa fezuu tɔm yɔ kɩ-taa lɛ, tɔm ndʋ ɛɛtɛm kpɛlɩkʋʋ wɛtʋ ndʋ tɩ-taa sɩɖaa wɛɛ yɔ tɩ-yɔɔ yɔ, ɩpɩzɩɣ nɛ ɩyɔɔdɩ tɩ-tɔm pazɩ.

5. Labɩnɩ tʋmɩyɛ kɩɖaŋ camɩyɛ. Pʋcɔ nɛ ŋlabɩnɩ tʋmɩyɛ kɩɖaʋ nakʋyʋ lɛ, pɔzɩ ña-tɩ se:

1. «Kɩɖaʋ ŋgʋ kɩ-taa nɩʋ wɛ kɛlɛʋ na?»

2. «Kpɛlɩkɩyʋ pɩzɩɣ nɛ ɛnɩɩ kɩ-taa kɛlɛʋ na?»

3. «Kɩkaɣ sɩnʋʋ kpɛlɩkɩyʋ se ɛtɔzɩ lɩmaɣzɩyɛ sɔsɔɖɛ yɔɔ, yaa kɩɖaʋ yɔɔ yem ɛkaɣ tɔzʋʋ?»