Wa lɩmaɣza wena akaɖɩɣnɩ Ɛsɔ sɩmtʋ yɔ a-tɩŋa

1. Lɔŋ weyi Pɔɔlɩ kaatasɩ Krɩstʋ ñɩma patam numwaa?

APOSTOLOO PƆƆLƖ yɔɔdaa se: “Ɩtaatasɩ kpaɣʋ ɛjaɖɛ yɔɔ ɖʋtʋ tʋnɛ tɩ-wɛtʋ.” (Roma 12:2) Kajalaɣ Krɩstʋ ñɩma Pɔɔlɩ kaama tɔm ndʋ. Ɛbɛ yɔɔ ɛtasɩ Krɩstʋ ñɩma mba paha pa-tɩ Ɛsɔ nɛ pataa-wɛ num nɛ fezuu kiɖeɖeu yɔ lɔŋ ɛnɩ kpayɩ?​—Roma 1:7.

2-3. (a) Ɛzɩma Sataŋ ñakɩ pana se eposi-ɖʋ nɛ Yehowa? (b) Ɛlɛ ɛbɛ pɩzɩɣ nɛ pɩsɩnɩ-ɖʋ nɛ ɖɩkpɛzɩ mbʋ “pɩkam camɩyɛ” ɖa-maɣzɩm taa yɔ?

² Pɔɔlɩ tasɩ-wɛ lɔŋ ɛnɩ mbʋ pʋyɔɔ yɔ, pɩwɛ ɛzɩ Krɩstʋ ñɩma nabɛyɛ yeba nɛ Sataŋ ɛjaɖɛ yɔɔ lɩmaɣza kɩdɛkɛda nɛ ɛjaɖɛ yɔɔ lɔŋsɩnɖɛ wɛɛnɩ ɖoŋ pɔ-yɔɔ yɔ. (Efɛz. 4:17-19) Wɛtʋ ndʋ tɩpɩzɩɣ nɛ tɩtalɩ ɖa-taa paa anɩ. Sataŋ ɖiyiɣni ɛjaɖɛ ɖɩnɛ, nɛ ɛpɩzɩɣ nɛ ɛtɩŋnɩ nʋmɔŋ ndɩ ndɩ yɔɔ nɛ ɛwɛɛnɩ ɖoŋ ɖɔ-yɔɔ. Kɩɖaʋ nakʋyʋ lɛ se ye ɖɩsɔɔlaa se ɖa-hɩɖɛ ɛsɛɛ yɔ, ɛpɩzɩɣ nɛ ɛtɩŋnɩ pɩ-yɔɔ nɛ eposi-ɖʋ nɛ Yehowa. Halɩ ɛpɩzɩɣ nɛ ɛtɩŋnɩ hɔʋ ŋgʋ kɩ-taa ɖɩlɩnaa yɔ, ɖɔ-sɔnzɩ nɛ falɩsʋʋ mbʋ ɖɩmʋwa yɔ pɩ-yɔɔ nɛ eyele nɛ ɖɩwɛɛnɩ ɛ-maɣzɩm.

³ Ðɩpɩzɩɣ nɛ ɖɩkpɛzɩ mbʋ “pɩkam camɩyɛ” ɖa-maɣzɩm taa yɔ? (2 Kɔr. 10:4) Yʋsɩ ɛzɩma Pɔɔlɩ cosi tɔm ndʋ tɩ-yɔɔ yɔ: “Ðituzuu lɩmaɣza nɛ wondu kʋkʋyɩtʋ tɩŋa ndʋ tɩkaɖɩɣnɩ Ɛsɔ sɩmtʋ yɔ, nɛ ɖɩpɩsɩɣ paa maɣzɩm mbʋ lɛ yom se ɖiyele nɛ pɩña Krɩstʋ.” (2 Kɔr. 10:5) Ɛɛɛ, Yehowa pɩzɩɣ ɛsɩnɩ-ɖʋ nɛ ɖɩwa lɩmaɣza kɩdɛkɛda. Ɛzɩ kɔyɛ lʋkʋʋnɩ sɔtʋ yɔ, mbʋ ɖɔɖɔ Ɛsɔtɔm pɩzɩɣ nɛ tɩsɩnɩ-ɖʋ nɛ ɖɩlʋbɩnɩ Sataŋ ɛjaɖɛ lakasɩ kɩdɛkɛdɩsɩ nzɩ sɩwɛ ɛzɩ sɔtʋ yɔ.

“ƖPƖSƖ MƖ-MAƔZƖM KƖFAM”

4. Lɛɣzɩtʋ ndʋ pɩɩpɔzaa se ɖa-taa sakɩyɛ ɩla alɩwaatʋ ndʋ pacalɩ tɩlʋʋ toovenim yɔ?

⁴ Ŋtɩlɩ toovenim tɔm ndʋ tɩwɛ Ɛsɔtɔm taa yɔ lɛ, pɩɩpɔzaa se ŋla lɛɣzɩtʋ nɛ ŋlɩzɩ se ŋsɛɣ Yehowa. Maɣzɩ lɛɣzɩtʋ ndʋ pɩɩpɔzaa se ŋla alɩwaatʋ ndʋ tɩ-taa yɔ tɩ-yɔɔ nɛ ŋna. Pɩɩpɔzaa se ɖa-taa sakɩyɛ iyele lakasɩ nzɩ sɩfɛyɩ ɖeu yɔ sɩ-labʋ. (1 Kɔr. 6:9-11) Ða-taa wɛ leleŋ siŋŋ se Yehowa sɩnɩ-ɖʋ nɛ ɖiyele lakasɩ kɩdɛkɛdɩsɩ nzɩ!

5. Ɛzɩ Roma mba 12:2 yɔɔdʋʋ yɔ, nɩŋgbanzɩ naalɛ nzɩ pɩwɛɛ se ɖɩkpɛzɩ?

⁵ Ɛlɛ pɩtɩpɔzɩ se ɖa-taa nɔɔyʋ ɛmaɣzɩ se pɩtɩtasɩ cɛyʋʋ se ɛla lɛɣzɩtʋ. Paa ɖiyebi kɩwɛɛkɩm sɔsɔm mbʋ ɖɩlakaɣ yɔ pɩ-labʋ pʋcɔ nɛ pamɩyɩsɩ-ɖʋ lɩm yɔ, pɩpɔzaa se ɖiwolo pɩ-yɔɔ nɛ ɖɩkaɖɩɣnɩ mbʋ payɩ pɩpɩzɩɣ piyele nɛ ɖɩɖaɣnɩ labʋ kɩdɛkɛdɩm sɔsɔm mbʋ yɔ. Ɛbɛ pɩzɩɣ pɩsɩnɩ-ɖʋ nɛ ɖɩla mbʋ? Pɔɔlɩ cosaa se: “Ɩtaatasɩ kpaɣʋ ɛjaɖɛ yɔɔ ɖʋtʋ tʋnɛ tɩ-wɛtʋ, ɛlɛ ɩpɩsɩ mɩ-maɣzɩm kɩfam.” (Roma 12:2) Ye mbʋ, pɩpɔzʋʋ se ɖɩkpɛzɩ nɩŋgbanzɩ naalɛ nasɩyɩ. Kajalaɣ lɛ, pɩpɔzʋʋ se ‘ɖɩtaatasɩ kpaɣʋ’ ɛjaɖɛ ɖɩnɛ ɖɩ-lakasɩ yaa ɖitaayele nɛ sɩwɛɛnɩ ɖoŋ ɖɔ-yɔɔ. Nabʋlɛ lɛ, pɩpɔzʋʋ se ɖɩpɩsɩ ɖa-maɣzɩm kɩfam nɛ pɩsa nɛ ‘ɖɩlɛɣzɩ ɖɛ-wɛtʋ.’

6. Tɔm ndʋ Yesu yɔɔdɩ Maatiyee 12:43-45 taa yɔ, lɔŋ weyi tɩkpɛlɩkɩɣ-ɖʋ?

⁶ Pɩtɩkɛ lɛɣzɩtʋ ndʋ tɩnaɣ ɛsa yɔɔ yem yɔ, tɩ-tɔm ɖeke Pɔɔlɩ yɔɔdʋʋ. Lɛɣzɩtʋ ndʋ titukuuni ɖe-wezuu caɣʋ hɔɔlɩŋ tɩŋa. (Kalɩ aɖakaɣ “Ŋlɛɣzɩ ñɛ-wɛtʋ kiya yaa mbʋ pɩnaɣ ɛsa yɔɔ yem yɔ ŋlɛɣzaa?”) Pɩwɛɛ se ɖɩlɛɣzɩ ɖa-maɣzɩm tɩŋa, pʋ-tɔbʋʋ se ɛyʋ weyi ɖɩkɛnɩ ɖooo ɖa-taa yɔ, ɖa-lɩmaɣza, nɛ mbʋ ɖɩsɔɔlaa yɔ. Pʋyɔɔ lɛ, pɩcɛyaa se ɖa-taa paa anɩ ɛpɔzɩ ɛ-tɩ se: “Lɛɣzɩtʋ ndʋ mɛwɛɛ nɛ malakɩ se manpɩsɩ Krɩstʋ tʋ yɔ, tɩnaɣ ɛsa yɔɔ yem yaa toovenim taa lɛ, mɛwɛɛ nɛ manpɩsɩɣ Krɩstʋ tʋ ɖooo ma-laŋɩyɛ nɛ ma-maɣzɩm taa? Tɔm ndʋ Yesu yɔɔdɩ Maatiyee 12:43-45 taa yɔ tɩ-taa, ɛñɩɣ niye mbʋ pɩcɛyaa se ɖɩla yɔ pɩ-yɔɔ. (Kalɩ Maatiyee 12:43-45.) Tɔm ndʋ tɩkpɛlɩkɩɣ-ɖʋ lɔŋ kɩbaŋ nɩɩyɩ. Lɔŋ ɛnɩ yɔ: Pɩtasɩnɩ se pɩwɛɛ se ɖɩlɔ lɩmaɣza kɩdɛkɛda lɛ, pɩcɛyaa ɖɔɖɔ se ɖɩlɛɣzɩ a-lone taa lɩmaɣza wena akɛdɩɣnɩ Ɛsɔ yɔ.

“ƖPƖSƖ ƐYAA KƖFAMA MAƔZƖM MBƲ PIÐIYIƔ-MƖ YƆ PƖ-TAA”

7. Ɛzɩma ɖɩpɩzɩɣ nɛ ɖɩlɛɣzɩ ɛyʋ weyi ɖɩkɛnɩ ɖooo ɖa-taa yɔ?

⁷ Ðɩpɩzɩɣ nɛ ɖɩlɛɣzɩ ɛyʋ weyi ɖɩkɛnɩ ɖooo ɖa-taa yɔ? Masɩ wɩlɩɣ se ɖɩpɩzɩɣ nɛ ɖɩla mbʋ. Sɩyɔɔdʋʋ se: “Pɩwɛɛ se iwolo pɩ-yɔɔ nɛ ɩpɩsɩ ɛyaa kɩfama maɣzɩm mbʋ piɖiyiɣ-mɩ yɔ pɩ-taa, nɛ isuu ɛyʋtʋ kɩfatʋ ndʋ palɩzɩ-tʋ siɣsiɣ wɛtʋ toovenim ñɩndʋ nɛ Ɛsɔ ñɔnʋʋ siŋŋ pa-taa ɛzɩ Ɛsɔ sɔɔlʋʋ yɔ.” (Efɛz. 4:23, 24) Toovenim taa lɛ, ɖɩpɩzɩɣ nɛ ɖɩlɛɣzɩ ɛyʋ weyi ɖɩkɛnɩ ɖooo ɖa-taa yɔ, ɛlɛ pɩ-labʋ fɛyɩ kɛlɛʋ. Lɩmaɣza kɩdɛkɛda lʋbɩnʋʋ nɛ lakasɩ kɩdɛkɛdɩsɩ yebu ɖeke tɩmaɣ. Pɩwɛɛ se ɖɩlɛɣzɩ ‘maɣzɩm mbʋ piɖiyiɣ-ɖʋ yɔ.’ Pɩ-taa nabʋyʋ lɛ mbʋ ɖɩsɔɔlaa yɔ, ɖɛ-wɛtʋ nɛ mbʋ pituzuu-ɖʋ nɛ ɖɩlakɩ nabʋyʋ yɔ. Pɩsa nɛ ɖɩla mbʋ lɛ, pɩpɔzʋʋ se ɖiwolo pɩ-yɔɔ nɛ ɖɩñakɩ pana siŋŋ.

8-9. Ɛzɩma koobu nɔɔyʋ kɩɖaʋ wɩlɩɣ se pɩcɛyaa se ɖɩlɛɣzɩ ɛyʋ weyi ɖɩkɛnɩ ɖooo ɖa-taa yɔ?

⁸ Iyele nɛ ɖɩna koobu abalɩñɩnʋ nɔɔyʋ kɩɖaʋ. Ɛɛkɛ ɛyʋ weyi ɛwɛ puuyaɣ siŋŋ yɔ. Ɛkpaŋaɣ sʋlʋm nɛ ɛmakɩ ɛyaa, ɛlɛ ɛkɔm nɛ eyele lakasɩ nzɩ nɛ ɛha ɛ-tɩ nɛ pamɩyɩsɩ-ɩ lɩm, nɛ pɩlɩzɩ aseɣɖe siŋŋ tɛtʋ cikpetu ndʋ tɩ-taa ɛɛwɛɛ yɔ. Ɛlɛ pamɩyɩsɩ-ɩ lɩm nɛ pitileɖi lɛ, ɛkatɩ takɩm mbʋ ɛtaaɖʋna yɔ ɖanaɣ nakɛyɛ. Sʋlʋm kpaŋɩyʋ nɔɔyʋ kɔm koobu ɛnʋ ɛ-tɛ, nɛ ɛñɩnɩɣ se ɛma ɖo-koobu. Kajalaɣ taa lɛ, ɖo-koobu ɛnʋ ɛɖɔkɩ ɛ-tɩ se ɛ nɛ ɩ pataayoo. Ɛlɛ abalʋ ɛnʋ ewobi pɩ-yɔɔ nɛ ɛtʋʋ Yehowa lɛ, pɩwɩzɩ ɖo-koobu ɛnʋ siŋŋ nɛ ɛtɩpɩzɩ nɛ ɛɖɔkɩ ɛ-tɩ. Piyeba nɛ ɛma abalʋ ɛnʋ siŋŋ. Ɛbɛ cɔlɔ pɩlɩnaa? Paa ɖo-koobu ɛnʋ e-Bibl kpɛlɩkʋʋ ɛsɩnɩ-ɩ nɛ ɛlʋbɩnɩ puuyaɣ wɛtʋ ndʋ ɛɛwɛna yɔ, ɛtɩlɛɣzɩtɩ maɣzɩm mbʋ piɖiyiɣ-i yɔ. Pʋ-tɔbʋʋ se ɛtɩlɛɣzɩ ɛyʋ weyi ɛkɛnɩ ɖooo ɛ-taa yɔ.

⁹ Paa mbʋ yɔ, koobu ɛnʋ ewobi pɩ-yɔɔ nɛ ɛñaɣ pana se ɛlɛɣzɩ. (Adu. 24:16) Ɛzʋtʋyaa sɩnɩ-ɩ nɛ ewolo pɩ-yɔɔ nɛ ɛɖɛɛnɩ ɛsɩndaa camɩyɛ. Pʋwayɩ lɛ, ɛkɔm nɛ ɛpɩsɩ ɛgbɛyɛ taa ɛzʋtʋyʋ. Pʋwayɩ ɖanaɣ nakɛyɛ pɛwɛ Kewiyaɣ Kpaaŋ nɔnɔɔ taa lɛ, ɖo-koobu ɛnʋ ɛɖaɣnɩ katʋʋ kaɖɛ kʋɖʋmɖɩyɛ nɖɩ ɛɛkataa pɩlakɩ pɩnzɩ nasɩyɩ yɔ. Abalʋ nɔɔyʋ haɣ sʋlʋm nɛ ɛkɔɔ se ɛmakɩ ɛzʋtʋyaa taa lɛlʋ. Ɛzɩma ɖo-koobu ɛnʋ ɛlaba? Ɛkpaɣnɩ hɛɛɛ wɛtʋ nɛ tɩ luzuu nɛ ɛyɔɔdɩnɩ weyi ɛhaɣ sʋlʋm yɔ, ɛhɛzɩ ɛ-pana nɛ ɛsɩnɩ sʋlʋm ñɔyʋ ɛnʋ nɛ ɛlɛ kpe ɛ-tɛ. Ɛbɛ yɔɔ ɖo-koobu ɛnʋ ɛ-lakasɩ wɛ ndɩ lɛɛlɛɛyɔ? Ɛlɛɣzɩ maɣzɩm mbʋ piɖiyiɣ-i yɔ. Ðooo ɛ-laŋɩyɛ taa lɛ, ɛpɩsɩ laŋhɛzɩyɛ tʋ nɛ weyi eluzuu ɛ-tɩ yɔ se Yehowa hɩɖɛ ɛsɛɛ!

10. Ɛbɛ pɩwɛɛ se ɖɩla nɛ pɩsa nɛ ɖɩlɛɣzɩ ɛyʋ weyi ɖɩkɛnɩ ɖooo ɖa-taa yɔ?

¹⁰ Lɛɣzɩtʋ ndʋ, tɩ-labʋ kpakɩɣ alɩwaatʋ nɛ pɩpɔzʋʋ pana ñaɣʋ ɖɔɖɔ. Pɩtɩla pɩpɔzʋʋ se ‘ɖɩñaɣ pana siŋŋ’ pɩnzɩ sakɩyɛ. (2 Pɩy. 1:5) Paa ɖɩwɛɛ nɛ ɖɩsɛɣ Yehowa pɩlakɩ pɩnzɩ sakɩyɛ yɔ, pi-ɖeke pɩɩsɩɣnɩ-ɖʋ se ɖɩla lɛɣzɩtʋ ndʋ. Pɩwɛɛ se ɖɩñaɣ pana siŋŋ pʋcɔ nɛ ɖɩpɩzɩ nɛ ɖɩlɛɣzɩ ɛyʋ weyi ɖɩkɛnɩ ɖooo ɖa-taa yɔ. Pɩsa nɛ ɖɩla mbʋ lɛ, pɩwɛɛ se ɖɩkpɛzɩ nɩŋgbanzɩ nasɩyɩ. Iyele nɛ ɖɩyɔɔdɩ sɩ-taa nasɩyɩ tɔm.

ƐZƖMA ÐƖPƖZƖƔ NƐ ÐƖLƐƔZƖ MAƔZƖM MBƲ PIÐIYIƔ-ÐƲ YƆ?

11. Ɛzɩma adɩma sɩɣnɩ-ɖʋ se ɖɩlɛɣzɩ maɣzɩm mbʋ piɖiyiɣ-ɖʋ yɔ?

¹¹ Kajalaɣ nɩŋgbaŋaɣ ŋga kɔ-tɔm cɛyaa yɔ, ŋga lɛ adɩma. Pɩcɛyaa se ɖɩtɩmɩ ɛzɩ keɣa maɖʋ yɔ. Ɛtɩmaa se: “Mɛ-Ɛsɔ, lubi-m laŋɩyɛ kele kele ñɩnɖɛ, ka man-taa fezuu kɩbaŋʋ.” (Keɣa 50:12) Pɩwɛɛ se ɖiɖiɣzina se pɩcɛyaa se ɖɩlɛɣzɩ maɣzɩm mbʋ piɖiyiɣ-ɖʋ yɔ nɛ ɖɩpɔzɩ Yehowa se ɛsɩnɩ-ɖʋ. Ɛzɩma ɖa-taa pɩzɩɣ nɛ pɩtɛ se Yehowa kaɣ-ɖʋ sɩnʋʋ nɛ ɖɩlɛɣzɩ? Lidaʋ tɔm ndʋ Yehowa heyi Izrayɛɛlɩ piya nzɩ sɩ-laŋa kaawɛ kpɩzɩŋ Ezekɩyɛɛlɩ alɩwaatʋ taa yɔ, tɩpɩzɩɣ nɛ tɩkpazɩ-ɖʋ ɖoŋ. Ɛyɔɔdaa se: “Nɛ mankaɣ-wɛ haʋ laŋɩyɛ lɛɛɖɛ nɛ manɖʋ pa-taa fezuu kɩfalʋʋ; nɛ mankaɣ lɩzʋʋ po-tomnaɣ taa pɩyɛ laŋɩyɛ nɛ maha-wɛ tomnaɣ nandʋ laŋɩyɛ.” (Ezek. 11:19) Yehowa kaasɔɔlɩ faaa se ɛsɩnɩ Izrayɛɛlɩ piya nzɩ nɛ sɩlɛɣzɩ, nɛ ɛsɔɔlɩ ɖɔɖɔ faaa se ɛsɩnɩ-ɖʋ.

12-13. (a) Ɛzɩ Keɣa 118:59 yɔɔdʋʋ yɔ, tɔm ndʋ yɔɔ pɩwɛɛ se ɖɩmaɣzɩ? (b) Tɔm ndʋ pɩwɛɛ se ŋpɔzɩ ña-tɩ?

¹² Nɩŋgbaŋaɣ naalɛ ñɩŋga ŋga pɩcɛyaa se ɖɩkpɛzɩ yɔ ŋga yɔ: Pɩwɛɛ se ɖɩmaɣzɩɣ tɔm ndʋ ɖɩkalɩɣ yɔ tɩ-yɔɔ. Ðɩɩkalɩɣ Ɛsɔtɔm paa ɖooye lɛ, pɩcɛyaa se ɖɩkpaɣ alɩwaatʋ nɛ ɖɩmaɣzɩ camɩyɛ ndʋ ɖɩkalɩɣ yɔ tɩ-yɔɔ, nɛ pɩsa nɛ ɖɩyʋsɩ maɣzɩm mbʋ pɩwɛɛ se ɖɩlɛɣzɩ yɔ. (Kalɩ Keɣa 118:59; Ebr. 4:12; Yak. 1:25) Pɩwɛɛ se ɖɩñɩnɩ nɛ ɖɩna se ɛzɩ ɛjaɖɛ yɔɔ lɔŋsɩnɖɛ wɛnɩ ɖoŋ nɩɩyɩ ɖa-maɣzɩm yɔɔ? Pɩcɛyaa se ɖitisi se ɖɩwɛnɩ ɛjandʋ nɛ ɖɩñaɣ pana siŋŋ nɛ ɖɩwabɩ-tʋ.

¹³ Ŋpɩzɩɣ nɛ ŋpɔzɩ ña-tɩ se: ‘Ɛsɩsɛmɩyɛ yaa sʋsɩ mɛlɩ ma-laŋɩyɛ taa?’ (1 Pɩy. 2:1) ‘Hɔʋ ŋgʋ kɩ-taa malɩnaa yɔ, falɩsʋʋ mbʋ mamʋwa yɔ, nɛ liidiye nɖɩ mɛwɛna yɔ, ɖiyeba nɛ mamaɣzɩɣ se mankpaɖɩ lalaa na?’ (Adu. 16:5) ‘Mamaɣzɩɣ se mankɩlɩ ɛyaa mba pɛfɛyɩnɩ wondu ndʋ mɛwɛna yɔ, yaa mamaɣzɩɣ se mankɩlɩ mba po-tomnaɣ tɔlɩm wɛ ndɩ nɛ ma-ñɩmbʋ yɔ?’ (Yak. 2:2-4) ‘Mɔnsɔɔlɩ wondu ndʋ tɩwɛ Sataŋ ɛjaɖɛ yɔɔ yɔ?’ (1 Yoh. 2:15-17) ‘Mɔnsɔɔlɩ aleɣya wena a-taa nɛ wezuu kɩdɛkɛdʋʋ caɣʋ nɛ puuyaɣ lakasɩ yɔ?’ (Keɣa 96:10; 100:3; Am. 5:15) Ye ŋcosi tɔm pɔzʋʋ mbʋ pɩ-yɔɔ yɔ, ŋpɩzɩɣ nɛ ŋyʋsɩ hɔɔlɩŋ weyi ɩ-taa pɩpɔzʋʋ se ŋla lɛɣzɩtʋ yɔ. Ye ɖɩñaɣ pana nɛ ɖɩkpɛzɩ mbʋ “pɩkam camɩyɛ” yaa lɩmaɣza kɩdɛkɛda ɖa-maɣzɩm taa yɔ, ɖɔ-tɔm kaɣ kɛdɩnʋʋ ɖa-Caa weyi ɛwɛ ɛsɔdaa yɔ.​—Keɣa 18:15.

14. Ɛbɛ yɔɔ pɩcɛyaa se ɖɩlɩzɩ taabalaa kɩbama?

¹⁴ Nɩŋgbaŋaɣ naadozo ñɩŋga ŋga kɔ-tɔm cɛyaa yɔ ŋga yɔ: Ðɩlɩzɩ taabalaa kɩbama. Ɛyaa mba ɖɩɖʋʋnɩ taabalɩyɛ yɔ, pɛwɛnɩ ɖoŋ ɖɔ-yɔɔ siŋŋ. (Adu. 13:20) Paa pɩtɩɩkɛ sukuli taa yaa ɖa-tʋmɩyɛ taa yɔ, pɩtɩla mba pɛ-hɛkʋ taa ɖɩwɛɛ yɔ, paakaɣ-ɖʋ sɩnʋʋ se ɖɩwɛɛnɩ Ɛsɔ maɣzɩm. Ɛlɛ ɖɩpɩzɩɣ nɛ ɖihiɣ taabalaa kɩbama ɖe-kediɣzisi taa. Peeɖe papɩzɩɣ nɛ pakpazɩ-ɖʋ ɖoŋ yaa paɖʋ-ɖʋ hʋnʋm se “ɖɩwɩlɩ sɔɔlɩm nɛ ɖɩla tʋma kɩbana.”​—Ebr. 10:24, 25, pɩ-tɛɛ tɔm.

“ƖCƐYƖSƖ TISUU TAA”

15-16. Ɛzɩma Sataŋ ñakɩ pana se ɛlɛɣzɩ ɖa-maɣzɩm?

¹⁵ Paa mbʋ yɔ, taasɔɔ se Sataŋ tɛm ɛ-taa se ɛlɛɣzɩɣ ɖa-maɣzɩm. Ɛtɩŋɩɣnɩ wɩlɩtʋ ndɩ ndɩ yɔɔ se ɛwɛɛkɩ ɖoŋ kɩbaŋ weyi Masɩ wɛnɩ ɖa-maɣzɩm yɔɔ yɔ.

¹⁶ Sataŋ wɛɛ nɛ ɛlakɩnɩ tʋmɩyɛ lɛɣtʋ kʋɖʋmtʋ ndʋ ɛɛlabɩnɩ tʋmɩyɛ alɩwaatʋ ndʋ ɛɛpɔzɩ tɔm Ɛva Edɛɛnɩ kaɖaɣ taa yɔ. Ɛɛpɔzɩ-ɩ se: “Ɛsɔ tɔm se: ‘Ɩtaatɔɔ kajaɣ taa tɩŋ kpeekpe pee yaa?’” (Kiɖe 3:1) Sataŋ ɛjaɖɛ ɖɩnɛ ɖɩ-taa ɖoŋ ɖoŋ lɛ ɖɩnɩɣ ɛyaa pɔzʋʋ tɔm natʋyʋ nɛ tɩpɩzɩɣ nɛ tiyele nɛ ɖɩpaɣzɩ pɩtʋʋ tisuu mbʋ ɖɩwɛna yɔ pɩ-yɔɔ. Tɔm ndʋ tɩ-taa natʋyʋ yɔ: ‘Ɛsɔ tɩsɔɔlɩ se mba paka kʋzʋʋ pilinzi yɔ, pɔɖɔkɩ nesi yaa? Ɛsɔ tɩsɔɔlɩ se ŋtɔɔ kisimasɩ nɛ lʋlʋʋ kazandʋ yaa? Ñɛ-Ɛsɔ ñɩnɩɣ se ŋkizi se pataaɖʋ-ŋ calɩm yaa? Ɛsɔ sɔɔlɩm tʋ tɩsɔɔlɩ se ŋɖʋ taabalɩyɛ nɛ ñɛ-ɛyaa kʋsɔɔlaa mba palɩzɩ-wɛ ɛgbɛyɛ taa yɔ yaa?’

17. (a) Ye nɔɔyʋ ɛpɔzɩ-ɖʋ tɔm se eyele nɛ ɖɩwɛɛnɩ abʋta pɩlɩɩnɩ ɖe-tisuu tɔm natʋyʋ yɔɔ yɔ, ɛbɛ pɩwɛɛ se ɖɩla? (b) Ɛzɩ Koloosi mba 2:6, 7 yɔɔdʋʋ yɔ, ye ɖɩlabɩ mbʋ ɛbɛ lɩɣ pɩ-taa?

¹⁷ Pɩcɛyaa se ɖa-taa ɛtɛmnɩ tɔm ndʋ tɩ-yɔɔ ɖitisiɣ yɔ. Pɩwɛɛ se ɖɩñaɣ pana se ɖicosi tɔm kɩcɛyɩtʋ ndʋ ɖɩpɔzʋʋ ɖa-tɩ pɩlɩɩnɩ ɖe-tisuu yɔɔ yɔ tɩ-yɔɔ. Ye ɖɩɩlakɩ mbʋ yɔ, ɖɩpɩzɩɣ nɛ ɖɩpaɣzɩ pɩtʋʋ mbʋ pɩ-yɔɔ ɖitisiɣ yɔ. Pazɩ pazɩ lɛ, abʋta ana apɩzɩɣ nɛ alɛɣzɩ ɖa-maɣzɩm nɛ ɖilesi tisuu. Ye mbʋ, ɛbɛ pɩcɛyaa se ɖɩla? Masɩ heyiɣ-ɖʋ se ɖɩlɛɣzɩ ɖa-maɣzɩm nɛ pɩsa nɛ ɖa-maɣmaɣ ɖɩpɩzɩ nɛ ɖɩtɩlɩ “Ɛsɔ sɔɔlɩm mbʋ pɩwɛ ɖeu nɛ pɩkɛdɩnɩ-ɩ nɛ pɩwɛɛ pilim yɔ.” (Roma 12:2) Ye ɖɩkpɛlɩkɩɣ ɖoŋ ɖoŋ yɔ, piyeki nɛ ɖa-maɣmaɣ ɖɩpɩzɩ nɛ ɖɩtɩlɩ se tɔm ndʋ ɖɩkpɛlɩkɩ Bibl taa yɔ tɩkɛ toovenim. Ða-taa kaɣ tɛm se Yehowa paɣtʋ tʋʋzaa. Piyeki nɛ ɖɩka camɩyɛ nɛ ‘ɖɩcɛyɩsɩ tisuu taa,’ ɛzɩ tɩʋ ŋgʋ ki-lila kam camɩyɛ yɔ.​—Kalɩ Koloosi mba 2:6, 7.

18. Ɛbɛ kaɣ-ɖʋ sɩnʋʋ nɛ ɖɩkaɖɩnɩ Sataŋ ɛjaɖɛ yɔɔ lakasɩ nzɩ sɩwɛ ɛzɩ sɔtʋ yɔ?

¹⁸ Ða-maɣmaɣ pɩwɛɛ se ɖɩcɛyɩsɩ ɖe-tisuu. Pʋyɔɔ lɛ, wolo pɩ-yɔɔ nɛ ŋpɩsɩɣ ɛyʋ kɩfalʋ maɣzɩm mbʋ piɖiyiɣ-ŋ yɔ pɩ-taa. Tɩmɩɣ kaahɛzaɣ. Tendi Yehowa se ɛha-ŋ e-fezuu kiɖeɖeu nɛ kɩsɩnɩ-ŋ. Maɣzɩɣ ndʋ ŋkpɛlɩkɩɣ yɔ, tɩ-yɔɔ siŋŋ. Tazɩɣ ña-maɣzɩm nɛ mbʋ piseɣtiɣ-ŋ se ŋla nabʋyʋ yɔ pɩ-taa camɩyɛ. Ñɩnɩ taabalaa kɩbama. Ðʋ taabalɩyɛ nɛ ɛyaa mba pasɩɣnɩ-ŋ se ŋlɛɣzɩ ña-maɣzɩm camɩyɛ yɔ. Ye ŋlakɩ mbʋ yɔ, ŋpɩzɩɣ nɛ ŋkaɖɩnɩ Sataŋ ɛjaɖɛ yɔɔ lakasɩ nzɩ sɩwɛ ɛzɩ sɔtʋ yɔ nɛ ŋwa “lɩmaɣza nɛ wondu kʋkʋyɩtʋ tɩŋa ndʋ tɩkaɖɩɣnɩ Ɛsɔ sɩmtʋ yɔ.”​—2 Kɔr. 10:5.