Ŋŋsɩm-tʋ?

Tʋmɩyɛ nɖɩ ɖɩɣa yɔɔ cɔnɩyaa lakaɣ Bibl alɩwaatʋ taa?

BIBL alɩwaatʋ taa, ɖɩɣa yɔɔ cɔnɩyʋ cɔŋnaɣ ɛyʋ lɛlʋ ɖɩɣa yɔɔ yaa ɛ-ñɩm yɔɔ.

Alɩwaatʋ ndʋ Yakɔɔb pɩyalʋ Yosɛɛfʋ kaakɛ yom Ejipiti yɔ, ɛkɔm nɛ ɛpɩsɩ ɛ-ñʋʋdʋ ɖɩɣa yɔɔ cɔnɩyʋ. Pɩwɩlɩɣ se ɛ-ñʋʋdʋ weyi ɛkɛ Ejipiti tʋ yɔ “eyebini Yosɛɛfʋ mbʋ ɛɛwɛna yɔ pi-kpeekpe.” (Kiɖe 39:2-6) Pʋwayɩ Yosɛɛfʋ kɔm nɛ ɛpɩsɩ ñʋʋdʋ sɔsɔ nɔɔyʋ Ejipiti lɛ, ɛkpaɣ ɛ-maɣmaɣ ɛ-ɖɩɣa yɔɔ cɔnɩyʋ.—Kiɖe 44:4.

Yesu alɩwaatʋ taa, ɛyaa mba paawɛnɩ tɛtʋ nɛ paɖʋʋ hayɩm yɔ, ɖoŋ ɖoŋ lɛ paawɛ tɛtʋ taa ɖenɖe piposini pa-hayɩm yɔ. Pʋyɔɔ lɛ, tɛtʋ tɩnaa mba, pakpakaɣ hayɩm yɔɔ cɔnɩyaa se pɔcɔŋnɩ tʋma wena tʋmlaɖaa lakaɣ paa evemiye nɖɩ yɔ a-yɔɔ.

Amʋnaa se ɛla ɖɩɣa yɔɔ cɔnɩyʋ tʋmɩyɛ? Kajalaɣ pɩnzɩ mɩnʋʋ taa Roma takayɩsɩ mayʋ weyi payaɣ se Columella yɔ, ɛtasɩ lɔŋ se yom weyi pakpakɩɣ-ɩ se ɛkɛ ɖɩɣa yɔɔ cɔnɩyʋ yɔ, pɩwɛɛ se ɛkɛ ɛyʋ weyi “ɛsɩm tʋmɩyɛ labʋ camɩyɛ yɔ.” Pɩwɛɛ se ɛkɛ ɛyʋ weyi “ɛcɔŋnɩ tʋmlaɖaa yɔɔ se pala tʋmɩyɛ camɩyɛ ɛlɛ ɛfɛyɩ kañatʋ yɔ.” Ɛtasɩ yɔɔdʋʋ se: “Wɛtʋ ndʋ pɩpɔzʋʋ ɖɩɣa yɔɔ cɔnɩyʋ nɛ pɩkɩlɩ yɔ, ndʋ lɛ se pɩtɩpɔzɩ se ɛmaɣzɩ se ɛsɩm nabʋyʋ ŋgʋ ɛɛsɩŋ-pʋ, nɛ pɩwɛɛ se paa ɛzɩmtaa lɛ, ɛsɔɔlɩ se ɛkpɛlɩkɩ tɔm kɩfatʋ.”

Palabɩnɩ tʋmɩyɛ ɖɩɣa yɔɔ cɔnɩyʋ kɩɖaʋ Bibl taa se pɔyɔɔdɩ tʋma wena palakɩ Krɩstʋ ɛgbɛyɛ taa yɔ a-taa naayɛ tɔm. Kɩɖaʋ nakʋyʋ yɔ: Apostoloo Pɩyɛɛrɩ seɣti Krɩstʋ mba se palabɩnɩ tʋmɩyɛ kʋjɔʋ ŋgʋ Ɛsɔ ha-wɛ yɔ nɛ ‘paɖʋnɩ ɖama lɩm ɛzɩ Ɛsɔ lootiye yɔɔ cɔnɩyaa kɩbama yɔ.’—1 Pɩy. 4:10.

Tɔm ndʋ tɩwɛ Luka 16:1-8 taa yɔ tɩ-taa, Yesu maɣmaɣ kaalabɩnɩ tʋmɩyɛ ɖɩɣa yɔɔ cɔnɩyʋ kɩɖaʋ. Pɩtasɩ lɛ, natʋ tɔm ndʋ tɩ-taa Yesu yɔɔdaɣ yʋsaɣ ŋga kawɩlɩɣ se ɛnʋ kaɣ kɔm ɛzɩ wiyaʋ yɔ tɩ-taa, eheyi ɛ-wayɩ tɩŋɩyaa se ɛnʋ kaɣ lɩzʋʋ “yom siɣsiɣ tʋ nɛ lɔŋsɩnɖʋ” yaa “ɖɩɣa yɔɔ cɔnɩyʋ siɣsiɣ tʋ” nɔɔyʋ. Tʋmɩyɛ sɔsɔɖɛ nɖɩ ɖɩɣa yɔɔ cɔnɩyʋ ɛnʋ ɛkaɣ labʋ yɔ, nɖɩ lɛ se ɛha Krɩstʋ wayɩ tɩŋɩyaa fezuu taa tɔɔnaɣ ŋga pɩpɔzʋʋ-wɛ yɔ, kɛdɛzaɣ kɩyakɩŋ taa. (Mat. 24:45-47; Luka 12:42) Ða-taa wɛ leleŋ kpem se ɖɩwɛ mba ɖɩɣa yɔɔ cɔnɩyʋ siɣsiɣ tʋ ɛnʋ ɛlakɩ fezuu taa tɔɔnaɣ nɛ ɛtayɩɣ-wɛ ɛjaɖɛ kpeekpe yɔɔ yɔ pa-taa.