Ɩkɛ nayaa lɛzɩŋ—Mikee
1. Pɩtɩla tɔm pɔzʋʋ mbʋ yɔɔ Mikee maɣzaɣ? Ɛlɛ, ɛbɛ yɔɔ ɛ-tɔm susuu taakɛ falaa tʋmɩyɛ?
1 ‘Ɛzɩ ɛzɩmtaa ɛjaɖɛ kɩdɛkɛdɩyɛ ɖɩnɛ ɖɩkaɣ tɛm kpem?’ Mikee susaɣ Yehowa tɔm hʋʋ kɩyakʋ tɔm Izrayɛɛlɩ kewiyaɣ nɛ Yuda taa lɛ, pɩtɩla ɛɛmaɣzɩ tɔm pɔzʋʋ pʋnɛ pɩ-yɔɔ ɖɔɖɔ. Ɛlɛ ɛ-tɔm susuu taakɛ falaa tʋmɩyɛ. Tɔm ndʋ Yehowa kaayɔɔdɩ Samaarɩɩ yɔɔ yɔ, tɩkɔm pɩ-taa pɩnaɣ 740 P.Ð.A. nɛ Mikee na-tʋ nɛ ɛ-ɛza. (Mikee 1:6, 7) Pʋwayɩ lɛ, pɔkɔɔ nɛ pɔyɔkɩ ɖɔɖɔ Yerusalɛm pɩnaɣ 607 P.Ð.A. (Mikee 3:12) Sɔnɔ ɖɩɖaŋ Yehowa tɔm hʋʋ kɩyakʋ ɖɔɖɔ, ɛlɛ ɛzɩma ɖɩpɩzɩɣ nɛ ɖɩmaɣzɩnɩ Mikee?
2. Alɩwaatʋ ndʋ ɖɩɖaŋ Yehowa kɩyakʋ yɔ, ɛzɩma ɖɩpɩzɩɣ nɛ ɖɩwɩlɩ se ɖɩwɛnɩ suuɖu? Ɛbɛ yɔɔ pɩwɛɛ se ɖɩla mbʋ?
2 Wɛɛ suuɖu: Mikee yɔɔdaa se: “Ma yɔ, Kɩbaɣlʋ mankpazɩɣ-ŋ nɛ ɛza, mantaɣ liu Ɛsɔ, ma-ñʋʋ yaɖʋ.” (Mikee 7:7) Toovenim taa lɛ, Mikee tɩcaɣ yem nɛ ɛɖaŋ se tɛm alɩwaatʋ ɛtalɩ. Ɛlakaɣ nayʋ tʋmɩyɛ nɖɩ Yehowa kaaɖʋ-ɩ yɔ, camɩyɛ. Ðɩɖaŋ Yehowa kɩyakʋ ɖɔɖɔ, pʋyɔɔ lɛ pɩwɛɛ se ɖɩcɔna nɛ ɖɩna se “ɛyaa mba pɩwɛnɩ-ɖʋ se ɖɩkɛ” Ɛsɔ ɛzɩdaa. (2 Pɩy. 3:11, 12) Yehowa suuɖu ɖʋʋ haɣ ɛyaa nʋmɔʋ se papɩsɩ pa-laŋa. (2 Pɩy. 3:9) Ye mbʋ pɩwɛɛ se ɖɩɖɔ Bibl lɔŋ tasʋʋ mbʋ pɩtɔŋ se ɖɩkɛ nayaa lɛzɩŋ suuɖu ɖʋʋ nʋmɔʋ taa yɔ, ɩ-yɔɔ.—Yakubu 5:10.
3. Ɛbɛ yɔɔ pɩcɛyaa se ɖɩtɩmnɩ Yehowa se ɛha-ɖʋ e-fezuu kiɖeɖeu?
3 Taa Yehowa ɖoŋ liu: Tʋmɩyɛ nɖɩ paaɖʋ Mikee yɔ, ɖɩɩwɛ kaɖɛ, ɛlɛ ɛta Yehowa ɖoŋ liu se ɛpɩzɩɣ nɛ ɛsɩnɩ-ɩ nɛ ɛlabɩ-ɖɩ. (Mikee 3:8) Peseɣtuu-ɖʋ Bibl taa se ɖɩtaa Ɛsɔ ɖoŋ liu yɔ, pɩtɩkɛ falaa tɔm. Ɛsɔ haɣ mba pɩnɩ-wɛ yɔ ɖoŋ se papɩzɩ nɛ pala ɛgbɛyɛ taa tʋma wena paɖʋʋ-wɛ yɔ. (Keɣa 83:6, 8; Iz. 40:28-31) Wiɖiyi Ɛsɔ tɛmɩ-ŋ kpazʋʋ ɖoŋ mbʋ nɛ ŋna? Ŋtɩmɩɣnɩ Yehowa ɖoŋ ɖoŋ se ɛha-ŋ e-fezuu kiɖeɖeu nɛ kɩsɩnɩ-ŋ?—Luka 11:13.
4. Mikee wezuu caɣʋ haɣ-ɖʋ kɩɖaʋ kɩbaŋʋ ŋgʋ sɔnɔ?
4 Mikee wɩlɩ e-wezuu caɣʋ kpeekpe taa se Ɛsɔ sɔɔlɩm labʋ tɔm kɩlɩnɩ cɛyʋʋ. Kɩdɛkɛdɩm kaacɔ-ɩ nɛ pɩta, ɛlɛ ɛtɛm ɛ-taa nɛ ɛɖɔkɩ e-siɣsiɣ wɛtʋ mbʋ. Sɔnɔ ɖɔɖɔ pɩtakɩɣ ɖe-siɣsiɣ wɛtʋ paa ɖooye. Ðɩñaɣ pana nɛ ɖɩtɛ ɖa-taa se “ɖɩkaɣ ɖɔm ɖa-Kɩbaɣlʋ Ɛsɔ hɩɖɛ taa tam nɛ pɩkpaɣ nɛ pɩɖɛɛ.”—Mikee 4:5.