Waɖɛ nɖɩ ɖɩkaɣ-ŋ wazʋʋ na?
Krɩstʋ sɩm yɔɔ tɔzʋʋ sɔnzɩ nzɩ sɩkɔŋ yɔ, sɩhaɣ-ɖʋ waɖɛ se ɖɩwɩlɩ ɖɛ-ɛsɩmɩyɛ
1. Waɖɛ nɖɩ Yesu sɩm yɔɔ tɔzʋʋ sɔnzɩ haɣ-ɖʋ?
1 Krɩstʋ sɩm yɔɔ tɔzʋʋ sɔnzɩ nzɩ palakɩ 14 avril wiye yɔ, sɩhaɣ-ɖʋ waɖɛ se ɖɩwɛɛna nɛ ɖɩwɩlɩ ɛsɩmɩyɛ Yehowa Ɛ-camɩyɛ lakasɩ yɔɔ. Tɔm ndʋ tɩwɛ Luka 17:11-18 taa yɔ, tɩwɩlɩɣ lɩmaɣza wena Yehowa nɛ Yesu pɛwɛnɩ ɛsɩmɩyɛ yɔɔ yɔ. Pɩlabɩ pʋtɔdɩyɛ se canasɩ hiu waa mba paawa pa-kʋdɔŋ yɔ, pa-taa lɛ, kʋyʋm yeke pɩsɩna nɛ ɛsɛɛ Yesu. Kɩhɛyʋʋ pʋ-ñʋʋ taa kʋjɔʋ kaɣ yebu nɛ kʋdɔmɩŋ tɩŋa cɛ nɛ wezuu maatɛŋ pɩsɩ toovenim pʋyʋ cee wayɩ! Pɩtʋʋ fɛyɩ, alɩwaatʋ ndʋ tɩtalɩɣ lɛ, ɖɩkaɣ sɛʋ Yehowa wazasɩ nzɩ sɩ-yɔɔ paa ɖooye. Ɛlɛ ɛzɩma ɖɩpɩzɩɣ nɛ ɖɩwɩlɩ ɖɛ-ɛsɩmɩyɛ kpɩtaŋ weyi ɩkɔŋ yɔ, ɩ-taa?
2. Ɛbɛ ɖɩpɩzɩɣ ɖɩla nɛ ɖɩwɛɛnɩ ɛsɩmɩyɛ kɩhɛyʋʋ pʋ-ñʋʋ taa yɔɔ?
2 Wɛɛnɩ ɛsɩmɩyɛ: Ɛsɩmɩyɛ wɛnʋʋ paɣzɩɣ lɩmaɣza taa na. Paɖʋ Krɩstʋ sɩm yɔɔ tɔzʋʋ alɩwaatʋ taa Bibl kalʋʋ ɖʋtʋ takayɩsɩ nasɩyɩ taa ɛzɩ Examinons les Écritures chaque jour yaa calendrier des Témoins de Jéhovah. Pɩɩwɛɣ ɖeu se ña nɛ ñɔ-hɔʋ ɩcaɣ nɛ ɩkalɩ Bibl hɔɔlɩŋ ɛnɩ? Ye ɖɩlabɩ mbʋ yɔ, piyeki nɛ ɛsɩmɩyɛ nɖɩ ɖɩwɛnɩ kɩhɛyʋʋ pʋ-ñʋʋ taa yɔɔ yɔ ɖɩpaɣlɩɣ nɛ pɩkɩlɩ. Pɩkaɣ wɛnʋʋ ɖoŋ ɖɔɖɔ ɖa-lakasɩ yɔɔ.—2 Kɔr. 5:14, 15; 1 Yohanɛɛsɩ 4:11.
3. Ɛbɛ nɛ ɛbɛ ɖɩpɩzɩɣ ɖɩla nɛ ɖɩwɩlɩ se ɖɩwɛnɩ ɛsɩmɩyɛ Krɩstʋ sɩm yɔɔ tɔzʋʋ alɩwaatʋ taa?
3 Wɩlɩ ñɛ-ɛsɩmɩyɛ: Ɛyʋ lakasɩ wɩlɩɣna se ɛwɛnɩ ɛsɩmɩyɛ. (Koloosi 3:15) Canaɣ ŋga kaawɛnɩ ɛsɩmɩyɛ yɔ, kañaɣ pana nɛ kañɩnɩ Yesu nɛ kɛsɛɛ-ɩ. Paa pɩɩla, kaaheyi lalaa ɖɔɖɔ ɛzɩma pawa ka-kʋdɔŋ yɔ nɛ taa leleŋ. (Luka 6:45) Ɛsɩmɩyɛ kaɣ-ɖʋ tuzuu se ɖɩɖʋ nesi nɛ ɖɩla Krɩstʋ sɩm yɔɔ tɔzʋʋ ŋgee tɔm susuu nɛ kpekpeka yaa we? Ye ɖɩkɛ nʋmɔʋ lɩzʋʋ sɩnɩyʋ yaa ɖɩsɔzɩ ɖɔ-tɔm susuu tʋmɩyɛ yɔɔ Krɩstʋ sɩm yɔɔ tɔzʋʋ alɩwaatʋ taa yɔ, pɩsɩɣnɩ-ɖʋ nɛ ɖɩwɩlɩ ɖɛ-ɛsɩmɩyɛ camɩyɛ. Ye ɖɩwɛnɩ ɛsɩmɩyɛ yɔ, pɩsɩɣnɩ-ɖʋ ɖɔɖɔ nɛ ɖɩmʋ agɔma camɩyɛ Krɩstʋ sɩm yɔɔ tɔzʋʋ sɔnzɩ ɖɩlaɖɛ nɛ ɖɩha ɖa-tɩ nɛ ɖicosi tɔm ndʋ agɔma mba pakaɣ pɔzʋʋ yɔ tɩ-yɔɔ.
4. Ɛbɛ pɩwɛɛ se ɖɩla nɛ Krɩstʋ sɩm yɔɔ tɔzʋʋ sɔnzɩ sɩnɛ sɩɖɛwa lɛ, ɖitaakpiɖi?
4 Krɩstʋ sɩm yɔɔ tɔzʋʋ sɔnzɩ sɩnɛ sɩkaɣnɩ kɛʋ kɛdɛzaɣ ñɩnzɩ na? (1 Kɔr. 11:26) Nɔɔyʋ ɛɛsɩŋ. Ɛlɛ ɖɩnawa keekee se sɩɖɛɣ lɛ, waɖɛ nɖɩ ɖɩɩwɛna se ɖɩwɩlɩ ɖɛ-ɛsɩmɩyɛ yɔ, ɖɩɖɩ ñɛɖɛɣ ɖɔɖɔ. Ðɩkaɣ yebu nɛ waɖɛ nɖɩ ɖɩwazɩ-ɖʋ yɔ? Tɛtɛ ɖɔ-nɔɔ taa tɔm nɛ tɔm ndʋ ɖa-laŋɩyɛ midiɣ yɔ, tɩɩla nɛ Yehowa, Ɛsɔ kʋjɔʋ tʋ weyi eyeba nɛ palaa kɩhɛyʋʋ pʋ-ñʋʋ taa kɩlaʋ yɔ, ɛ-taa hʋlɩmɩ.—Keɣa 18:15.