Ðɩwɛɛ niye tɔm susuu taa—Ðɩñɔɔzɩ ɖɔ-kɔɔnɔɔ tɔm pee camɩyɛ

Ɛbɛ yɔɔ pɩcɛyaa: Ye ɖɔ-kɔɔnɔɔ tɔm ɛtɩkɛdɩnɩ ɖɩɣdʋ yɔ, ɛpɩzɩɣ eyele nɛ ɖa-faawɩyɛ sɩɩ tɩnaɣ, halɩ ɖɩtɩtɩɩlɩzɩtɩ aseɣɖe. Pʋyɔɔ koobiya sakɩyɛ maɣzɩɣ se pa-faawɩyɛ labʋ taa lɛ, pɔ-kɔɔnɔɔ tɔm pee tɔm kɩlɩnɩ cɛyʋʋ. Pama tɔm ndʋ tɩpɩzɩɣ tɩsɩnɩ-ɖʋ nɛ ɖɩpaɣzɩ faawɩyɛ labʋ yɔ Kewiyaɣ Ɛsɔ sɛtʋ tʋmɩyɛ takayaɣ taa, ɛlɛ patɩma tɔm tɩŋa mbʋ pʋyɔɔ yɔ, pañɩnɩɣ se ye pɩlakɩ yɔ, ɖɩlɛɣzɩ tɔm ndʋ ɖɩsɔɔlaa yɔ. Paa patɩɩma tɔm ndʋ tɩ-tɩŋa yɔ, tɔm susuyaa pɩzɩɣ nɛ pɛlɛɣzɩ-tʋ pazɩ yaa pɔñɔɔzɩ pa-maɣmaɣ pɔ-kɔɔnɔɔ tɔm. Ye ɖɩñɔɔzɩ ɖɔ-kɔɔnɔɔ tɔm pee camɩyɛ yɔ, atukuuni ɖɩɣdʋ pɩkɩlɩ; ɖɩtaaɖaŋ nɛ alɩwaatʋ ndʋ ɖɩɣdʋ tʋlʋʋ nɔnɔɔ lɛ, ɖɩyɔɔdɩ ndʋ tɩkpaɣ ɖa-ñʋʋ taa yɔ.—Aduwa 15:28.

Ɛzɩma pɩwɛɛ se ɖɩla?

Lɩzɩ tɔm ñʋʋ: Pɩwɛɛ se kɩla nɔɔ kʋyʋmaɣ nɛ takayɩsɩ nzɩ ŋñɩnɩɣ haʋ yɔ nɛ kɩkɛdɩnɩ ɖɔɖɔ ño-kooka taa mba.
Ŋñɩnɩɣ se ŋsɛɛ ɛyaa pɩtɛ nɛ ŋyɔɔdɩ ña-kajalaɣ tɔm ndʋ yɔ, ñɔɔzɩ-tʋ camɩyɛ. Ŋpaɣzɩɣ lɛ, ŋpɩzɩɣ nɛ ŋyɔɔdɩ se: “Mɔnkɔm cɩnɛ mbʋ pʋyɔɔ yɔ . . . ,” yaa “Ɛyaa sakɩyɛ nɩɣzɩɣ se. . . ,” yaa “Suwe ŋmaɣzɩɣ tɔm tʋnɛ tɩ-yɔɔ: . . . ,” yaa ŋpɩzɩɣ nɛ ŋñɔɔzɩ kɔɔnɔɔ tɔm lɛɛtʋ. Tɔm ndʋ tɩwɛ tobi nɛ tɩwɛɛ kɛlɛʋ ɖɔɖɔ yɔ, ndʋ kɩlɩnɩ ɖeu. Tɔm susuyaa nabɛyɛ ñaɖʋ pa-taa se pɔɖɔkʋʋ pɔ-kɔɔnɔɔ tɔm pa-ñʋʋ taa.
Ŋŋɔɔzʋʋ ñɔ-kɔɔnɔɔ tɔm lɛ, ñɩnɩ tɔm pɔzʋʋ mbʋ piyeki nɛ ɖɩɣdʋ tisi nɛ ña nɛ ɩ ɩla faawɩyɛ yɔ. (Maatiyee 17:25) Taasɔɔ se pɩtɩla ɖɩɣdʋ maɣzaɣ tɔm natʋyʋ yɔɔ pʋcɔ nɛ ŋwoki ɛ-tɛ, ye mbʋ pɩtɩmʋna se tɔm ndʋ ŋpɔzʋʋ-ɩ yɔ, tɩkɩlɩ kaɖɛ yaa tɩkpa-ɩ sɔɔndʋ.

Labɩnɩ tʋmɩyɛ lɔŋ tasʋʋ pʋnɛ fenaɣ kanɛ:

Ɩkpaɣ hɔʋ taa Bibl kpɛlɩkʋʋ alɩwaatʋ natʋyʋ nɛ ɩñɔɔzɩnɩ kɔɔnɔɔ tɔm natʋyʋ nɛ ɩlabɩnɩ la ŋwɩlɩ nakʋyʋ.
Ye ña nɛ koobu nɔɔyʋ ɩlɩ tɔm susuu yɔ, heyi-i kɔɔnɔɔ tɔm ndʋ ŋɖʋ ña-taa se ŋkaɣ yɔɔdʋʋ yɔ. (Aduwa 27:17) Ye ñɔ-kɔɔnɔɔ tɔm ɛɛlakɩ tʋmɩyɛ camɩyɛ yɔ, lɛɣzɩ-tʋ.