Août fenaɣ taa ɖɩkaɣ labʋ tɔm susuu tʋmɩyɛ nɖɩ ɖɩɩkaɣ ɖɩ-yɔɔ sɔʋ kaaʋ yɔ!

1. Ŋgee tɔm susuu tʋmɩyɛ nɖɩ ɖɩkaɣ labʋ tɛtʋ kpeekpe yɔɔ août fenaɣ taa?

¹ Pɩkazɩ pazɩ pɩlakɩ pɩnzɩ 100 ɛzɩ pasɩʋ Ɛsɔ Kewiyaɣ tigiɖe Ɛsɔ taa yɔ. Pʋyɔɔ lɛ, pɩkɛnɩ alɩwaatʋ kɩbandʋ ndʋ tɩ-taa pɩwɛɛ se ɖɩla ŋgee tɔm susuu nabʋyʋ nɛ ɖɩɖʋnɩ hɩɖɛ ɖɛ-Ɛsɔ Yehowa yɔ! Août fenaɣ taa ɖɩkaɣ tayʋʋ traktɩ kɩfalʋʋ nakʋyʋ tɛtʋ kpeekpe yɔɔ. Traktɩ ŋgʋ kɩ-tɔm ñʋʋ yɔ: “Ɛbɛ pɩzɩɣ pɩsɩnɩ-ɖʋ nɛ ɖɩnɩɩ tɔm kɩcɛyɩtʋ ndʋ ɖɩpɔzʋʋ ɖa-tɩ yɔ, tɩ-taa?” Traktɩ kʋnɛ kiseɣtiɣ kɩ-kalɩyaa se powolo Bibl taa nɛ pañɩnɩ tɔm ndʋ pɔpɔzʋʋ pa-tɩ yɔ, tɩ-yɔɔ cosuu nɛ kɩwɩlɩɣ-wɛ ɖɔɖɔ ɛzɩma jw.org pɩzɩɣ nɛ kɩsɩnɩ-wɛ yɔ.

2. Ɛzɩma ɖɩpɩzɩ nɛ ɖɩɖʋ nesi samtʋ kubusi sɔsɔsɩ nzɩ pakaɣ mabʋ août fenaɣ taa yɔ?

² Samtʋ kubusi sɔsɔsɩ: Palabɩ ŋgee ɖʋtʋ natʋyʋ se tɩpɩzɩ nɛ tɩha waɖɛ koobiya nɛ pala nʋmɔʋ lɩzʋʋ sɩnɩyʋ tʋmɩyɛ août fenaɣ taa nɛ pɩsɩnɩ-wɛ nɛ pawalɩsɩ pɔ-tɔm susuu tʋmɩyɛ. Fenaɣ ŋga ka-taa pahaɣ tɔm susuyaa nʋmɔʋ se papɩzɩɣ nɛ pakpaɣ ñɩɣtʋ 30 nɛ palabɩnɩ nʋmɔʋ lɩzʋʋ sɩnɩyʋ tʋmɩyɛ. Ɛzɩma août fenaɣ taa kemeɣsi kpɛndɩ kagbanzɩ, mazasɩ kpɛndɩ kagbanzɩ nɛ kujukasɩ kpɛndɩ ɖɔɖɔ kagbanzɩ yɔ, pɩhaɣ waɖɛ tɔm susuyaa mba palakɩ komina tʋmɩyɛ nɛ sukuli piya se papɩzɩ nɛ pala nʋmɔʋ lɩzʋʋ sɩnɩyʋ tʋmɩyɛ kɛlɛʋ yem. Ye ñe-Bibl kpɛlɩkɩyʋ weyi ɛɖɛnɩ ɛzɩdaa yɔ yaa ña-pɩɣa ɛsɔɔlaa se kapaɣzɩ tɔm susuu yɔ, lɛɛlɛɛyɔ pɩwɛɛ se ŋyɔɔdɩnɩ ɛzʋtʋyaa tʋmɩyɛ kpɛndɩyʋ. Pɩkaɣ-wɛ kpazʋʋ ɖoŋ siŋŋ ye papɩsɩ tɔm susuyaa nɛ pɔsɔzɩ ɖɔ-yɔɔ nɛ ɖɩla tʋmɩyɛ août fenaɣ taa yɔ. Paa ɖooye nʋmɔʋ lɩzɩyaa sakɩyɛ tɩɩhɛzɩɣ août fenaɣ taa mbʋ pʋyɔɔ yɔ, patalɩ ka-ɖʋwa ŋga pɛwɛnɩ pɩnaɣ taa yɔ ɛlɛ pɩnaɣ kanɛ lɛ, ye pɛlɛɣzɩ pa-ɖʋtʋ nɛ papɩzɩ nɛ paɖʋ nesi ŋgee tɔm susuu fenaɣ ŋga ka-taa yɔ, pɩwɛɣ ɖeu nɛ pɩkpaɖɩ. Lɛɛlɛɛyɔ pɩwɛɛ se hɔŋ taa ñɩma ɩcaɣ nɛ pala lɩmaɣza nɛ pana se ɛzɩma papɩzɩɣ nɛ pala nɛ paba ɖɔɖɔ ‘pama kubusi sɔsɔsɩ nɛ pɔñɔkɩ Yehowa’ août fenaɣ taa​—Ɛsdrasɩ 3:11; Aduwa 15:22.

3. Ðɩtaɣ liu se ɛzɩma ŋgee tɔm susuu tʋmɩyɛ kaɣ ɖɔm?

³ Pɩkɛ toovenim se ɖɩɩtɛm ŋgee tɔm susuu tʋma labʋ nɛ ɖɩtayɩ traktɩwaa sakɩyɛ nɛ pɩɖɛɛ, ɛlɛ ɖɩtaɣ liu se ŋgee tɔm susuu mbʋ ɖɩkaɣ labʋ août fenaɣ taa yɔ, ɖɩɩkaɣ pɩ-yɔɔ sɔʋ kaaʋ! Ðɩtaɣ liu se fenaɣ ŋga ka-taa, ñɩɣtʋ ndʋ ɖɩkaɣ kpaɣʋ nɛ ɖisusuni tɔm yɔ, tɔm susuyaa nɛ nʋmɔʋ lɩzʋʋ sɩnɩyaa kaɣ ɖɔʋ nɛ pɩkpaɖɩ fenasɩ lɛɛsɩ tɩŋa payɩ. Ɛzɩma teokrasɩ pɩnaɣ 2014 ɖiɣni tɛm yɔ, tɛtɛ Yehowa kaawazɩ pana wena ɛ-samaɣ wɛɛ nɛ kañakɩ yɔ, a-yɔɔ nɛ eyele nɛ ɖɩlɩzɩ aseɣɖe siŋŋ août fenaɣ taa nɛ kɛkɛnɩ fenaɣ ŋga kɔ-yɔɔ ɛyʋ ɛɛkaɣ sɔʋ kpa yɔ!​—Maatiyee 24:14.