Ɛzɩma ŋpɩzɩɣ nɛ ŋsɩnɩ ɖɩɣdʋ weyi ɛɛsɩŋ kalʋʋ camɩyɛ yɔ?
1. Ɛbɛ yɔɔ pɩwɛ kaɖɛ se pawɩlɩ Bibl mba paasɩŋ kalʋʋ camɩyɛ yɔ?
1 Mba posusuu-wɛ tɔm nɛ paapɩzɩɣ kalʋʋ camɩyɛ yɔ, nabʋyʋ taa pɔsɔɔlɩ Ɛsɔtɔm siŋŋ, ɛlɛ panaɣ ñe-nesi tɛɛ Bibl yaa takayaɣ sɔsɔɔ nakɛyɛ lɛ, pɩkpaɣ-wɛ sɔɔndʋ. Ɛzɩma ɖɩpɩzɩɣ nɛ ɖɩsɩnɩ ɛyaa panɛ fezuu taa?
2. Tɔm susuu wondu ndʋ ɖɩpɩzɩɣ nɛ ɖɩlabɩnɩ tʋmɩyɛ nɛ ɖɩsɩnɩ mba paasɩŋ kalʋʋ camɩyɛ yɔ?
2 Ŋpɩzɩɣ nɛ ŋpaɣzɩnɩ hatʋ cabɩ takayɩsɩ Welisini Ɛsɔ nɛ Welisini Ɛsɔ nɛ ŋcaɣ wezuu tam. Etaazuunii nʋmɔʋ lɩzɩyʋ nɔɔyʋ wɩlɩɣ hatʋ cabɩ takayɩsɩ sɩnɛ mba esusuu tɔm nɛ paapɩzɩɣ kalʋʋ camɩyɛ yɔ nɛ ɛpɔzʋʋ-wɛ se sɩ-naalɛ sɩ-taa lɛ, ŋga kɛdɩnɩ-wɛ nɛ pɩkɩlɩ. Mba pasɩm takayɩsɩ camɩyɛ yɔ, nabʋyʋ taa papɩzɩɣ nɛ pɔsɔɔlɩ tɔm kalʋʋ nɛ tɔm pɔzʋʋ, ɛlɛ weyi ɛɛpɩzɩɣ kalʋʋ camɩyɛ yɔ, tɔm wɩlʋʋ nʋmɔʋ kʋnɛ kɩpɩzɩɣ nɛ kɩcɛyɩ-ɩ. Weyi ɖɩwɩlɩɣ-ɩ Bibl tɔm yɔ, ye ɛsɩm kalʋʋ pazɩ yɔ, ɖɩpɩzɩɣ nɛ ɖɩha-ɩ hatʋ cabɩ takayɩsɩ Laŋhɛzɩyɛ Tɔm Ndʋ Tɩlɩnɩ Ɛsɔ Cɔlɔ Yɔ!, Ŋpɩzɩɣ Ŋkɛ Ɛsɔ Taabalʋ! yaa Bibl kadasɩ takayaɣ.
3. Ðɩɩwɩlɩɣ Bibl mba paasɩŋ kalʋʋ camɩyɛ yɔ lɛ, ɛbɛ pɩzɩɣ nɛ pɩsɩnɩ-ɖʋ nɛ pɩlʋlɩ pe kɩbana?
3 Sam-wɛ: Ɛyaa mba paasɩŋ kalʋʋ yɔ, pa-taa sakɩyɛ sɩm lɔŋ nɛ papɩzɩɣ nɛ pɛkpɛlɩkɩ tɔm sakɩyɛ. Ha-wɛ ñamtʋ nɛ ŋɖʋ-wɛ hɩɖɛ (1 Pɩy. 3:15, 16) Ye ŋlabɩ mbʋ yɔ, pɩsɩɣnɩ-wɛ nɛ pana se peɖiɣni ɖɛnʋʋ ɛzɩdaa fezuu taa, pana wena pañakɩ yɔ, atɩkɛ falaa nɛ pɩkpazɩ-wɛ ɖoŋ nɛ powolo kpɛlɩkʋʋ yɔɔ. Pʋyɔɔ lɛ, pɩcɛyaa se ŋsam-wɛ ɖoŋ ɖoŋ.
4. Nʋmɔŋ weyi yɔɔ ɖɩpɩzɩɣ ɖɩtɩŋna nɛ ɖiseɣti mba kalʋʋ wɛ-wɛ kaɖɛ yɔ se pɔñɔɔzɩ pa-tɩ pʋcɔ nɛ kpɛlɩkʋʋ alɩwaatʋ talɩ?
4 Paa tɔmkpɛlɩkɩyʋ ɛɛpɩzɩɣ kalʋʋ camɩyɛ yɔ, seɣti-i se ɛñɔɔzɩ camɩyɛ ɖenɖe ɩkaɣ kpɛlɩkʋʋ yɔ, pʋcɔ nɛ kpɛlɩkʋʋ alɩwaatʋ talɩ. Afrika Hadɛ kiŋ tɔm susuyaa nabɛyɛ seɣtiɣ pe-Bibl kpɛlɩkɩyaa se pɔpɔzɩ pɔ-hɔʋ taa tʋ yaa pa-taabalʋ weyi ɛsɩm kalʋʋ camɩyɛ yɔ se ɛsɩnɩ-wɛ. Krandɩ Pretaañɩ tɔm susuyu nɔɔyʋ ñɛcɛlɩɣ ɛ-takayaɣ ŋga ɛtɛm ñɔɔzʋʋ camɩyɛ yɔ e-Bibl kpɛlɩkɩyaa, kpɛlɩkʋʋ alɩwaatʋ taa se pɩsɩnɩ-wɛ nɛ pana ɛzɩma pɩwɛɣ kɛlɛʋ se pocosi tɔm yɔɔ ye pɛhɛ tɔm cosuu tɛɛ camɩyɛ nɛ pʋcɔ alɩwaatʋ talɩ yɔ. Ɛndɩ koobu nɔɔyʋ ñeseɣtiɣ e-Bibl kpɛlɩkɩyaa se pɔcɔnɩ kɩlɛmɩŋ weyi ɩwɛ kpɛlɩkʋʋ mbʋ pakaɣ labʋ yɔ, pɩ-taa nɛ pamaɣzɩ pɩ-yɔɔ pʋcɔ nɛ kpɛlɩkʋʋ alɩwaatʋ talɩ.
5. Ɛzɩma ɖɩpɩzɩɣ nɛ ɖɩwɛnɩ suuɖu alɩwaatʋ ndʋ ɖiɖiɣni wɩlʋʋ Bibl tɔm weyi ɛɛsɩŋ kalʋʋ camɩyɛ yɔ?
5 Wɛɛnɩ suuɖu: Paa takayaɣ ŋga ŋlakɩnɩ tʋmɩyɛ yɔ, ñɩɣ niye hɔɔlʋʋ ŋgʋ ɩkpɛlɩkɩɣ yɔ, kɩ-taa lɩmaɣza sɔsɔna yɔɔ nɛ ŋsɩnɩ ñe-Bibl kpɛlɩkɩyʋ nɛ ɛnɩɩ a-taa kpayɩ kpayɩ. Hɔɔlʋʋ ŋgʋ ɩkpɛlɩkɩɣ yɔ, kɩtaakɩlɩ ɖɔʋ, pɩpɩzɩɣ nɛ pɩkɛnɩ tayʋʋ pazɩ yem. Ye Bibl kpɛlɩkɩyʋ ɛɛkalɩɣ lɔŋ lɔŋ yɔ, taakpedesi-i. Sɔɔlɩm mbʋ ɛwɛnɩ Yehowa yɔɔ yɔ, pɩwɛɣ nɛ pɩpaɣlɩɣ lɛ, pɩkaɣ-ɩ sɩnʋʋ siŋŋ nɛ ɛka ñʋʋ nɛ ɛwɛɛ niye tɔm kalʋʋ taa. Pɩsa nɛ ɛɖɛɛnɩ ɛzɩdaa camɩyɛ mbʋ lɛ, pɩwɛɣ ɖeu se kpaɣnɩ alɩwaatʋ ndʋ ɩpaɣzɩɣ kpɛlɩkʋʋ yɔ, ŋseɣtiɣ-i se ɛpaɣzɩ kediɣzisi wobu.
6. Ɛzɩma ɖɩpɩzɩɣ nɛ ɖɩsɩnɩ ɛyaa nɛ pɛkpɛlɩkɩ kalʋʋ?
6 Ye mba pɛkpɛlɩkɩɣ Bibl yɔ, pasɩm kalʋʋ camɩyɛ yɔ, pɩkaɣ-wɛ sɩnʋʋ siŋŋ nɛ papɩɩ fezuu taa lɔŋ. (Keɣa 1:1-3) Ye ŋnawa se pitiki ñe-Bibl kpɛlɩkɩyʋ toma taa yɔ, ŋpɩzɩɣ nɛ ŋtɔzʋʋ-ɩ mbʋ mbʋ ɛtɛm paɣzʋʋ labʋ camɩyɛ yɔ, pɩ-yɔɔ nɛ pɩkpazɩ-ɩ ɖoŋ. Seɣti-i se ɛtɩmɩɣnɩ Yehowa nɛ ɛpɔzʋʋ-ɩ se ɛsɩnɩ-ɩ; sɩnɩ-ɩ ɖɔɖɔ nɛ ɛtaapɩtɩ kaaʋ se ɛkaɣ wazʋʋ ɛ-pana ñaɣʋ yɔɔ. (Aduwa 16:3; 1 Yohanɛɛsɩ 5:14, 15) Pɩsa nɛ ŋsɩnɩ ɛyaa nɛ pakpasɩ tɔm kalʋʋ taa camɩyɛ lɛ, pɩwɛɛ se ŋsɩnɩ-wɛ nɛ pɔsɔɔlɩ kalʋʋ tɔm siŋŋ, pɩtaasɩɩnɩ ɛzɩma pakalɩ tɔm camɩyɛ yɔ, pɩ-wɩlʋʋ ɖeke.
7. Ɛbɛ yɔɔ pɩfɛyɩ se toovenim tɔm wɩlʋʋ mba paapɩzɩɣ kalʋʋ camɩyɛ yɔ, ɛlabɩ-ɖʋ feendu?
7 Paa ɛyʋ etiwolo sukuli nɛ pɩɖɔɔ yɔ, ɛmʋ ñɩm siŋŋ Yehowa ɛzɩdaa. (Yɔb 34:19) Ɛyʋ laŋɩyɛ taa Yehowa cɔŋna. (3 Aw. 28:9) Ye mbʋ, pɩtaalabɩ-ŋ feendu nɛ toovenim tɔm wɩlʋʋ mba kalʋʋ wɛ-wɛ kaɖɛ yɔ. Ŋwɛnɩ tʋmɩyɛ wondu kɩbandʋ sakɩyɛ ndʋ ŋpɩzɩɣ nɛ ŋpaɣzɩnɩ yɔ. Pɩkɔŋ nɛ pɩɖɛɛnɩ ɛzɩdaa lɛ, ŋpɩzɩɣ nɛ ŋkpaɣ Ndʋ Bibl Wɩlɩɣ takayaɣ nɛ ŋtɩŋnɩ kɔ-yɔɔ nɛ ñe-Bibl kpɛlɩkɩyʋ tɩlɩ Bibl wɩlɩtʋ camɩyɛ kpayɩ kpayɩ.