Ɛzɩma Yehowa cɔŋnɩ-m?
1. Ɛbɛ yɔɔ pɔtɔŋ se Bibl wɛ ɛzɩ ñɩnʋʋ yɔ?
1 Tam ɛzɩma ŋcɔŋnɩ ña-tɩ ñɩnʋʋ taa? Ða-taa sakɩyɛ cɔŋnɩ pa-tɩ ñɩnʋʋ taa paa evemiye nɖɩ, pɩsɩɣnɩ-ɖʋ nɛ ɖɩna hɔɔlɩŋ weyi pʋmʋnaa se ɖɩñɔɔzɩ yɔ. Pakpaɣ Bibl nɛ pamaɣzɩnɩ ñɩnʋʋ mbʋ pʋyɔɔ yɔ, kɩ-kalʋʋ sɩɣnɩ-ɖʋ se ɖɩtɩlɩ mbʋ pɩwɛ ɖa-laŋɩyɛ taa yɔ, yaa ɛyʋ weyi ɖɩkɛnaa siŋŋ yɔ; ɛyʋ ɛnʋ Yehowa cɔŋna. (1 Sam. 16:7; Yak. 1:22-24) Ɛsɔtɔm pɩzɩɣ nɛ “tɩtɩlɩ mbʋ pɩwɛ laŋɩyɛ taa nɛ maɣzɩm taa yɔ.” (Ebr. 4:12) Ye ɖɩkalɩɣ Bibl nɛ ɖɩmaɣzɩɣ kɩ-yɔɔ paa evemiye nɖɩ yɔ, pɩsɩɣnɩ-ɖʋ nɛ ɖɩtɩlɩ hɔɔlʋʋ ŋgʋ pʋmʋnaa se ɖɩñɔɔzɩ nɛ pɩsa nɛ ɖɩkɛ tɔm susuyaa kɩbama yɔ. Ɛzɩma tɩyɛ?—Keɣa 1:1-3.
2. Ɛzɩma Bibl pɩzɩɣ nɛ kɩsɩnɩ-ɖʋ nɛ ɖiwili ɖa-taa?
2 Labɩnɩ Bibl tʋmɩyɛ ɛzɩ ñɩnʋʋ yɔ: Bibl kɛdasɩ sakɩyɛ yɔɔdʋʋ Yehowa sɛyaa mba paawɛ siɣsiɣ yɔ pɔ-tɔm. Kɛdasɩ nzɩ sɩkpɛlɩkɩɣ-ɖʋ wɛtʋ kɩbandʋ ndʋ ɛsɔɔlaa yɔ. Daviid kaawɩlɩ kpekpeka Yehowa hɩɖɛ yɔɔ. (1 Sam. 17:45, 46) Izaayii ñaawɛ abalɩtʋ, pʋyɔɔ etisaa nɛ esusi tɔm kooka ŋga ka-taa pɩtaawɛɛ yɔɔɔ yɔ. (Iz. 6:8, 9). Yesu ñaasɔɔlɩ ɛ-Caa pɩdɩɩfɛyɩ, pʋyɔɔ ɛ-Ɛsɔ sɛtʋ taakɛ-ɩ sʋʋtʋ, ɛlɛ tɩɩkɛ-ɩ leleŋ nɛ laŋhɛzɩyɛ pʋyʋ. (Yoh. 4:34). Kajalaɣ pɩnzɩ mɩnʋʋ taa Krɩstʋ mba susaɣ tɔm nɛ kpekpeka nɛ pataɣ Yehowa liu, paatɛm pa-taa se paapɩsɩɣnɩ pa-wayɩ kpa. (Tʋma 5:41, 42; 2 Kɔr. 4:1; 2 Tim. 4:17) Ye ɖɩmaɣzɩɣ kɩɖaŋ ɩnɩ ɩ-yɔɔ yɔ, pɩsɩɣnɩ-ɖʋ nɛ ɖiwili ɖa-taa nɛ ɖɩñɔɔzɩ ɖɛ-wɛtʋ nɛ tɩmʋnɩ ɖɛ-Ɛsɔ sɛtʋ.
3. Ɛbɛ yɔɔ pɩcɛyaa se ɖɩlɛɣzɩ wɛtʋ kpɛdɛyɛ?
3 Ñɔɔzɩ ñɛ-ɛjandʋ: Toovenim taa lɛ, pɩtɩmʋna se ɖɩcɔnɩ ɖa-tɩ ñɩnʋʋ taa nɛ ɖihuuzi ɛza hɔɔlɩŋ weyi pʋmʋnaa se ɖɩñɔɔzɩ yɔ ɩ-yɔɔ. Ðɩpɩzɩɣ nɛ ɖɩpɔzɩ Yehowa se ɛsɩnɩ-ɖʋ nɛ ɖiwili ɖa-taa nɛ toovenim nɛ ɖɩpɩzɩ nɛ ɖɩñɔɔzɩ hɔɔlɩŋ weyi pɩpɔzʋʋ yɔ. (Keɣa 138:23, 24; Luka 11:13) Alɩwaatʋ ndʋ tɩkazaa yɔ, tɩtɩɖɔɔ nɛ ɛyaa weziŋ sakɩyɛ wɛ kaɖɛ taa, pʋyɔɔ pɩcɛyaa se ɖɩlɛɣzɩ wɛtʋ kpɛdɛyɛ.—1 Kɔr. 7:29; 1 Tim. 4:16.
4. Ɛbɛ talɩɣ ɛyʋ weyi ɛñɔʋnɩ Ɛsɔtɔm nɛ ɛɖɔŋ tɩ-yɔɔ yɔ?
4 Mbʋ ɖɩkɛnaa siŋŋ ɖa-laŋɩyɛ taa yɔ Yehowa cɔŋna, nɛ pɩ-tɔm kɩlɩnɩ cɛyʋʋ; pɩtɩkɛ mbʋ pɩnaɣ ɛzɩdaa yem yɔ. (1 Pɩy. 3:3, 4) Ɛbɛ talɩɣ ɛyʋ weyi ɛñɔʋnɩ Ɛsɔtɔm kpam nɛ ɛɖɔŋ tɩ-yɔɔ yɔ? Ɛpɩsɩɣ ɛyʋ weyi “ɛtɩkɛ welisiyu lizɔʋ tʋ yɔ, ɛlɛ ɛñakɩ pana nɛ ɛɖɔŋ tɩ-yɔɔ camɩyɛ . . ., ɛyʋ ɛnʋ yɔ ehikiɣ koboyaɣ paɣtʋ yɔɔ ɖɔm yɔɔ.” (Yak. 1:25). Toovenim, ye “ɖɩñɩlɩsɩɣ nɛ Kɩbaɣlʋ ɖoŋ ɛzɩ ñɩnʋʋ taa yɔ,” ɖɩwɛɣnɩ taa leleŋ siŋŋ nɛ ɖɩkɛ tɔm susuyaa mba pɛwɛ niye yɔ.—2 Kɔr. 3:18.