Ɩkɛ nayaa lɛzɩŋ: Nahum
1. Ɛbɛ Nahum takayaɣ kpɛlɩkɩɣ-ɖʋ?
1 Ɛzɩ Niniivi njaa wɩlʋʋ yɔ, Yehowa eeyeki e-koyindinaa nɩŋgbaaŋ hɔm ɛzɩ Nahum kaayɔɔdʋʋ yɔ; nɛ halɩ Yehowa koyindinaa mba pakɩlɩ patʋ yɔ, paapɩzɩɣ nɛ pakaɖɩnɩ-ɩ. (Nah. 1:2, 6) Ye ɖɩtazɩ Nahum natʋ tɔm taa camɩyɛ yɔ, tɩkpɛlɩkɩɣ-ɖʋ lɔŋ sakɩyɛ nɛ pɩwazɩ-ɖʋ tɔm susuu taa.
2. Ɛzɩma ɖɩla nɛ tɔm ndʋ ɖisusuu yɔ, tɩkɛ tɔm kɩbandʋ paa ɛzɩmtaa?
2 Kɛhɛzɩɣ laŋɩyɛ nɛ kahaɣ lidaʋ: Ŋcalɩɣ kalʋʋ Nahum takayaɣ lɛ, pɩlakɩ-ŋ ɛzɩ Niniivi, Asiirii tɛtʋ sɔsɔtʋ, kʋñɔŋ nɛ tɩ-nɩŋgbaaŋ hɔm tɔm yeke pɔyɔɔdʋʋ ka-taa yɔ. (Nah. 1:1; 3:7) Ɛlɛ pɩɩkɛ tɔm kɩbandʋ Yehowa samaɣ. Nahum hɩɖɛ tɔbʋʋ lɛ se “laŋɩyɛ hɛzɩyʋ,” nɛ pɩɩha Yuda mba lidaʋ se pɩkazɩ pazɩ lɛ, po-koyindinaa ɩɩtasɩɣ wɛʋ. Pʋwayɩ lɛ, Nahum tasɩ yɔɔdʋʋ se Kɩbaɣlʋ kɛ “ɖɩjɔzɩyɛ kʋñɔŋ kɩyakʋ wiye.” (Nah. 1:7) Ðiisusuu laŋhɛzɩyɛ tɔm lɛ, ɖiseɣtiɣ ɛyaa se pañaɣ pana nɛ Yehowa pɩsɩ pa-ɖɩjɔzɩyɛ.—Nah. 2:1.
3. Ɛzɩ Nahum yɔ, ɛzɩma ɖɩpɩzɩɣ nɛ ɖɩlabɩnɩ kɩɖaŋ tʋmɩyɛ?
3 Labɩnɩ kɩɖaŋ tʋmɩyɛ: Yehowa heyi Nahum se ɛkpaɣ Niniivi tɛtʋ yɔɔkʋʋ nɛ ɛmaɣzɩnɩ Egipiti tɛtʋ ndʋ payaɣ se Tɛɛbɩ (Nowaamɔɔ) yɔ, tɩ-yɔɔkʋʋ; Asiirii kaayɔkɩnɩ tɛtʋ ndʋ. (Nah. 3:8-10) Ðiiheyiɣ ɛyaa ɛjaɖɛ ɖɩnɛ ɖɩ-tɛm tɔm lɛ, ɖɩpɩzɩɣ nɛ ɖɩñɩɣ niye Bibl natʋ tɔm ndʋ tɩwɩlɩɣ se Yehowa tɔm tɩŋa payɩ lakɩ yɔ tɩ-yɔɔ. Ðɩkpaɣ kɩɖaʋ kʋnɛ: Alɩwaatʋ ndʋ Babilooni mba nɛ Meedii mba powoba se pɔyɔkʋʋ Niniivi tɛtʋ pɩnaɣ 632 P.Ð.A yɔ, tɛʋ sɔsɔʋ nakʋyʋ nɩwa nɛ kiyele nɛ Tiigri pɔɔ su nɛ kawadɩ nɛ kɔyɔkɩ tɛtʋ kolonzi nzɩ ɛyʋ taapɩzɩɣ se ɛtɛzɩ-sɩ nɛ ɛsʋʋ tɛtʋ taa yɔ. Peeɖe pɔyɔkɩ Niniivi tɛtʋ kɛlɛʋ yem ɛzɩ Yehowa kaayɔɔdʋʋ yɔ.—Nah. 1:8; 2:7.
4. Ðiisusuu tɔm lɛ, ɛzɩma ɖɩpɩzɩɣ nɛ ɖɩla nɛ ɖɔ-tɔm wɛɛ kpayɩ kpayɩ nɛ panɩɩ tɩ-taa?
4 Ñɔ-tɔm ɛwɛɛ kpayɩ kpayɩ nɛ panɩɩ tɩ-taa: Nahum kamaɣaɣ tɔm lɛ, ɛwɩlaɣ ɛzɩma tɩkaɣ labʋ ɖeyi ɖeyi yɔ nɛ tɩɩwɛ sɔɔndʋ pazɩ. Ɛlɛ tɩ-taa kaatʋ kpayɩ kpayɩ. (Nah. 1:14; 3:1) Ða ɖɔɖɔ, pɩwɛɛ se ɛyaa ɩnɩɩ tɔm ndʋ ɖɩyɔɔdʋʋ yɔ, tɩ-taa kpayɩ kpayɩ. (1 Kɔr. 14:9) Puwiye nɖɩ ŋcalɩɣ wobu ɛyʋ nɔɔyʋ tɛ yɔ, heyi-i mbʋ pɩ-yɔɔ ŋwobi peeɖe yɔ kpayɩ. Ña nɛ ɛyaa ɩɩkpɛlɩkɩɣ Bibl lɛ, sɩnɩ-wɛ nɛ pɛwɛɛnɩ tisuu Yehowa tɔm yɔɔ; sɩnɩ-wɛ nɛ patɩlɩ ɖɔɖɔ ɛzɩma tɔm ndʋ tɩpɩzɩɣ nɛ tɩwazɩ pa-maɣmaɣ yɔ.—Rom. 10:14.
5. Nahum natʋ tɔm haɣ-ɖʋ lidaʋ ŋgʋ?
5 Nahum kaata liu se tɔm ndʋ payɩ Yehowa kaatɩŋnɩ ɛ-yɔɔ nɛ ɛma yɔ, tɩ-tɩŋa tɩkaɣ labʋ. Sataŋ ɛjaɖɛ tɩnaɣ ɖiɣni ñɔtʋʋ pɩdɩɩfɛyɩ, nɛ Yehowa tɔm tʋnɛ tɩhɛzɩɣ ɖa-laŋa: “kʋñɔŋ kɩlɛlʋʋ ɛɛkaɣ lɩʋ.”—Nah. 1:9.