Ɛzɩma ɖɩkpɛlɩkɩnɩ ɛyaa Bibl nɛ pɩlʋlɩ pee kɩbana yɔ
1. Sʋʋtʋ ndʋ paa tɔm susuyu weyi lɛ, ɛwɛna?
1 Nɔɔyʋ ɛɛpɩzɩɣ nɛ ɛsɛɛ Ɛsɔ ye Yehowa maɣmaɣ ‘ɛtɩkɔnɩ-ɩ nɛ ɛ-yɔɔ kɔyɔ.’ (Yoh. 6:44) Paa mbʋ yɔ, tɔm susuyaa sʋʋtʋ pɩkɛnaa se pala pa-tʋmɩyɛ camɩyɛ nɛ pɩsɩnɩ Bibl kpɛlɩkɩyaa nɛ pɔñɔtɩnɩ pa-Caa weyi ɛwɛ ɛsɔdaa yɔ kɛlɛʋ. (Yak. 4:8) Pʋyɔɔ lɛ, pɩcɛyaa se ɖɩñɔɔzʋʋ ɖa-tɩ camɩyɛ. Ye ɖɩkalɩɣ takayaɣ taa yem nɛ ɖɩpɔzʋʋ tɔm yɔ, pɩɩkaɣ sɩnʋʋ weyi ɛkpɛlɩkɩɣ Bibl yɔ nɛ ɛɖɛɛnɩ ɛzɩdaa.
2. Hɔɔlɩŋ weyi taa pɩwɛɛ se ɖɩsɩnɩ Bibl kpɛlɩkɩyʋ nɛ ɛɖɛɛnɩ ɛzɩdaa?
2 Pɩsa nɛ ɖɩkpɛlɩkɩnɩ ɛyaa Bibl nɛ pɩlʋlɩ pee kɩbana lɛ, pɩpɔzʋʋ se ɖɩsɩnɩ Bibl kpɛlɩkɩyʋ nɛ: (1) ɛnɩɩ tɔm ndʋ Bibl wɩlɩɣ yɔ, tɩ-taa camɩyɛ, (2) etisi Bibl wɩlɩtʋ yɔɔ se tɩkɛ toovenim nɛ (3) ɛlabɩnɩ tʋmɩyɛ Bibl wɩlɩtʋ e-wezuu caɣʋ taa. (Yoh. 3:16; 17:3; Yak. 2:26) Pɩcɔ ɖɩsɩnɩ ɛyʋ nɛ ɛkpɛzɩ nɩŋgbanzɩ nzɩ sɩ-tɩŋa lɛ, pɩpɩzɩɣ nɛ pɩkpaɣ fenasɩ sakɩyɛ. Ɛlɛ paa nɩŋgbaŋaɣ ŋga lɛ kɔ-tɔm cɛyɩ siŋŋ nɛ kasɩɣnɩ-ɩ se ɛha ɛ-tɩ Yehowa nɛ ɛ nɛ ɩ pa-taabalɩyɛ cɛyɩsɩ nɛ pɩkɩlɩ.
3. Pʋcɔ nɛ ɖɩkɛnɩ wɩlɩyaa kɩbama lɛ, ɛbɛ yɔɔ pɩcɛyaa se ɖɩpɔzʋʋ tɔm ndʋ tiyeki nɛ ɖɩtɩlɩ kpɛlɩkɩyʋ lɩmaɣza yɔ?
3 Suwe Bibl kpɛlɩkɩyʋ maɣzɩɣ? Pɩsa nɛ ɖɩna se weyi ɖɩkpɛlɩkɩɣnɩ-ɩ Bibl yɔ, ɛnɩɣ ndʋ ɖɩkpɛlɩkɩɣ yɔ, tɩ-taa nɛ etisiɣ tɩ-yɔɔ lɛ, pɩtɩpɔzɩ se ɖɩyɔɔdʋʋ sakɩyɛ, ɛlɛ pɩwɛɛ se ɖiyele nɛ ɛ-maɣmaɣ eheyi-ɖʋ ɛ-lɩmaɣza. (Yak. 1:19) Bibl tɔm ndʋ ɖiɖiɣni kpɛlɩkʋʋ yɔ, ɛnɩɣ tɩ-taa camɩyɛ na? Ɛpɩzɩɣ ɛkpaɣ ɛ-tɔm pee maɣmaɣ nɛ ɛlɩzɩnɩ nɔɔyʋ tɩ-taa? Tɔm ndʋ ɛkpɛlɩkɩɣ yɔ, ɛnɩɣ leleŋ tɩ-yɔɔ yaa lɩmaɣza wena ɛwɛnɩ tɩ-yɔɔ? Ɛmaɣzɩɣ se tɔm ndʋ Bibl wɩlɩɣ yɔ, tɩmʋnaa? (1 Tes. 2:13) Ɛnɩ pɩ-taa se tɔm ndʋ ɛwɛɛ nɛ ɛkpɛlɩkɩɣ yɔ, pɩwɛɛ se eyele nɛ tɩlɛɣzɩ e-wezuu caɣʋ na? (Kol. 3:10) Pɩsa nɛ ɖicosi tɔm tʋnɛ tɩ-yɔɔ camɩyɛ lɛ, pɩcɛyaa se ɖɩlɩzɩ tɔm ndʋ ɖɩpɔzʋʋ kpɛlɩkɩyʋ yɔ camɩyɛ nɛ pɩsa nɛ eheyi-ɖʋ ɛ-lɩmaɣza, nɛ pʋwayɩ lɛ, ɖiwelisini-i.—Mat. 16:13-16.
4. Ye pɩwɛ kaɖɛ ɖe-Bibl kpɛlɩkɩyʋ se etisi yaa ɩɖɔ Bibl tɔm ndʋ ɖɩwɩlɩɣ-ɩ yɔ, tɩ-yɔɔ yɔ, ɛbɛ pɩpɔzʋʋ se ɖɩla?
4 Wɛtʋ ndʋ ɖɩwɛna yaa lɩmaɣza wena ɖɩwɛna yɔ, ɖoŋ ɖoŋ lɛ, a-lɛɣzʋʋ fɛyɩ kɛlɛʋ; pɩpɔzʋʋ-ɖʋ alɩwaatʋ sakɩyɛ pʋcɔ nɛ ɖɩpɩzɩ nɛ ɖɩlɛɣzɩ. (2 Kɔr. 10:5) Pʋyɔɔ lɛ, ye kpɛlɩkɩyʋ ititisi ndʋ ɖɩyɔɔdʋʋ yɔ, tɩ-yɔɔ yaa ɛɛlakɩnɩ-tʋ tʋmɩyɛ yɔ, ɛbɛ pɩwɛɛ se ɖɩla? Pɩpɔzaa se ɖɩwɛɛnɩ suuɖu nɛ ɖɩha alɩwaatʋ sakɩyɛ Ɛsɔtɔm nɛ fezuu kiɖeɖeu se kɩla tʋmɩyɛ kpɛlɩkɩyʋ laŋɩyɛ yɔɔ. (1 Kɔr. 3:6, 7; Ebr. 4:12) Pɩfɛyɩ ɖeu se ɖɩñɩɣ kpɛlɩkɩyʋ yɔɔ se etisi ndʋ ɖɩwɩlɩɣ-ɩ yɔ, yaa ɩɖɔ tɩ-yɔɔ; ɛlɛ pɩwɛɣ ɖeu se ɖɩɖɛɛnɩ ɛzɩdaa nɛ ɖɩkpɛlɩkɩ tɔm ñʋŋ lɛɛŋ. Ye ɖiwobi pɩ-yɔɔ nɛ ɖɩɖʋʋ suuɖu nɛ ɖɩwɩlɩɣ-ɩ Bibl taa tɔm nɛ sɔɔlɩm yɔ, alɩwaatʋ wɛɣ nɛ tɩɖɛɣ lɛ, pɩpɩzɩɣ piseɣtiɣ-i nɛ ɛlɛɣzɩ e-wezuu caɣʋ nɛ kɩtʋʋzɩ.