Tɩŋnɩ agɔma mʋʋ yɔɔ nɛ ŋha ‘kɩbam’ mbʋ ŋwɛna yɔ (Mat. 12:35a)

Ða-tɩŋa payɩ ɖɩsɔɔlaa se ɖɩtɩŋnɩ ‘agɔma mʋʋ lɛɛ lɛɛ’ yɔɔ nɛ ɖɩha ‘kɩbam’ mbʋ ɖɩwɛna yɔ. (Roma 12:13) Paaheyi ɛgbɛyɛ taa ɛzʋtʋyaa se pɛɖɛɛ nɔɔ pɩ-labʋ taa nɛ pɛhɛyɩɣ mba pɔkɔŋ pɔyɔɔdʋʋ samaɣ taa tɔm pɛ-ɛgbɛyɛ taa yɔ pa-nʋmɔʋ liidiye, nɛ pamʋʋ-wɛ ɖɔɖɔ pɛ-tɛ nɛ pa nɛ wɛ pɔtɔkɩ tɔɔnasɩ. Ɛlɛ pɩtɔma yɔ, pɩkpaɣ-ɖʋ sɔɔndʋ se ɖɩmʋ-wɛ ɛgɔndʋ, mbʋ pʋyɔɔ yɔ, ɖɩfɛyɩnɩ mbʋ ɖɩmʋnɩ-wɛ yɔ yaa sɔɔndʋ kpaɣ-ɖʋ nɛ ɛzɩma pɩpɔzʋʋ se ɖɩñɔɔzɩ ɖa-tɩ siŋŋ nɛ pʋcɔ ɖɩmʋ agɔma mba yɔ. Ɛlɛ ye ɖɩlakɩnɩ tʋmɩyɛ lɔŋ tasʋʋ mbʋ Yesu ha Maarta yɔ, pɩsɩɣnɩ-ɖʋ nɛ ɖɩwa nɩɣzɛ ana. (Luka 10:39-42) Yesu yɔɔdɩ kpayɩ se “mbʋ pɩkɩlɩ ɖeu” agɔma mʋʋ taa yɔ, mbʋ lɛ, koobiɖe nɛ ɖama ɖoŋ kpazʋʋ, pɩtɩkɛ tɔɔnaɣ ŋga pakpaɣ alɩwaatʋ sakɩyɛ nɛ palabɩna yɔ, yaa ɖɩɣa ñɔɔzʋʋ sakɩyɛ. Ye ɖɩlakɩnɩ Yesu lɔŋ tasʋʋ pʋnɛ tʋmɩyɛ yɔ, ɖa-tɩŋa ɖɩkaɣ pɩzʋʋ nɛ ɖɩha ɖo-koobiya ‘kɩbam’ mbʋ ɖɩwɛna yɔ, ɛzɩ Bibl pɔzʋʋ yɔ.​—3 Yoh. 5-8.