Kpɛlɩkɩ lɔŋ tɔm susuyaa mba papɩwa yɔ, pɔ-cɔlɔ
Ɛgbɛyɛ taa koobiya mba papɩ fezuu taa yɔ, pɛwɛ ñɩm ɖɛ-ɛzɩdaa pɩdɩɩfɛyɩ. Pa-taa nabɛyɛ wɛʋ nɛ pɛsɛɣ Yehowa yɔ, pɩlakɩ pɩnzɩ sakɩyɛ yɔ. Lalaa kpɛlɩkʋʋ nɛ pɛwɛɛ niye tɔm susuu taa yɔ, pɩtɩla pitileɖita. Tɔm susuyaa mba pana ɛzɩma Yesu wɛɛ nɛ eɖiyiɣ ɛgbɛyɛ nɛ eyeki se tɔm susuu nɛ Bibl kpɛlɩkʋʋ tʋmɩyɛ powobini ɛzɩdaa kɛdɛzaɣ kɩyakɩŋ ɛnɛ ɩ-taa yɔ. (Mat. 28:19, 20) Alɩwaatʋ ndʋ pakatɩ nazɩm yaa kʋñɔŋ nakʋyʋ yɔ, tɔm susuu tʋmɩyɛ sɩnɩ-wɛ nɛ pehiɣ ɖoŋ weyi ɛcɛzɩ pa-maɣmaɣ po-ɖoŋ yɔ. (2 Kɔr. 4:7) Ye mbʋ koobiya mba papɩzɩɣ nɛ pɛkpɛlɩkɩ-ɖʋ lɔŋ sakɩyɛ. Ye pɩha-wɛ nʋmɔʋ yɔ, pawɩlɩɣ lalaa mbʋ pɛkpɛlɩkɩ pe-wezuu caɣʋ taa yɔ nɛ taa leleŋ. (Keɣa 70:18) Pʋyɔɔ pɩwɛɛ se ɖɩñɩnɩ nʋmɔŋ weyi ɩpɩzɩɣ ɩha-ɖʋ waɖɛ nɛ koobiya mba pɛkpɛlɩkɩ-ɖʋ lɔŋ yɔ. Ɛbɛ ɖɩpɩzɩɣ nɛ ɖɩla?
Tɔm susuu taa. Pʋpɔzaa se pahayɩsɩ tɔm susuyaa kɩfama pʋcɔ nɛ papɩzɩ nɛ pɛwɛɛ niye tɔm susuu taa. Ye pɔcɔŋnɩ ɛzɩma tɔm susuyaa mba papɩwa yɔ posusuu tɔm yɔ, papɩzɩɣ nɛ pɛkpɛlɩkɩ lɔŋ pɔ-cɔlɔ. (Cɔnɩ 15 février 2015 tɛ Feŋuu Tilimiye (Fransɩɩ taa) ñʋʋ ŋgʋ kɩtɔŋ se “Ɩwɛɛ kpekpeka tɔm susuu taa tam” yɔ kɩ-tɛ ñʋʋ cikpeluu “Sɩnɩ mba patɩpɩta yɔ,” tayʋʋ 3.) Wiɖiyi koobiya mba papɩwa yɔ, pa-taa nɔɔyʋ sɩnɩ-ŋ tɔm susuu taa nɛ pɩwazɩ-ŋ?
Ŋpɩzɩɣ nɛ ŋpɔzɩ koobu weyi ɛpɩ tɔm susuu taa camɩyɛ yɔ se ña nɛ ɩlɩɩ? Ye koobu ɛnʋ ɛkɛ taɖɩyɛ tʋ yɔ, ŋpɩzɩɣ nɛ ŋheyi ñe-Bibl kpɛlɩkɩyaa nɛ ña nɛ wɛ iwoki ɛ-tɛ wiɖiyi wiɖiyi nɛ ɩkpɛlɩkɩɣ Bibl. Kpɛlɩkʋʋ mbʋ pɩtɛŋ lɛ, ŋpɔzɩ-ɩ nɛ ɛtasɩ-ŋ lɔŋ.
Kpakɩɣ alɩwaatʋ nɛ ña nɛ wɛ ɩlakɩ faawɩyɛ: Kpaɣ alɩwaatʋ nɛ ña nɛ koobiya mba papɩ tɔm susuu taa yɔ, ɩcakɩ. Yaa pa-taa nɔɔyʋ nɛ ɛkɔɔ mɩ-tɛ hɔʋ taa Bibl kpɛlɩkʋʋ taa nɛ ɩpɔzɩ-wɛ tɔm. Ye koobu ɛnʋ ɛkɛ taɖɩyɛ tʋ yɔ, ɩpɩzɩɣ nɛ ewolo ɛ-tɛ nɛ mɩ nɛ ɩ ɩla hɔʋ taa Bibl kpɛlɩkʋʋ. Pɔzɩ-ɩ nɛ ŋna se ɛzɩmtaa ɛmʋ toovenim? Wazasɩ nzɩ ehiɣaa? Ɛzɩma toovenim wobini ɛzɩdaa mi-kooka taa? Ɛwɛʋ nɛ ɛsɛɣ Yehowa yɔ, taa leleŋ weyi ehikiɣ?
Nɩɩ tɔm taa nɛ ŋtɩlɩ labʋ. Ɛzɩ ɖa ɖɔɖɔ yɔ, koobiya mba papɩ fezuu taa yɔ, pɛfɛyɩ niye tɔm susuu hɔɔlɩŋ tɩŋa taa. (Rom. 12:6-8) Pɩtɩla nabɛyɛ kpadɩyaa nɛ paapɩzɩɣ se pala tɔm susuu tʋmɩyɛ nɛ pɩɖɔɔ. Paa mbʋ yɔ, ɖɩpɩzɩɣ nɛ ɖɩkpɛlɩkɩ lɔŋ sakɩyɛ pɔ-cɔlɔ mbʋ pʋyɔɔ yɔ pɛkpɛlɩkɩ lɛɣtʋ sakɩyɛ nɛ pɛsɛɣ Yehowa camɩyɛ.