Ðɔ-tɔm susuu wondu
1. Ɛbɛ yɔɔ papɩzɩɣ nɛ pakpaɣ kewiyaɣ tɔm susuyaa nɛ pamaɣzɩnɩ wondu lubiyaa?
1 Wondu lubiyaa wɛnɩ tʋmɩyɛ wondu ndɩ ndɩ. Wondu natʋyʋ lɛ, wiɖiyi wiɖiyi palakɩnɩ-tʋ tʋmɩyɛ; ɛlɛ lɛɛtʋ lɛ, palakɩnɩ-tʋ tʋmɩyɛ ɖoŋ ɖoŋ. Wondu lubiyaa mba papɩ pa-tʋmɩyɛ labʋ taa yɔ, pɛwɛnɩ wondu ndʋ pʋpɔzʋʋ-wɛ ɖoŋ ɖoŋ yɔ, po-wondu huyiŋ yaa aɖakasɩ taa; nɛ pasɩm ɛzɩma palabɩnɩ wondu ndʋ tʋmɩyɛ camɩyɛ yɔ. Bibl seɣtiɣ Krɩstʋ tʋ paa weyi se ɛka ñʋʋ nɛ tɔm susuu tʋmɩyɛ nɛ ɛñaɣ pana nɛ ɛkɛ “tʋmɩyɛ laɖʋ weyi fɛyɛ ɛɛkpaɣ-ɩ yɔ.” (2 Tim. 2:15) Ðɔ-tɔm susuu wondu taa lɛ, wonuu ŋgʋ tɔm kɩlɩ cɛyʋʋ? Ɛsɔtɔm tɔm kɩlɩnɩ cɛyʋʋ. Wondu ndʋ ɖɩlakɩnɩ tʋmɩyɛ se ɖɩsɩnɩ ɛyaa nɛ papɩsɩ “tɔm mʋyaa” yɔ, tɩ-taa sɔsɔʋ lɛ. (Mat. 28:19, 20) Ye mbʋ, pɩwɛɛ se ɖɩñaɣ pana nɛ ɖɩwɛɛ niye nɛ ɖɩwɩlɩ Ɛsɔtɔm camɩyɛ. Ɛlɛ, tɔm susuu wondu lɛɛtʋ wɛɛ, ɖɩlakɩnɩ-tʋ tʋmɩyɛ ɖoŋ ɖoŋ; pɩwɛɛ se Krɩstʋ mba tɩŋa ɩkpɛlɩkɩ ɛzɩma pɩmʋnaa se palabɩnɩ-tʋ tʋmɩyɛ camɩyɛ nɛ pawɩlɩ ɛyaa toovenim tɔm yɔ.—Adu. 22:29.
2. Tɔm susuu wondu ndʋ ɖɩwɛna?
2 Ðɔ-tɔm susuu wondu kajalaɣ ñɩndʋ: Pɩtasɩnɩ Bibl lɛ, wondu ndʋ ɖɔɖɔ ɖɩlakɩnɩ tʋmɩyɛ? Kajalaɣ wonuu ŋgʋ ɖɩlakɩnɩ tʋmɩyɛ nɛ ɖɩwɩlɩɣ ɛyaa Bibl taa toovenim tɔm yɔ ŋgʋ lɛ takayaɣ ŋga payaɣ se Tɔm Ndʋ Bibl Wɩlɩɣ Toovenim Taa? Ða nɛ Bibl kpɛlɩkɩyʋ ɖɩtɛŋ takayaɣ ŋga kpɛlɩkʋʋ lɛ, ɖɩkpakɩɣ ŋga payaɣ se“Ɩɖɔkɩ Mɩ-tɩ Kpam Ɛsɔ Sɔɔlɩm Taa” yɔ nɛ ɖɩwɩlɩ-ɩ ɛzɩma ɛpɩzɩɣ ɛɖɔ Bibl paɣtʋ kila yɔɔ paa ɖooye yɔ. Ye mbʋ, pɩwɛɛ se ɖɩtɩlɩ takayɩsɩ nzɩ tʋmɩyɛ labɩnʋʋ camɩyɛ. Pʋmʋnaa se ɖɩɖʋ hatʋ cabɩ takayɩsɩ nasɩyɩ ɖɔɖɔ ɖɔ-tɔm susuu wondu taa. Takayaɣ ŋga payaɣ se Laŋhɛzɩyɛ Tɔm Ndʋ Tɩlɩnɩ Ɛsɔ Cɔlɔ Yɔ! kɛkɛ takayaɣ ŋga kasɩɣnɩ-ɖʋ nɛ ɖa nɛ ɛyaa ɖɩpaɣzɩɣ Bibl kpɛlɩkʋʋ yɔ. Ye ɖo-kooka taa ɛyaa nabɛyɛ ɩɩsɩŋ kalʋʋ camɩyɛ yaa nabɛyɛ ɩyɔɔdʋʋ kʋnʋmɩŋ nɩɩyɩ nɛ ɖɩfɛyɩnɩ ɩ-taa takayɩsɩ yɔ, ɖɩpɩzɩɣ nɛ ɖɩkpaɣ takayaɣ ŋga payaɣ se Welisini Ɛsɔ nɛ Ŋcaɣ Wezuu Tam yɔ nɛ ɖɩlabɩnɩ tʋmɩyɛ. Takayaɣ ŋga kɔ-yɔɔ ɖɩpɩzɩɣ ɖɩtɩŋna nɛ ɖɩsɩnɩ Bibl kpɛlɩkɩyaa se pasʋʋ Yehowa ɛgbɛyɛ taa yɔ ŋga yɔ Mba Lakɩ Yehowa Sɔɔlɩm Sɔnɔ? Videowaa mba papɩzɩɣ pasɩnɩ-ɖʋ nɛ ɖɩla nɛ ɛyaa pɩsɩ tɔm mʋyaa yɔ mba yɔ: Ɛbɛ yɔɔ pɩwɛɛ se ɛyʋ ɛkpɛlɩkɩ Bibl? Ɛbɛ palakɩ Kewiyaɣ Kpaaŋ taa? nɛ Ɛzɩ Ɛsɔ wɛnɩ hɩɖɛ na? Pɩpɔzʋʋ se ɖɩñaɣ pana nɛ ɖɩtɩlɩ wondu ndʋ tʋmɩyɛ labɩnʋʋ camɩyɛ.
3. Kewiyaɣ Ɛsɔ Sɛtʋ Tʋmɩyɛ takayɩsɩ nzɩ sɩkaɣ kɔm yɔ, ɛbɛ sɩkaɣ-ɖʋ sɩnʋʋ nɛ ɖɩla?
3 Kewiyaɣ Ɛsɔ Sɛtʋ Tʋmɩyɛ takayɩsɩ nzɩ sɩkaɣ kɔm yɔ, sɩkaɣ-ɖʋ sɩnʋʋ nɛ ɖɩtɩlɩ ɛzɩma ɖɩpɩzɩɣ nɛ ɖɩla nɛ ɖɩwɛɛ niye nɛ ɖɩlabɩnɩ tɔm susuu wondu tʋmɩyɛ camɩyɛ yɔ. Ye ɖɩñakɩ pana nɛ ɖɩlakɩnɩ wondu ndʋ tʋmɩyɛ camɩyɛ yɔ, pʋbʋ lɛ ɖɩwɛɛ nɛ ɖɩɖɔŋ Bibl lɔŋ tasʋʋ pʋnɛ pɩ-yɔɔ: “Cɔnɩ ña-tɩ yɔɔ nɛ ñɔ-tɔm wɩlʋʋ yɔɔ; wɛɛ wɛtʋ ndʋ yɔ tɩ-taa. Ŋɖɔŋ labʋ mbʋ lɛ, ŋyakɩ ña-maɣmaɣ ña-ñʋʋ nɛ ŋkpɛndɩnɩ mba pewelisiɣni-ŋ yɔ pɛ-ŋgʋ.”—1 Tim. 4:16.