Labɩnɩ tɔm ndʋ tɩwɛ Ndʋ Bibl Wɩlɩɣ takayaɣ taa yɔ tʋmɩyɛ camɩyɛ
Alɩwaatʋ ndʋ Bibl kpɛlɩkɩyʋ kpɛlɩkɩɣ tɔm ndʋ Bibl wɩlɩɣ toovenim taa nɛ ɛɖɔŋ tɩ-yɔɔ yɔ, piyeki nɛ ɛpaɣlɩ fezuu taa nɛ ɛlʋlɩ fezuu taa pee. (Keɣa 1:1-3) Ðɩpɩzɩɣ nɛ ɖɩsɩnɩ ɖe-Bibl kpɛlɩkɩyʋ nɛ ewobini ɛzɩdaa ye ɖɩlakɩnɩ tɔm ndʋ tɩwɛ Ndʋ Bibl Wɩlɩɣ takayaɣ taa yɔ tʋmɩyɛ camɩyɛ yɔ.
Tɔm pɔzʋʋ mbʋ pɩwɛ paa ñʋʋ ŋgʋ kɩ-ɖɩbazɩyɛ yɔ: Tɔm pɔzʋʋ nabʋyʋ wɛ paa ñʋʋ ŋgʋ lɛ, kɩ-ɖɩbazɩyɛ nɛ pocosi pɩ-yɔɔ kpɛlɩkʋʋ taa. Ŋpɩzɩɣ nɛ ŋpɔzɩ Bibl kpɛlɩkɩyʋ tɔm ndʋ se pɩsa nɛ e-liu tɛɛ kɔtɩnɩ kɛdaɣ ŋga ɩkaɣ labʋ yɔ. Yaa ŋpɩzɩɣ nɛ ŋpɔzɩ-ɩ se ecosi ndʋ ɛmaɣzɩɣ yɔ. Ye eticosi camɩyɛ yɔ, pɩtɩcɛyɩ se ŋñɔɔzɩ-ɩ kpaagbaa. Ɛ-tɔm cosuu kaɣ-ŋ sɩnʋʋ nɛ ŋtɩlɩ kpɛlɩkʋʋ hɔɔlʋʋ ŋgʋ kɩ-yɔɔ pɩwɛɛ se ŋñɩɣ niye nɛ pɩkɩlɩ yɔ.—Adu. 16:23; 18:13.
Tɔm kɩsɔzɩtʋ: Ye ɩkpɛlɩkɩ tɔm ñʋʋ nakʋyʋ nɛ kɩwɛɛnɩ tɔm kɩsɔzɩtʋ nɛ pɩla se Bibl kpɛlɩkɩyʋ nɩ tɔm ñʋʋ ŋgʋ kɩ-taa camɩyɛ, nɛ etisi kɩ-yɔɔ yɔ, ɖɩnɛ ɛlɛ ŋpɩzɩɣ nɛ ŋseɣti-i se ɛkalɩ tɔm kɩsɔzɩtʋ ɛ-tɩ yɔɔ. Alɩwaatʋ ndʋ ŋpɩsɩɣ se iwolo kpɛlɩkʋʋ yɔɔ yɔ, ŋpɩzɩɣ nɛ ŋkpaɣ cɛcɛsɩ pazɩ nɛ ŋna se ɛnɩ tɔm kɩsɔzɩtʋ ndʋ tɩ-taa camɩyɛ na. Ɛlɛ ye ɛtɩnɩɩ kpɛlɩkʋʋ taa yɔ, ŋpɩzɩɣ ŋkpaɣ alɩwaatʋ nɛ ŋtazɩ tɔm kɩsɔzɩtʋ tɩŋa taa yaa tɩ-hɔɔlɩŋ weyi ŋnawa se iyeki nɛ ɛnɩɩ pɩ-taa camɩyɛ yɔ. Ye mbʋ, pɩwɛɛ se ŋñɔɔzɩ ña-tɩ camɩyɛ.
Tɔm taa cuuzuu aɖakaɣ: Tɔm pɔzʋʋ mbʋ pɩwɛ paa tɔm ñʋʋ ŋgʋ kɩ-ɖɩbazɩyɛ yɔ, pocosi pɩ-yɔɔ tɔm taa cuuzuu aɖakaɣ ŋga kɛwɛ kɩ-ɖɩdɛnɖɛ yɔ. Ŋpɩzɩɣ nɛ ŋtɩŋnɩ aɖakaɣ ŋga kɔ-yɔɔ nɛ ŋna se ñe-Bibl kpɛlɩkɩyʋ nɩ kpɛlɩkʋʋ taa nɛ ɛpɩzɩɣ ɛlɩzɩ nɔɔyʋ tɔm kɩcɛyɩtʋ taa. Ɩkalɩ paa tɔm cosuu mbʋ lɛ nɛ Bibl Masɩ nzɩ sɩwɛ pɩ-cɔlɔ yɔ. Pʋwayɩ lɛ, pɔzɩ ñe-Bibl kpɛlɩkɩyʋ se ɛtɩŋnɩ Masɩ nzɩ sɩ-yɔɔ nɛ ɛyɔɔdɩ mbʋ pʋyɔɔ tɔm cosuu mbʋ pɩkɛ toovenim yɔ.—Tʋma 17:2, 3.