Ɩkɛ nayaa lɛzɩŋ—Habakuuki
1. Ɛbɛ yɔɔ pɩwɛɛ se ɖɩmaɣzɩ Habakuuki tɔm nɛ ɛ-kɩɖaʋ pɔ-yɔɔ?
1 Ðɩwɛ ɛjaɖɛ nɖɩ ɖɩ-taa kɩdɛkɛdɩm lakasɩ wɛɛ nɛ pɩkpaɣ ɖoŋ yɔ, nɛ pʋtɔma yɔ pituzuu-ɖʋ se ɖɩpɔzɩ Yehowa tɔm ɛzɩ Habakuuki kaalabʋ yɔ. Ɛpɔzɩ-ɩ se: “Ɛbɛ yɔɔ ŋwɩlɩ-m azuluma nɛ ŋnaɣ kɩdɛkɛdɩm? Lazʋʋ nɛ kañatʋ labʋ wɛ mɛ-ɛzɩdaa.” (Hab. 1:3; 2 Tim. 3:1, 13) Ye ɖɩmaɣzɩɣ Habakuuki tɔm nɛ ɛ-kɩɖaʋ kɩbaŋʋ yɔɔ yɔ, pɩpɩzɩɣ pɩsɩnɩ-ɖʋ nɛ ɖɩɖaŋ Yehowa tɔm hʋʋ kɩyakʋ kpam.—2 Pɩy. 3:7.
2. Ɛbɛ ɖɩpɩzɩɣ ɖɩla nɛ ɖɩwɩlɩ se ɖɩwɛnɩ tisuu sɔnɔ?
2 Ðɩwɛɛnɩ tisuu: Habakuuki tɩha waɖɛ wɛtʋ kɩdɛkɛdɩtʋ ndʋ tɩ-taa ɛɛwɛɛ yɔ se tiyele nɛ pitibi-i yɔɔɔ, ɛlɛ ɛcaɣnɩ ɛ-ɛza nɛ ɛwɛɛ Yehowa tʋmɩyɛ labʋ yɔɔ. (Hab. 2:1) Yehowa heyi ɛ-nayʋ se Ɛ-tɔm kaɣ kɔm pɩ-taa ɖeyi ɖeyi tɩ-alɩwaatʋ taa nɛ “ɛyʋ siɣsiɣ tʋ kaɣ wɛʋ nɛ ɛ-ɛza e-tisuu yɔɔ.” (Hab. 2:2-4) Ɛzɩma tɔm ndʋ tɩwazɩɣ Krɩstʋ ñɩma mba pɛwɛ kɛdɛzaɣ kɩyakɩŋ taa yɔ? Pɩtɩcɛyɩ se ɖɩtɩlɩ alɩwaatʋ ndʋ ɛjaɖɛ kaɣ tɛm yɔ; ɛlɛ mbʋ pɩkɩlɩ cɛyʋʋ yɔ lɛ se ɖɩtɛ ɖa-taa se ɛjaɖɛ kaɣ tɛm. Tisuu mbʋ ɖɩwɛna yɔ, pituzuu-ɖʋ se ɖɩcaɣnɩ ɖɛ-ɛza nɛ ɖɩsɩɩ tɔm susuu kajalaɣ lone taa.—Ebr. 10:38, 39.
3. Ɛbɛ yɔɔ pɩcɛyaa se ɖa-taa ɛwɛɛ leleŋ Yehowa sɛtʋ taa?
3 Ða-taa ɛwɛɛ leleŋ nɛ Yehowa: Pɩkaɣ takʋʋ ɖe-tisuu siŋŋ alɩwaatʋ ndʋ Gɔɔgɩ weyi ɛlɩnɩ Maagɔɔgɩ tɛtʋ taa yɔ, ɛkʋyʋʋ Yehowa samaɣ yɔɔ yɔ. (Ez. 38:2, 10-12) Ðoŋ ɖoŋ lɛ, you kɔŋnɩ kʋñɔmɩŋ sakɩyɛ halɩ pɩkpɛndɩnɩ mba pawakɩ-kʋ yɔ, pɔ-yɔɔ. Pʋtɔma yɔ, ɛyaa tɛɖɩɣ tɔɔnasɩ, pelesiɣ pa-ñɩm nɛ wezuu caɣʋ wɛɣ kaɖɛ. Ɛbɛ ɖɩkaɣ labʋ alɩwaatʋ ndʋ ɖɩkatɩɣ kala yɔ? Habakuuki kaatɛm naʋ se ɛkaɣ katʋʋ kala, ɛlɛ ɛɖʋ ɛ-taa se ɛkaɣ wobu pɩ-yɔɔ nɛ ɛla Yehowa tʋmɩyɛ nɛ taa leleŋ. (Hab. 3:16-19) Ða-ɖɔɖɔ, “[Yehowa] taa leleŋ” kaɣ-ɖʋ sɩnʋʋ nɛ ɖɩɖɔkɩ ɖa-tɩ kala wena akaɣ kɔm cee wayɩ yɔ, a-taa.—Neh. 8:10; Ebr. 12:2.
4. Waɖɛ nɖɩ ɖɩwɛnɩ sɔnɔ nɛ cee wayɩ?
4 Ɛyaa mba Yehowa kaɣ pa-ñʋʋ yabʋ ɛ-tɔm hʋʋ kɩyakʋ wiye yɔ, pakaɣ wɛnʋʋ waɖɛ se powolo pɩ-yɔɔ nɛ pɛkpɛlɩkɩ Ɛ-tɔm. (Hab. 2:14) Mba pakaɣ-wɛ fezuu yɔ, pakaɣ kpɛlɩkʋʋ ɖɔɖɔ nɛ patɩlɩ Yehowa. Ye mbʋ, ɖɩlabɩnɩ waɖɛ nɖɩ ɖɩwɛna yɔ tʋmɩyɛ sɔnɔ nɛ ɖisusi Yehowa nɛ ɛ-tʋma sɔsɔna pɔ-tɔm.—Keɣa 33:2; 70:17.