Ðɩpɩzɩɣ nɛ ɖɩtɩlɩ Ɛsɔ pɩtɩŋnɩ ɛ-nayaa yɔɔ

ABRAHAM

Ɛsɔ ɛɛtʋkʋʋ ɛyaa taa nɛ ɛsɔɔlaa se ɛwazɩ ɛyaa tɩŋa.

Ɛsɔ labɩ nayʋ Abraham tamaɣ se “ñɔ-yɔɔ pakaɣ wazʋʋ tataa ajɛɛ kpeekpe yɔɔ.”—Kiɖe Tɛɛ Tɔm 12:3.

Ɛbɛ pɩkpɛlɩkɩɣ-ɖʋ? Ɛsɔ sɔɔlɩ-ɖʋ siŋŋ nɛ ɛsɔɔlaa se ɛwazɩ hɔŋ tɩŋa taa abalaa, halaa, nɛ piya; pɩ-tɔbʋʋ se ɛyaa mba payɩ pañaŋɩ-ɩ yɔ.

MOYIZI

Ɛsɔ kɛ pʋtɔdɩyɛ nayʋ nɛ ɛwazɩɣ mba pañakɩ pana se patɩlɩ-ɩ yɔ.

Ðoŋ Tɩŋa Tʋ ha nayʋ Moyizi ɖoŋ nɛ ɛla piti lakasɩ sɔsɔsɩ. Paa mbʋ yɔ, Moyizi tɩmaa se: “Wɩlɩ-m ñɔ-nʋmɔʋ nɛ mansɩmɩ-ŋ nɛ menɖeni-ŋ.” (Ejipiti Lɩʋ 33:13) Ɛsɔ taa labɩ leleŋ nɛ Moyizi adɩma nɛ ɛwazɩ-ɩ nɛ eyele nɛ Moyizi tɩlɩ ɛ-nʋmɔŋ nɛ ɛ-wɛtʋ nɛ pɩkɩlɩ. Kɩɖaʋ nakʋyʋ yɔ, Moyizi kpɛlɩkaa se Lɩzɩyʋ kɛnɩ “Ɛsɔ, pʋtɔdɩyɛ nayʋ nɛ hɛndɩyʋ.”—Ejipiti Lɩʋ 34:6, 7.

Ɛbɛ pɩkpɛlɩkɩɣ-ɖʋ? Ɛsɔ sɔɔlaa se ɛwazɩ ɖa-tɩŋa, abalaa, halaa, nɛ piya, pɩ-tɔbʋʋ se ɛyaa mba payɩ pañakɩ pana se patɩlɩɩ-ɩ camɩyɛ yɔ. Ɛwɩlɩ-ɖʋ Masɩ Kiɖeɖesi taa ɛzɩma ɖɩsɛɛ-ɩ yɔ nɛ ɛsɔɔlaa se ɛwazɩ-ɖʋ.

YESU

Ðɩpɩzɩɣ nɛ ɖihiɣ Ɛsɔ wazasɩ ye ɖɩkpɛlɩkɩɣ Yesu yɔɔ tɔm nɛ mbʋ ɛkɔma nɛ ɛla nɛ ɛwɩlɩ yɔ pɩ-yɔɔ tɔm yɔ.

Yesu wezuu caɣʋ yɔɔ tɔm nɛ ɛ-wɩlɩtʋ sakɩyɛ wɛ Masɩ Kiɖeɖesi taa. Ɛsɔ ha Yesu ɖoŋ nɛ ɛla piti lakasɩ sɔsɔsɩ sakɩyɛ. Sɩ-taa nasɩyɩ lɛ ɛzɩma ɛwa yʋlʋmaa, ndamaa, nɛ kaakalasɩ yɔ. Halɩ efezi sɩɖaa ɖɔɖɔ. Yesu tɩŋnɩ piti lakasɩ nzɩ sɩ-yɔɔ nɛ ɛwɩlɩ wazasɩ nzɩ Ɛsɔ kaɣ kɔnʋʋ cee wayɩ yɔ. Ɛyɔɔdɩ mbʋ ɖa-taa paa weyi ɛpɩzɩɣ nɛ ɛla nɛ ehiɣ wazasɩ nzɩ yɔ pɩ-tɔm, ɛ-tɔm se: “Wezuu maatɛŋ kɛlɛ se pɛwɛɛ nɛ patɩlɩɣ-ŋ, ña Ɛsɔ toovenim tʋ kʋɖʋm koŋ, nɛ weyi ŋtiyi-i yɔ, Yesu Krɩstʋ.”—Yohanɛɛsɩ 17:3.

Yesu nɩɣaɣ lalaa siziŋ, ɛɛsɔɔlɩ ɛyaa, nɛ ɛlakɩ-wɛ camɩyɛ lakasɩ. Abalaa nɛ halaa, piya nɛ sɔsaa wokaɣ ɛ-cɔlɔ mbʋ pʋyɔɔ yɔ ɛyɔɔdaa se: “Ɩkpɛlɩkɩ mɔn-cɔlɔ, mbʋ pʋyɔɔ yɔ mɛnkɛ laŋɩyɛ hɛɛɛ tʋ nɛ moluzuu man-tɩ, nɛ ɩkaɣ hiɣu laŋɩyɛ hɛzʋʋ.” (Maatiyee 11:29) Yesu alɩwaatʋ taa ɛyaa lakaɣ halaa ñaŋ ɛlɛ Yesu ñalakaɣ-wɛ camɩyɛ lakasɩ, ɛwɩlaɣ se pamʋ ñɩm ɛ-ɛsɩndaa, nɛ ɛwɛnɩ ñamtʋ pɔ-yɔɔ.

Ɛbɛ pɩkpɛlɩkɩɣ-ɖʋ? Yesu lɩzɩ sɔɔlɩm siŋŋ nɛ ɛwɩlɩ ɛyaa, Nɛ ɛkɛnɩ-ɖʋ kɩɖaʋ ŋgʋ kɩ-wayɩ fɛyɩ yɔ wɛtʋ ndʋ pɩwɛɛ se ɖɩwɛɛnɩ ɖama yɔɔ yɔ pɩ-hɔɔlʋʋ taa.

YESU TƖKƐ ƐSƆ

Masɩ Kiɖeɖesi wɩlɩɣ-ɖʋ se “toovenim taa lɛ, ɖɩnawa se Ɛsɔ kʋɖʋm wɛna” nɛ Yesu Krɩstʋ kɛnɩ Ɛsɔ ɛnʋ e-tiyiyu weyi eluzuu ɛ-tɩ siŋŋ yɔ. (1 Kɔrɛntɩ mba 8:6) Yesu yɔɔdɩ kpayɩ se Ɛsɔ kɩlɩ ɛnʋ nɛ Ɛsɔ tiyini-i tɛtʋ yɔɔ.—Yohanɛɛsɩ 11:41, 42; 14:28.a