Paɣtʋ ndʋ Yehowa ɖʋ wezuu kɩbaŋʋ caɣʋ yɔɔ yɔ, ɖɔkɩ-tʋ kpam

Yehowa Ɛsɔ ɖʋnɩ ɛyaa paɣtʋ wezuu kɩbaŋʋ caɣʋ hɔɔlʋʋ taa. Ɛɖʋ paɣtʋ se abalʋ nɛ halʋ pɔɖɔkɩ nesi yɔ, pɩwɛɛ se pɛwɛɛ ɖama cɔlɔ tam. (Mat 19:4-6, 9) Yehowa paɖɩɣ kʋzʋʋ kɩdɛkɛdʋʋ lakasɩ tɩŋa payɩ. (1Kɔr 6:9, 10) Halɩ ɛha-ɖʋ paɣtʋ kila wondu suu nʋmɔʋ taa nɛ asɩɣnɩ ɛ-sɛyaa se pɛwɛɛ ŋgee.—Wp 22:5; 1Tim 2:9, 10.

Sɔnɔ, ɛyaa sakɩyɛ ɩɩkpakɩɣ Yehowa paɣtʋ nɛ palakɩnɩ tʋmɩyɛ. (Roma 1:18-32) Peyeki nɛ ɛyaa lɩmaɣza wɛɣnɩ ɖoŋ po-wondu suu, pɔ-ñɔsɩ hʋm nɛ pa-lakasɩ yɔɔ. Ɛyaa sakɩyɛ wɩlɩɣ pa-lakasɩ kɩdɛkɛdɩsɩ ɛyaa ɛsɩndaa nɛ pakʋʋ mba pɔɖɔŋ paɣtʋ ndʋ tɩwɛ ndɩ nɛ pɛ-ndʋ yɔ, pɔ-tɔm.—1Pɩy 4:3, 4.

Ðɩkɛ Yehowa Aseɣɖe Tɩnaa, ye mbʋ pɩwɛɛ se wezuu kɩbaŋʋ caɣʋ paɣtʋ ndʋ Yehowa ɖʋwa yɔ, ɖɩɖɔkɩ-tʋ kpam. (Roma 12:9) Ɛzɩma ɖɩpɩzɩɣ nɛ ɖɩla mbʋ? Pɩpɔzʋʋ se ɖɩkpaɣ lɛɣtʋ nɛ ɖiheyi ɛyaa mbʋ Ɛsɔ sɔɔlaa yɔ. Nɛ pɩmʋnaa se ɖa-maɣmaɣ ɖɩɖɔ paɣtʋ ndʋ tɩ-yɔɔ ɖe-wezuu caɣʋ taa. Ðɩkpaɣ se ɖɩñɩnɩɣ lɩzʋʋ wondu ndʋ pɩwɛɛ se ɖisuu yaa ɛzɩma pɩwɛɛ se ɖɩñɔɔzɩ ɖa-tɩ yɔ, pɩwɛɣ ɖeu se ɖɩpɔzɩ ɖa-tɩ se: ‘Mbʋ malɩzɩɣ se monsuu yaa ɛzɩma mɔñɔɔzʋʋ man-tɩ yɔ, pɩwɩlɩɣ se mɔnsɔɔlɩ Yehowa na yaa mɔnsɔɔlɩ ɛjaɖɛ na? Mon-wondu suu nɛ man-tɩ ñɔɔzʋʋ pawɩlɩɣ kpayɩ se mɛnkɛ Krɩstʋ tʋ weyi ɛñaŋ Ɛsɔ yɔ?’ Ðɩɩlɩzɩɣ filim nakʋyʋ se ɖɩcɔŋna yaa aleɣya naayɛ se ɖɩlakɩ lɛ, pɩwɛɣ ɖeu ɖɔɖɔ se ɖɩpɔzɩ ɖa-tɩ se: ‘Filim kʋnɛ kɩkɛdɩɣnɩ Yehowa? A-lɩmaɣza kɩwɩlɩɣ? Aleɣya wena malɩzɩɣ se malakɩ yɔ, akpazɩɣ kpekpeka ŋga mañaŋnɩ Yehowa paɣtʋ yɔ ɖoŋ na, yaa ahʋzʋʋ-kɛ kɩhʋzʋ? (Keɣa 100:3) Ye mɔ-hɔʋ taa tʋ nɔɔyʋ yaa koobiya lalaa ɩna aleɣya wena malakɩ yɔ, putuluu-wɛ?’—1Kɔr 10:31-33.

Ɛbɛ yɔɔ pɩcɛyaa kpem se ɖɩɖɔkɩ paɣtʋ ndʋ Yehowa ɖʋ wezuu kɩbaŋʋ caɣʋ yɔɔ yɔ? Pɩkazɩ pazɩ Yehowa kaɣ yɔkʋʋ ajɛɛ kpeekpe nɛ ɛɖɩzɩ ɛyaa kɩdɛkɛda tɩŋa. (Eze 9:4-7) Ɛyaa mba palakɩ Yehowa sɔɔlɩm yɔ, pe-yeke pɩkazɩɣ. (1Yoh 2:15-17) Ye mbʋ, ɖɩñaɣ pana nɛ ɖɩɖɔkɩ paɣtʋ ndʋ Yehowa ɖʋ wezuu kɩbaŋʋ caɣʋ yɔɔ yɔ nesi naalɛ; piyeki nɛ ɛyaa mba panaɣ ɖa-camɩyɛ lakasɩ yɔ, pasa Ɛsɔ.—1Pɩy 2:11, 12.

CƆNƖ VIDEO KƐ YEHOWA TAABALƲ—ABALƲ KƲÐƲM, HALƲ KƲÐƲM NƐ ŊCOSI TƆM TƲNƐ TƖ-YƆƆ:

• Ɛbɛ yɔɔ pɩwɛ ɖeu se ɖɩɖɔ Yehowa paɣtʋ yɔɔ?

• Ɛbɛ yɔɔ pɩcɛyaa se lʋlɩyaa ɩpaɣzɩ pe-piya Yehowa paɣtʋ kpɛlɩkʋʋ ɖooo sɩ-pɩjatʋ taa?

• Ɛzɩma evebiya, pɛlaa nɛ akpadɩyaa pa-tɩŋa papɩzɩɣ nɛ peyele nɛ Ɛsɔ camɩyɛ lakasɩ wazɩ ɛyaa lalaa?