Sɔɔlɩm nɛ ɛsɩmɩyɛ nɖɩ ŋwɛnɩ Yehowa yɔɔ yɔ, piseɣtiɣ-ŋ se ŋha ña-tɩ nɛ pamɩyɩsɩ-ŋ lɩm

1-2. Ɛzɩ Tʋma Labʋ 8:27-31, 35-38 wɩlʋʋ yɔ, ɛbɛ seɣti Etiyoopii tʋmlaɖʋ se ɛha ɛ-tɩ nɛ pamɩyɩsɩ-ɩ lɩm?

ŊSƆƆLAA se pamɩyɩsɩ-ŋ lɩm nɛ ŋpɩsɩ Krɩstʋ tɔmkpɛlɩkɩyʋ na? Sɔɔlɩm nɛ ɛsɩmɩyɛ peseɣti ɛyaa sakɩyɛ nɛ pakpaɣ lɩmaɣzɩyɛ nɖɩ. Yele nɛ ɖɩna abalʋ nɔɔyʋ kɩɖaʋ; ɛɛkɛ Etiyoopii abiɖe tʋmlaɖʋ nɔɔyʋ.

² Alɩwaatʋ ndʋ Etiyoopii abalʋ ɛnʋ ɛkpɛlɩkɩ Masɩ nɛ ɛnɩɩ pɩ-taa se pɩpɔzʋʋ se pamɩyɩsɩ-ɩ lɩm yɔ, ɛɛha ɛ-tɩ kpaagbaa nɛ pamɩyɩsɩ-ɩ lɩm. (Kalɩ Tʋma Labʋ 8:27-31, 35-38.) Ɛbɛ kaaseɣti-i nɛ ɛla mbʋ? Pɩtʋʋ fɛyɩ se ɛɛsɔɔlɩ Ɛsɔtɔm. Alɩwaatʋ ndʋ ɛɛwɛ ɛ-kɛɛkɛɛ taa yɔ, ɛɛwɛɛ nɛ ɛkalɩɣ Izaayii takayaɣ hɔɔlʋʋ nakʋyʋ. Nɛ alɩwaatʋ ndʋ Filiipu yɔɔdɩnɩ abalʋ ɛnʋ yɔ, piseɣti-i nɛ ɛwɛɛnɩ ɛsɩmɩyɛ mbʋ Yesu labɩ-ɩ yɔ pɩ-yɔɔ. Ɛlɛ ɛbɛ yɔɔ tʋmlaɖʋ ɛnʋ eewobi Yeruzalɛm? Eewobi Yeruzalɛm, mbʋ pʋyɔɔ yɔ, ɛɛtɛm wɛnʋʋ sɔɔlɩm Yehowa yɔɔ. Ɛzɩma ɖɩlaba nɛ ɖɩna? Ɛɛlɩnɩ Yehowa sɛʋ Yeruzalɛm. Pɩwɛ ɛzɩ abalʋ ɛnʋ ɛlɩ Ɛsɔ sɛtʋ ɛgbɛyɛ nɖɩ ɖɩ-taa palʋlɩ-ɩ yɔ ɖɩ-taa nɛ ɛkpɛndɩ samaɣ ŋga kaaha ka-tɩ nɛ kɛsɛɣ Ɛsɔ toovenim tʋ yɔ kɔ-yɔɔ. Sɔɔlɩm mbʋ ɛɛwɛnɩ Yehowa yɔɔ yɔ, mbʋ seɣtini-i ɖɔɖɔ se ɛkpɛzɩ nɩŋgbaŋaɣ sɔsɔɔ lɛɛka: Ɛha ɛ-tɩ nɛ pamɩyɩsɩ-ɩ lɩm nɛ ɛpɩsɩ Krɩstʋ tɔmkpɛlɩkɩyʋ.—Mat. 28:19.

3. Ɛbɛ pɩzɩɣ nɛ pɩɖɩɣ nʋmɔʋ nɔɔyʋ se ɛtaaha ɛ-tɩ nɛ pamɩyɩsɩ-ɩ lɩm? (Kalɩ aɖakaɣ “Ɛbɛ wɛ ña-laŋɩyɛ taa?”)

³ Sɔɔlɩm mbʋ ŋwɛnɩ Yehowa yɔɔ yɔ, pɩpɩzɩɣ piseɣti-ŋ se ŋha ña-tɩ nɛ pamɩyɩsɩ-ŋ lɩm. Ɛlɛ sɔɔlɩm pɩzɩɣ pɩɖɩɣ-ŋ nʋmɔʋ ɖɔɖɔ se ŋtaala mbʋ. Ɛzɩma tɩyɛ? Maɣzɩ kɩɖaŋ nɩɩyɩ yɔɔ. Ŋpɩzɩɣ nɛ ŋsɔɔlɩ ñɔ-hɔʋ taa ñɩma nɛ ña-taabalaa mba pɛfɛyɩnɩ tisuu yɔ siŋŋ, nɛ pɩpɩzɩɣ piyele nɛ sɔɔndʋ kpaɣ-ŋ se ye pamɩyɩsɩ-ŋ lɩm yɔ, pakaɣ-ŋ paɖʋʋ. (Mat. 10:37) Yaa ŋpɩzɩɣ nɛ ŋsɔɔlɩ lakasɩ nzɩ ŋnawa se Ɛsɔ paɖɩɣ yɔ nɛ pɩwɛɣ-ŋ kaɖɛ se ŋyele sɩ-labʋ. (Keɣa 96:10) Yaa pʋtɔma, ɖooo ña-pɩjatʋ taa ŋpaɣzɩ labʋ sɔnzɩ nzɩ sɩlabɩ nɔɔ kʋɖʋmaɣ nɛ cɛtɩm Ɛsɔ sɛtʋ yɔ. Pɩtɩla ŋtɔzʋʋ sɔnzɩ nzɩ sɩ-yɔɔ lɛ, pɩkɛdɩɣnɩ-ŋ. Pʋyɔɔ lɛ, pɩpɩzɩɣ nɛ pɩwɛ-ŋ kaɖɛ se ŋyele sɔnzɩ nzɩ sɩɩkɛdɩɣnɩ Yehowa yɔ sɩ-labʋ. (1 Kɔr. 10:20, 21) Pɩwɛɛ se ŋpɔzɩ ña-tɩ se: “Ɛbɛ, yaa anɩ mankɩlɩ sɔɔlʋʋ?”

WEYI PƖWƐƐ SE ÐƖKƖLƖ SƆƆLƲƲ YƆ

4. Ɛbɛ calɩɣ-ŋ seɣtuu se ŋha ña-tɩ nɛ pamɩyɩsɩ-ŋ lɩm?

⁴ Wondu kɩbandʋ sakɩyɛ wɛɛ se ŋpɩzɩɣ nɛ ŋsɔɔlɩ-tʋ nɛ tɩkɛdɩnɩ-ŋ. Pɩtɩla, halɩ pʋcɔ nɛ ña nɛ Yehowa Aseɣɖe Tɩnaa ɩpaɣzɩ kpɛlɩkʋʋ lɛ, ŋŋwɛnɩ ñamtʋ siŋŋ Bibl yɔɔ. Nɛ pʋtɔma ŋŋsɔɔlɩ Yesu ɖɔɖɔ. Lɛɛlɛɛyɔ, ŋkɔm nɛ ŋtɩlɩ Yehowa Aseɣɖe Tɩnaa yɔ, pɩtɩla pɩkɛdɩɣnɩ-ŋ se ña nɛ wɛ ɩcakɩ nɛ ɩlakɩ kɛdaɣ. Ɛlɛ, paa ŋsɔɔlɩ wondu kɩbandʋ ndʋ yɔ, pɩɩwɩlɩɣ se paa pɩɩla ɛzɩma yɔ, pɩkaɣ-ŋ seɣtuu se ŋha ña-tɩ Yehowa nɛ pamɩyɩsɩ-ŋ lɩm. Mbʋ pɩcalɩɣ-ŋ seɣtuu se ŋha ña-tɩ nɛ pamɩyɩsɩ-ŋ lɩm yɔ, mbʋ lɛ sɔɔlɩm mbʋ ŋwɛnɩ Yehowa maɣmaɣ yɔɔ yɔ. Ye ŋsɔɔlɩ Yehowa nɛ pɩkɩlɩ pɩtɩŋa payɩ yɔ, ŋŋkaɣ yebu se nabʋyʋ yaa nɔɔyʋ ɛɖɩɣ-ŋ nʋmɔʋ se ŋtaasɛɛ-ɩ. Sɔɔlɩm mbʋ ŋwɛnɩ Yehowa yɔɔ yɔ, pɩkaɣ-ŋ seɣtuu se ŋha ña-tɩ nɛ pamɩyɩsɩ-ŋ lɩm, nɛ pɩkaɣ-ŋ sɩnʋʋ ɖɔɖɔ se ŋɖɔkɩ ñe-siɣsiɣ wɛtʋ, ña-lɩm mɩyɩsʋʋ wayɩ.

5. Tɔm ndʋ yɔɔ ɖɩkaɣ cosuu?

⁵ Yesu yɔɔdaa se pɩwɛɛ se ɖɩsɔɔlɩ Yehowa nɛ ɖa-laŋɩyɛ pilim, ɖa-kalɩzaɣ pilim, ɖa-maɣzɩm pilim, nɛ ɖo-ɖoŋ pilim. (Mark. 12:30) Ɛzɩma ŋpɩzɩɣ nɛ ŋsɔɔlɩ Yehowa nɛ ŋñamɩ-ɩ siŋŋ mbʋ? Ye ɖɩmaɣzɩɣ ɛzɩma Yehowa sɔɔlɩ-ɖʋ siŋŋ yɔ pɩ-yɔɔ yɔ, pɩkaɣ-ɖʋ sɩnʋʋ nɛ ɖa ɖɔɖɔ ɖɩsɔɔlɩ-ɩ. (1 Yoh. 4:19) Ye ŋñaɣ pana nɛ ŋsɔɔlɩ Yehowa nɛ pɩkɩlɩ yɔ, wɛtʋ ndʋ nɛ lakasɩ nzɩ ɖɔɖɔ pɩkaɣ-ŋ sɩnʋʋ se ŋwɛɛna?b

6. Ɛzɩ Roma mba 1:20 yɔɔdʋʋ yɔ, nʋmɔŋ weyi ɩ-yɔɔ ŋpɩzɩɣ ŋtɩŋna nɛ ŋkpɛlɩkɩ Yehowa yɔɔ tɔm yɔ, ɩ-taa nakʋyʋ lɛ ŋgʋ?

⁶ Tɩŋnɩ Yehowa wondu kɩlɩzɩtʋ yɔɔ nɛ ŋkpɛlɩkɩ ɛ-yɔɔ tɔm. (Kalɩ Roma mba 1:20; Natʋ 4:11) Maɣzɩ tɩŋ nɛ kpɩna wena Yehowa lɩzaa yɔ a-yɔɔ, nɛ ŋna ɛzɩma pɩwɩlɩɣ se ɛkɛ lɔŋsɩnɖʋ siŋŋ yɔ. Maɣzɩ ɛzɩma palabɩ ño-tomnaɣ camɩyɛ yɔ pɩ-yɔɔ pazɩ nɛ ŋna. (Keɣa 138:14) Nɛ ŋmaɣzɩ ɖoŋ weyi Yehowa ɖʋ wɩsɩ taa yɔ ɩ-yɔɔ nɛ ŋna, wɩsɩ kɛ tɩnzɩ nzɩ sɩtalɩ miiliyaarɩwaa sakɩyɛ yɔ sɩ-taa nakɛyɛ.c (Iza. 40:26) Ye ŋlakɩ mbʋ yɔ, ñamtʋ ndʋ ŋwɛnɩ Yehowa yɔɔ yɔ, tɩpaɣlɩɣ. Paa mbʋ yɔ, ye ŋsɩma se Yehowa kɛ lɔŋsɩnɖʋ nɛ ɛwɛɛ ɖoŋ yɔ, pi-ɖeke pɩɩpɩzɩɣ pɩsɩnɩ-ŋ nɛ ña nɛ ɩ mɩ-taabalɩyɛ cɛyɩsɩ. Pɩsa nɛ ŋwɛɛnɩ sɔɔlɩm sɔsɔm Yehowa yɔɔ lɛ, pɩcɛyaa se ŋtasɩ tɩlʋʋ tɔm sakɩyɛ ɛ-yɔɔ.

7. Pɩsa nɛ sɔɔlɩm mbʋ ŋwɛnɩ Yehowa yɔɔ yɔ pɩpaɣlɩ lɛ, tɔm ndʋ pɩwɛɛ se ña-taa ɛtɛmna?

⁷ Pɩwɛɛ se ña-taa ɛtɛ se toovenim taa lɛ, Yehowa sɔɔlɩ-ŋ. Pɩwɛ-ŋ kaɖɛ se ŋtisi se ɛsɔdaa nɛ tɛtʋ pa-Lɩzɩyʋ sɩma se ŋwɛɛ, nɛ ɛcɔŋnɩ ñɔ-yɔɔ? Ye mbʋ yɔ, tɔzɩ se Yehowa ‘tiposini ɖa-taa nɔɔyʋ.’ (Tʋma 17:26-28) ‘Ɛcɔŋʋʋ laŋa kpeekpe taa,’ nɛ ɛzɩ Daviid heyuu Salomɔɔ yɔ, ɛlabɩ-ŋ tamaɣ se “ye ŋñɩnɩɣ-ɩ kɔyɔ, ŋkaɣ-ɩ naʋ.” (3 Aw. 28:9) Nɛ ŋwɛɛ nɛ ŋkpɛlɩkɩɣ Bibl mbʋ pʋyɔɔ yɔ ‘Caa hɔmɩ-ŋ.’ (Yoh. 6:44) Ŋwɛɣ nɛ ŋtɩlɩɣ mbʋ payɩ Yehowa labɩ-ŋ yɔ lɛ, sɔɔlɩm mbʋ ŋwɛnɩ ɛ-yɔɔ yɔ pɩwɛɣ nɛ pɩpaɣlɩɣ.

8. Ɛzɩma ŋpɩzɩɣ nɛ ŋwɩlɩ Yehowa se ña ɖɔɖɔ ŋsɔɔlɩ-ɩ?

⁸ Nʋmɔŋ weyi ɩ-yɔɔ ɖɩpɩzɩɣ ɖɩtɩŋna nɛ ɖɩwɩlɩ Yehowa se ɖa ɖɔɖɔ ɖɩsɔɔlɩ-ɩ yɔ, ɩ-taa nakʋyʋ lɛ se ɖɩyɔɔdʋʋnɩ-ɩ adɩma taa. Ye ŋheyiɣ Yehowa ña-kɩcɛyɩm nɛ ŋsɛɣ-ɩ mbʋ payɩ ɛlakɩ-ŋ yɔ pɩ-yɔɔ yɔ, sɔɔlɩm mbʋ ŋwɛnɩ ɛ-yɔɔ yɔ pɩpaɣlɩɣ nɛ pɩkɩlɩ. Nɛ alɩwaatʋ ndʋ ŋnaɣ ɛzɩma Yehowa cosuu ña-adɩma yɔɔ lɛ, taabalɩyɛ nɖɩ ɖɩwɛ ña nɛ ɩ mɩ-hɛkʋ taa yɔ ɖɩkpaɣ ɖoŋ nɛ pɩkɩlɩ. (Keɣa 114:1) Ña-taa kaɣ tɛm se ewelisiɣni-ŋ. Ɛlɛ, pɩsa nɛ ŋñɔɔnɩ Yehowa lɛ, pɩwɛɛ se ŋtɩlɩ mbʋ pʋyɔɔ ɛsɔɔlɩ nabʋyʋ yaa ɛtɩsɔɔlɩ-pʋ yɔ, nɛ mbʋ pʋyɔɔ ɛlakɩ nabʋyʋ yɔ. Nɛ pɩwɛɛ se ŋtɩlɩ mbʋ ɛsɔɔlaa se ŋla yɔ. Nʋmɔʋ kʋɖʋmʋʋ ŋgʋ kɩ-yɔɔ ŋpɩzɩɣ ŋtɩŋna nɛ ŋtɩlɩ pɩtɩŋa mbʋ yɔ lɛ se ŋkpɛlɩkɩ ɛ-Tɔm, Bibl.

9. Ɛzɩma ŋpɩzɩɣ nɛ ŋwɩlɩ se ŋsɔɔlɩ Bibl?

⁹ Ñaɣ pana nɛ ŋsɔɔlɩ Bibl. Bibl ɖeke taa Yehowa yɔɔ toovenim tɔm, nɛ tamasɩ nzɩ ɛlabɩ-ŋ yɔ sɩwɛɛ. Ye ŋkalɩɣ Bibl paa ɖooye, ye ŋñɔɔzʋʋ ñɛ-tɛ Bibl kpɛlɩkʋʋ, nɛ ye ŋɖɔŋ ndʋ ŋkpɛlɩkɩɣ yɔ tɩ-yɔɔ yɔ, ŋwɩlɩɣ se ŋsɔɔlɩ Bibl. (Keɣa 118:97, 99; Yoh. 17:17) Ŋwɛnɩ ɖʋtʋ nɛ ŋkalɩɣ Bibl ña-tɩ yɔɔ? Ŋɖɔŋ ɖʋtʋ ndʋ tɩ-yɔɔ, nɛ ŋñakɩ pana se ŋkalɩ Bibl paa ɖooye?

10. Mbʋ pɩwɛ Bibl taa nɛ pɩwɛ ŋgee yɔ, pɩ-taa nabʋyʋ lɛ ɛbɛ?

¹⁰ Mbʋ pɩwɛ Bibl taa nɛ pɩwɛ ŋgee yɔ, pɩ-taa nabʋyʋ lɛ se kɩyɔɔdʋʋ tɔm ndʋ yɔ, mba paana Yesu yɔ mba kɛdɩnɩ-tʋ. Takayaɣ ŋga, ke-ɖeke kalɩzɩɣnɩ mbʋ Yesu labɩ-ŋ yɔ pɩ-taa ɖeyi ɖeyi. Ye ŋkalɩɣ mbʋ Yesu laba nɛ ndʋ ɛyɔɔdaa yɔ pɩ-tɔm yɔ, pɩtɩla pɩkaɣ-ŋ seɣtuu se ŋɖʋ-ɩ nɛ taabalɩyɛ.

11. Ɛbɛ kaɣ-ŋ sɩnʋʋ nɛ ŋsɔɔlɩ Yehowa?

¹¹ Kpɛlɩkɩ ɛzɩma pɩwɛɛ se ŋsɔɔlɩ Yesu yɔ, nɛ sɔɔlɩm mbʋ ŋwɛnɩ Yehowa yɔɔ yɔ pɩkaɣ paɣlʋʋ. Ɛbɛ yɔɔ? Mbʋ pʋyɔɔ yɔ, Yesu maɣzɩnɩ ɛ-Caa wɛtʋ ɖeyi ɖeyi. (Yoh. 14:9) Ye mbʋ, ye ŋkpɛlɩkɩɣ tɔm sakɩyɛ Yesu yɔɔ yɔ, pɩkaɣ yebu nɛ ŋnɩɩ Yehowa tɔm taa nɛ ŋwɩlɩ-ɩ ñɛ-ɛsɩmɩyɛ nɛ pɩkɩlɩ. Ɛyaa mba lalaa niŋaɣ-wɛ se pɛkɛ kʋñɔndɩnaa, kʋdɔndɩnaa nɛ ajamaa yɔ, Yesu wɩlaa se ɛnaɣ pa-pʋtɔdɩyɛ. Maɣzɩ pɩ-yɔɔ kpem nɛ ŋna. Maɣzɩ ɖɔɖɔ lɔŋ kɩbaŋ weyi ɛtasɩɣ-ŋ nɛ ɛzɩma ŋɖɔŋ lɔŋ ɛnɩ ɩ-yɔɔ nɛ pɩwazɩɣ-ŋ ñe-wezuu caɣʋ taa yɔ pɩ-yɔɔ nɛ ŋna.—Mat. 5:1-11; 7:24-27.

12. Alɩwaatʋ ndʋ ŋkpɛlɩkɩɣ Yesu yɔɔ tɔm yɔ, ɛbɛ pɩpɩzɩɣ nɛ piseɣti-ŋ se ŋla?

¹² Ye ŋmaɣzɩɣ kɩlaʋ ŋgʋ Yesu laba se pɩsa nɛ pekpeɣ-ŋ ña-kɩwɛɛkɩm yɔ kɩ-yɔɔ siŋŋ yɔ, pɩtɩla sɔɔlɩm mbʋ ŋwɛnɩ ɛ-yɔɔ yɔ, pɩkaɣ paɣlʋʋ. (Mat. 20:28) Alɩwaatʋ ndʋ ŋnɩɣ se Yesu cɛlɩ e-wezuu faaa ñɔ-yɔɔ yɔ, pɩpɩzɩɣ nɛ piseɣti-ŋ se ŋkpiɖi ña-kɩwɛɛkɩm yɔɔ nɛ ŋñɩnɩ se Yehowa ɛkpaɣ nɛ ekpeɣ-ŋ. (Tʋma 3:19, 20; 1 Yoh. 1:9) Nɛ ye ŋsɔɔlɩ Yesu nɛ Yehowa yɔ, pɩkaɣ yebu nɛ ŋñɔtɩnɩ ɛyaa lalaa mba pɔsɔɔlɩ-wɛ ɖɔɖɔ yɔ.

13. Ɛzɩma Yehowa kaɣ-ŋ sɩnʋʋ?

¹³ Kpɛlɩkɩ ɛzɩma pɩwɛɛ se ŋsɔɔlɩ Yehowa hɔʋ yɔ. Pɩtɩla ñɔ-hɔʋ taa ñɩma mba pɛfɛyɩnɩ tisuu yɔ, nɛ ña-taabalaa kɩbɩma ɩɩnɩɣ mbʋ pʋyɔɔ ŋsɔɔlaa se ŋkpaɣ ña-tɩ nɛ ŋha Yehowa yɔ pɩ-taa. Halɩ papɩzɩɣ nɛ pakaɖɩnɩ-ŋ. Yehowa kaɣ-ŋ sɩnʋʋ nɛ eyele nɛ ɛgbɛyɛ taa koobiya wɛɛ ɛzɩ ñɔ-hɔʋ taa ñɩma yɔ. Ye ŋñɔnɩ fezuu taa hɔʋ ŋgʋ kpam yɔ, ŋkaɣ hiɣu sɔɔlɩm nɛ sɩnʋʋ mbʋ pɩpɔzʋʋ-ŋ yɔ. (Mark. 10:29, 30; Ebr. 10:24, 25) Alɩwaatʋ kaaɖɛɣ lɛ, pɩtɩla ñɔ-hɔʋ taa ñɩma kaɣ tɩŋʋʋ ña-wayɩ nɛ pɛsɛɛ Yehowa nɛ paña ɛ-paɣtʋ.—1 Pɩy. 2:12.

14. Ɛzɩ 1 Yohanɛɛsɩ 5:3 yɔɔdʋʋ yɔ, suwe ŋkpɛlɩkɩ Yehowa paɣtʋ yɔɔ?

¹⁴ Kpɛlɩkɩ ɛzɩma pɩwɛɛ se ŋsɔɔlɩ Yehowa paɣtʋ nɛ ŋɖɔ tɩ-yɔɔ yɔ. Pʋcɔ nɛ ŋtɩlɩɣ Yehowa lɛ, pɩtɩla ña-maɣmaɣ ŋɖʋwaɣnɩ ña-tɩ paɣtʋ mbʋ pɩwɛ ɖeu nɛ mbʋ pɩfɛyɩ ɖeu yɔ pɩ-hɔɔlʋʋ taa; ɛlɛ lɛɛlɛɛyɔ lɛ, ŋyʋsaa se Yehowa paɣtʋ kpaɖɩnɩ ɖeu. (Keɣa 1:1-3; Kalɩ 1 Yohanɛɛsɩ 5:3.) Maɣzɩ lɔŋ weyi Bibl tasɩɣ walaa, halaa, lʋlɩyaa nɛ piya yɔ ɩ-yɔɔ nɛ ŋna. (Efɛz. 5:22–6:4) Ŋyʋsaa se alɩwaatʋ ndʋ ñɔ-hɔʋ ɖɔm lɔŋ tasʋʋ mbʋ pɩ-yɔɔ yɔ, pɩñɔɔzɩ ki-wezuu caɣʋ na? Ŋpɩsɩ ɛyʋ kɩbanʋ nɛ pɩkɩlɩ, mbʋ pʋyɔɔ yɔ, ŋɖɔm lɔŋ weyi Yehowa tasɩ-ŋ pɩlɩɩnɩ taabalaa mba pɩwɛɛ se ŋlɩzɩ yɔ ɩ-yɔɔ? Ŋkɛ ɛyʋ weyi ɛwɛ taa leleŋ taa yɔ? (Adu. 13:20; 1 Kɔr. 15:33) Pɩtɩla ŋcosuu tɔm pɔzʋʋ mbʋ pɩ-yɔɔ se ɛɛɛ.

15. Ye ŋsɔɔlaa se ŋtɩlɩ ɛzɩma ŋɖɔ Bibl paɣtʋ kila yɔɔ yɔ, ɛbɛ pɩzɩɣ nɛ pɩsɩnɩ-ŋ?

¹⁵ Nabʋyʋ taa, Bibl paɣtʋ kila wena ŋwɛɛ nɛ ŋkpɛlɩkɩɣ yɔ, pɩpɩzɩɣ nɛ pɩlabɩ-ŋ kaɖɛ se ŋtɩlɩ ɛzɩma ŋlabɩnɩ-yɛ tʋmɩyɛ yɔ. Pʋyɔɔ Yehowa tɩŋɩɣnɩ ɛ-ɛgbɛyɛ yɔɔ nɛ ɛhaɣ-ŋ takayɩsɩ nzɩ sɩtazɩɣ Bibl taa yɔ se pɩsɩnɩ-ŋ nɛ ŋɖʋ tʋkaɣ kɩbam nɛ kɩdɛkɛdɩm pɛ-hɛkʋ taa. (Ebr. 5:13, 14) Alɩwaatʋ ndʋ ŋkalɩɣ takayɩsɩ nzɩ sɩ-taa tɔm nɛ ŋkpɛlɩkɩɣ-tʋ yɔ, ŋkaɣ naʋ ɛzɩma ɖeyi ɖeyi sɩwɛ wazaɣ yɔ, nɛ pɩtɩla ŋkaɣ sɔɔlʋʋ se ŋwɛɛ Yehowa ɛgbɛyɛ taa.

16. Ɛzɩma Yehowa ñɔɔzɩ ɛ-samaɣ?

¹⁶ Kpɛlɩkɩ ɛzɩma pɩwɛɛ se ŋsɔɔlɩ Yehowa ɛgbɛyɛ nɛ ŋɖʋ-ɖɩ nesi yɔ. Yehowa ñɔɔzɩ ɛ-samaɣ nɛ kɛwɛɛ agbaa taa; nɛ ɛ-Pɩyalʋ Yesu kɛnɩ a-tɩŋa a-ñʋʋdʋ. (Efɛz. 1:22; 5:23) Yesu lɩzɩ abalaa patam numwaa nabɛyɛ cabɩ se pɛɖɛɛ nɔɔ tʋmɩyɛ nɖɩ ɛsɔɔlaa se pala sɔnɔ yɔ ɖɩ-ñɔɔzʋʋ taa. Yesu ya abalaa mba se “yom siɣsiɣ tʋ nɛ lɔŋsɩnɖʋ,” nɛ paalakɩ kaakendu tʋmɩyɛ nɖɩ ɛɖʋ-wɛ se paha-ŋ fezuu taa tɔɔnaɣ nɛ pakandɩyɩ ñɔ-yɔɔ yɔ, ɖɩ-labʋ taa. (Mat. 24:45-47) Nʋmɔŋ weyi ɩ-yɔɔ yom siɣsiɣ tʋ tɩŋɩɣna se ɛsɩna nɛ pɔcɔnɩ ñɔ-yɔɔ yɔ, ɩ-taa nakʋyʋ lɛ se ɛñakɩ pana nɛ ɛlɩzɩɣ ɛgbɛyɛ taa ɛzʋtʋyaa mba pamʋnaa yɔ se peɖiyi-ŋ. (Iza. 32:1, 2; Ebr. 13:17; 1 Pɩy. 5:2, 3) Ɛzʋtʋyaa sɔɔlɩ faaa se pala po-ɖoŋ ɖeɖe nɛ pɛhɛzɩ ña-laŋɩyɛ nɛ pasɩɣnɩ-ŋ nɛ ŋñɔtʋʋnɩ Yehowa. Ɛlɛ kɩbam mbʋ payɩ papɩzɩɣ nɛ palabɩ-ŋ yɔ, pɩ-taa nabʋyʋ lɛ se pasɩnɩ-ŋ nɛ ŋkpɛlɩkɩ lalaa Yehowa yɔɔ tɔm.—Efɛz. 4:11-13.

17. Ɛzɩ Roma mba 10:10, 13, 14 yɔɔdʋʋ yɔ, ɛbɛ yɔɔ ɖiheyiɣ lalaa Yehowa tɔm?

¹⁷ Sɩnɩ lalaa nɛ pɛkpɛlɩkɩ ɛzɩma pɩwɛɛ se pɔsɔɔlɩ Yehowa yɔ. Yesu heyi ɛ-wayɩ tɩŋɩyaa se pɛkpɛlɩkɩ lalaa Yehowa tɔm. (Mat. 28:19, 20) Ðɩpɩzɩɣ nɛ ɖɩña paɣtʋ ndʋ, mbʋ pʋyɔɔ yɔ, ɖɩnawa se pɩpɔzʋʋ se ɖɩñam-tʋ. Ɛlɛ, alɩwaatʋ ndʋ sɔɔlɩm mbʋ ŋwɛnɩ Yehowa yɔɔ yɔ, pɩwɛɣ nɛ pɩpaɣlɩɣ yɔ, pɩkaɣ-ŋ labʋ ɛzɩ pɩɩlabʋ apostoloo Pɩyɛɛrɩ nɛ apostoloo Yohanɛɛsɩ yɔ. Pɔyɔɔdaa se: “Ðɩɩpɩzɩɣ nɛ ɖiyele mbʋ ɖɩnawa nɛ ɖɩnɩɩ yɔ pɩ-tɔm yɔɔdʋʋ.” (Tʋma 4:20) Ye ɖɩpɩzaa nɛ ɖɩsɩnɩ nɔɔyʋ nɛ ɛsɔɔlɩ Yehowa yɔ, ɖɩkaɣ hiɣu taa leleŋ siŋŋ. Maɣzɩ nɛ ŋna taa leleŋ weyi tɔm susuyu Filiipu hiɣaa, alɩwaatʋ ndʋ ɛsɩnɩ Etiyoopii abalʋ nɛ ɛkpɛlɩkɩ toovenim tɔm ndʋ tɩwɛ Masɩ taa nɛ ɛlɛ ha ɛ-tɩ nɛ pamɩyɩsɩ-ɩ lɩm yɔ! Alɩwaatʋ ndʋ ŋmaɣzɩɣnɩ Filiipu nɛ ŋñaŋ paɣtʋ ndʋ Yesu ɖʋwa se posusi tɔm yɔ lɛ, ŋwɩlɩɣ se ŋsɔɔlaa se ŋkɛ Yehowa Aseɣɖe Tʋ. (Kalɩ Roma mba 10:10, 13, 14.) Alɩwaatʋ ndʋ tɩ-taa lɛ, pɩtɩla ŋkaɣ pɔzʋʋ tɔm ndʋ Etiyoopii abalʋ kaapɔzaa yɔ se: “Ɛbɛ ɖaŋɩɣ-m se pataamɩyɩsɩ-m lɩm?”—Tʋma 8:36.

18. Ɛbɛ tɔm ɖɩkaɣ yɔɔdʋʋ tɔm ñʋʋ ŋgʋ kɩkɔŋ yɔ kɩ-taa?

¹⁸ Alɩwaatʋ ndʋ ŋkpakɩɣ lɩmaɣza se pamɩyɩsɩ-ŋ lɩm yɔ, alɩwaatʋ ndʋ ŋkaɣ kpɛzʋʋ ñe-wezuu caɣʋ taa nɩŋgbaŋaɣ sɔsɔɔ. Nɩŋgbaŋaɣ ŋga kɛ-kpɛzʋʋ tɩkɛ aleɣya tɔm; pʋyɔɔ lɛ, pɩpɔzʋʋ se ŋmaɣzɩ camɩyɛ pʋcɔ nɛ ŋkpɛzɩ-kɛ. Ɛbɛ pɩwɛɛ se ŋtɩlɩ pɩlɩɩnɩ lɩm mɩyɩsʋʋ yɔɔ? Ɛbɛ pɩwɛɛ se ŋla pʋcɔ nɛ pamɩyɩsɩ-ŋ lɩm? Nɛ pamɩyɩsɩɣ-ŋ lɩm nɛ pɩtɛ lɛ, ɛbɛ pɩwɛɛ se ŋla? Ðɩkaɣ cosuu tɔm pɔzʋʋ mbʋ pɩ-yɔɔ tɔm ñʋʋ ŋgʋ kɩkɔŋ yɔ kɩ-taa.