Ɛzɩma adɩma pɩzɩɣ nɛ asɩnɩ-ŋ?
Pamela kaatɔlɩ kʋdɔŋ siŋŋ lɛ, ɛñɩnɩ sɩnʋʋ ɖɔkɔtɔnaa sɔsaa cɔlɔ. Paa mbʋ yɔ, ɛtɩmnɩ Ɛsɔ se ɛlɛ ɛha-ɩ ɖoŋ nɛ ɛɖɔkɩ ɛ-tɩ kpam kaɖɛ nɖɩ ɖɩ-taa ɛwɛɛ yɔ. Adɩma sɩnɩ-ɩ?
Pamela lɩzɩ pɩ-taa se: “Alɩwaatʋ ndʋ palakaɣ-m kansɛɛrɩ kɔyɛ yɔ, ɖoŋ ɖoŋ lɛ, sɔɔndʋ kpaɣaɣ siŋŋ, ɛlɛ mantɩmɩɣnɩ Ɛsɔ Yehowa lɛ, ma-laŋɩyɛ hɛʋ nɛ manpɩzɩɣ mamaɣzɩɣ camɩyɛ. Halɩ nɛ sɔnɔ menɖiɣni nɩʋ siziŋ siŋŋ paa ɛzɩmtaa, ɛlɛ adɩma sɩɣnɩ-m nɛ mɛwɛɣnɩ lɩmaɣza kɩbana. Alɩwaatʋ ndʋ ɛyaa pɔzʋʋ-m se pɩcaɣ-m ɛzɩma lɛ, moncosuu-wɛ se, ‘Mantɩkʋyɩ camɩyɛ, ɛlɛ man-taa wɛ leleŋ.’”
Pɩkɛ toovenim se pɩtɩpɔzɩ se ɖɩɖaŋ se kʋdɔŋ sɔsɔʋ nakʋyʋ ɛkpa-ɖʋ nɛ pʋcɔ ɖɩtɩmɩ. Ða-tɩŋa payɩ ɖɩkatɩɣ tɩlasɩ, sɔsɔsɩ nɛ cikpesi, nɛ ɖoŋ ɖoŋ lɛ, ɖɩñɩnɩɣ se pasɩnɩ-ɖʋ nɛ ɖɩlʋbɩnɩ-sɩ. Adɩma pɩzɩɣ nɛ asɩnɩ-ɖʋ?
Bibl yɔɔdʋʋ se: “Kɛzɩ nɛ ŋsʋʋ Kɩbaɣlʋ ña-sʋʋtʋ, ɛcɔŋnɩ ñɔ-yɔɔ camɩyɛ; ɛɛpɩzɩɣ nɛ eyele ɛyʋ kɩbanʋ nɛ pɩcɛŋɛsɩɣ-ɩ tam.” (Keɣa 54:23) Tɔm tʋnɛ tɩkpazɩɣ ɛyʋ ɖoŋ siŋŋ! Ye mbʋ, ɛzɩma adɩma pɩzɩɣ nɛ asɩnɩ-ŋ? Ye ŋtɩmɩɣnɩ Ɛsɔ ɛzɩ pɩmʋnaʋ yɔ, ɛkaɣ-ŋ haʋ mbʋ pɩpɔzʋʋ-ŋ yɔ nɛ ŋlʋbɩnɩ ña-tɩlasɩ.—Kalɩ aɖakaɣ “Ɛbɛ adɩma pɩzɩɣ nɛ akɔnɩ-ŋ?”