Ɛbɛ pɩwɛɛ se ŋla nɛ ŋcaɣ wezuu ɛjaɖɛ kɩfaɖɛ taa?

Tɔm ñʋŋ weyi ɩɖɛwa yɔ ɩ-taa, ɖɩnawa se pɩkazɩ pazɩ Ɛsɔ kaɣ ɖɩzʋʋ ɛjaɖɛ kɩdɛkɛdɩyɛ ɖɩnɛ nɛ ɖɩ-yɔɔ tɩlasɩ tɩŋa payɩ. Pɩtʋʋ fɛyɩ se pɩkaɣ labʋ mbʋ. Ɛbɛ yɔɔ? Mbʋ pʋyɔɔ yɔ, Ɛsɔtɔm yaa Bibl labɩ tamaɣ se:

“Ɛjaɖɛ ɖiɣni ɖɛʋ.” —1 YOHANƐƐSƖ 2:17.

Ða-taa pɩzɩɣ nɛ pɩtɛ se nabɛyɛ kaɣ hiɣu ñʋʋ yabʋ, mbʋ pʋyɔɔ yɔ 1 Yohanɛɛsɩ 2:17 tasɩ yɔɔdʋʋ se:

“Weyi ɛlakɩ Ɛsɔ sɔɔlɩm yɔ, ɛwɛɣ tamtam.”

Ye mbʋ, ye ɖɩñɩnɩɣ se ɖihiɣ ñʋʋ yabʋ yɔ, pɩpɔzʋʋ se ɖɩla Ɛsɔ sɔɔlɩm. Pɩsa nɛ ɖɩtɩlɩ Ɛsɔ sɔɔlɩm lɛ, pɩwɛɛ se ɖɩcalɩnɩ kpɛlɩkʋʋ nɛ ɖɩtɩlɩ Ɛsɔ maɣmaɣ.

ÑAƔ PANA NƐ ‘ŊTƖLƖ ƐSƆ’ NƐ ŊHIƔ ÑƲƲ YABƲ ƐJAÐƐ TƐM WIYE

Collage: 1. Ðɔtɔkɔ taa fɛɖʋ nɔɔyʋ caɣ tataa, pɩkɩlɩ kpem. 2. Ewobi kɔfɩ ɖɩñɔyɛ lone naɖɩyɛ taa ɛna ɛ-taabalʋ nɔɔyʋ ɛlɛ ɖiɣni kalʋʋ takayaɣ nakɛyɛ nɛ taa leleŋ. 3. Ɛ-taabalʋ ɛnʋ ɛwɛɛ nɛ ɛkalɩɣ-ɩ Bibl mayaɣ nakɛyɛ nɛ ɛha-ɩ jw.org tɛ carte nakʋyʋ.

Yesu yɔɔdaa se: “Wezuu maatɛŋ kɛlɛ se pɛwɛɛ nɛ patɩlɩɣ-ŋ, ña Ɛsɔ toovenim tʋ kʋɖʋm koŋ.” (Yohanɛɛsɩ 17:3) Pʋcɔ nɛ ɖihiɣ ñʋʋ yabʋ ɛjaɖɛ tɛm wiye nɛ ɖɩcaɣ wezuu tam lɛ, pɩcɛyaa se ɖɩñaɣ pana nɛ ‘ɖɩtɩlɩ Ɛsɔ.’ Pʋ-tɔbʋʋ lɛ se ye ɖɩtɩlaa se Ɛsɔ wɛɛ yaa ɖɩtɩlɩ ɛ-yɔɔ tɔm natʋyʋ yɔ, pɩtɩmaɣ. Pɩwɛɛ se ɖɩpɩsɩ ɛ-taabalaa. Ye ɖɩsɔɔlaa se ɖa nɛ nɔɔyʋ ɖa-taabalɩyɛ ɛcɛyɩsɩ yɔ, pɩwɛɛ se ɖɩkpakɩɣ alɩwaatʋ nɛ ɖa nɛ ɩ ɖɩcakɩ. Mbʋ ɖɔɖɔ pɩwɛ ɖa nɛ Ɛsɔ ɖa-taabalɩyɛ hɔɔlʋʋ taa. Ye ɖɩmaɣzɩɣ Bibl taa toovenim tɔm ndʋ ɖɩkpɛlɩkɩɣ yɔ tɩ-yɔɔ yɔ, pɩsɩɣnɩ-ɖʋ nɛ taabalɩyɛ kɩbanɖɛ wɛɛ ɖa nɛ Ɛsɔ ɖɛ-hɛkʋ taa.

Toovenim tɔm ndʋ ɖɩkpɛlɩkɩɣ Bibl taa yɔ

Bibl wɩlɩɣ se Ɛsɔ kaaɖʋwa se ɖɩcaɣ wezuu Paradisuu taa.

Ɛlɩzɩ kajalaɣ ɛyaa, Aɖam nɛ Ɛva, nɛ ɛsɩɩ-wɛ lone kɩbanɖɛ naɖɩyɛ taa; nɖɩ payaɣ se Edɛɛnɩ kaɖaɣ. Paatalɩ pilim nɛ Ɛsɔ kaaha-wɛ mbʋ payɩ pɩɩpɔzaa yɔ se pɩsa nɛ pacaɣ wezuu koboyaɣ taa. Papɩzaɣ se pacaɣ wezuu tamtam. Ye paañaɣ pana nɛ pɛkɛ Ɛsɔ taabalaa mbʋ yɔ, pataasɩ kaaʋ. Ɛlɛ pa-maɣmaɣ paɖʋ pa-taa nɛ pamaanɩ paɣtʋ kɛlɛʋ ñɩndʋ ndʋ Ɛsɔ kaaɖʋ-wɛ yɔ tɩ-yɔɔ.

Bibl wɩlɩɣ-ɖʋ mbʋ pʋyɔɔ ɖɩwɛ kʋñɔmɩŋ taa lɛɛlɛɛyɔ yɔ.

Kajalaɣ ɛyʋ Aɖam tɩña Ɛsɔ lɛ, elesi waɖɛ nɖɩ ɛɛwɛna se ɛcaɣ wezuu tam yɔ, piyeba ɖɔɖɔ ɛyaa lalaa lesi waɖɛ nɖɩ. Bibl yɔɔdaa se: “Pɩtɩŋnɩ ɛyʋ kʋɖʋm yɔɔ nɛ kɩwɛɛkɩm lɩɩ ɛjaɖɛ yɔɔ nɛ sɩm ñatɩŋnɩ kɩwɛɛkɩm yɔɔ nɛ pɩlɩɩ.” (Roma mba 5:12) Ɛzɩ ɛyʋ nɔɔyʋ lʋlɩyaa ɖɛzʋʋ-ɩ kʋdɔŋ nakʋyʋ yɔ, Aɖam ɖɛzɩ e-piya tɩŋa mantɩtalɩ pilim wɛtʋ. Mbʋ labɩna nɛ ɖɩkpadɩyɩɣ nɛ ɖɩsɩkɩ.

Bibl wɩlɩɣ-ɖʋ mbʋ Ɛsɔ tɛm labʋ se ɛsɩnɩ-ɖʋ yɔ.

Bibl yɔɔdʋʋ se: “Ɛsɔ sɔɔlɩ ɛjaɖɛ pɩŋŋ nɛ ɛcɛlɩ ɛ-Pɩyalʋ ɛgbamɩyɛ, se pɩsa nɛ weyi ɛwɛɣnɩ tisuu ɛ-yɔɔ yɔ, pataaɖɩzɩ-ɩ ɛlɛ ehiɣ wezuu maatɛŋ.” (Yohanɛɛsɩ 3:16) Ɛsɔ tiyi Yesu tɛtʋ yɔɔ se ɛlaa e-wezuu ɖɔ-yɔɔ. Ɛndɩ abalʋ nɔɔyʋ wɛnɩ pɩnzɩ 86, ɛyɔɔdɩ sɔɔlɩm lakasɩ nzɩ sɩ-tɔm se: “Pɩwɩlɩɣ se Yehowaa sɔɔlɩ-m siŋŋ. Ɛsɔ sɔɔlɩm ha-m lidaʋ se manpɩzɩɣ nɛ mancaɣ wezuu tam.”

Bibl wɩlɩɣ-ɖʋ mbʋ ɖɩpɩzɩɣ ɖɩla nɛ ɖɩwɩlɩ ɛsɩmɩyɛ mbʋ Ɛsɔ labɩ-ɖʋ yɔ pɩ-yɔɔ yɔ.

Bibl yɔɔdʋʋ se ye ɖɩsɔɔlaa se ɖɩwɩlɩ ɛsɩmɩyɛ mbʋ Ɛsɔ labɩ-ɖʋ yɔ pɩ-yɔɔ yɔ, pɩwɛɛ se “ɖɩɖɔŋ ɛ-paɣtʋ yɔɔ.” (1 Yohanɛɛsɩ 2:3) Yehowa wɩlɩɣ-ɖʋ mbʋ ɖɩpɩzɩɣ ɖɩla nɛ ɖihiɣ koboyaɣ lɛɛlɛɛyɔ yɔ. Ɛlakɩ mbʋ nɛ sɔɔlɩm. (Izaayii 48:17, 18) Ɛsɔ tɩsɔɔlɩ se ɖɩtɔɔ kʋñɔŋ. Eheyiɣ-ɖʋ se ye ɖɩɖɔŋ ɛ-paɣtʋ yɔɔ yɔ, ɖihikiɣ koboyaɣ sɔnɔ sɔnɔ, nɛ ɖɩwɛɛnɩ lidaʋ ɖɔɖɔ se ɖɩkaɣ caɣʋ wezuu tam.

KALƖƔ BIBL PAA EVEMIYE NÐƖ

Fɛɖʋ ɛnʋ ɛcaɣ awayɩ nɛ ɛkalɩ Bibl wɩsɩ taa tɔɔnaɣ tɔɔʋ alɩwaatʋ taa nɛ pɩtɛ lɛ, ɛwɛɛ nɛ ɛcɔŋnɩ ɛsɔdaa. — Ye ŋtɩmɩɣnɩ Ɛsɔ nɛ ŋlakɩ ɛ-sɔɔlɩm yɔ, ŋpɩzɩɣ nɛ ŋhiɣ ñʋʋ yabʋ ɛjaɖɛ tɛm wiye

Ðɩtɔkɩ tɔɔnaɣ ɖoŋ ɖoŋ se pɩsɩnɩ-ɖʋ nɛ ɖɩcaɣ wezuu. Ɛlɛ Yesu yɔɔdaa se: “Pɩtɩkɛ kpɔnʋ ɖeke yekina se ɛyʋ ɛwɛɛ wezuu, ɛlɛ ɛwɛɣ wezuu tɔm ndʋ tɩ-tɩŋa tɩlɩɣnɩ Yehowa nɔɔ taa yɔ tɩ-yɔɔ.”—Maatiyee 4:4.

Sɔnɔ, Bibl taa Yehowa tɔm wɛɛ. Alɩwaatʋ ndʋ ɖɩkpɛlɩkɩɣ takayaɣ kiɖeɖeɣa ŋga yɔ, ɖɩkaɣ naʋ toovenim tɔm ndʋ kɩyɔɔdʋʋ mbʋ Yehowa laba nɛ pɩɖɛɛ, mbʋ eɖiɣni labʋ sɔnɔ nɛ mbʋ ɛkaɣ labʋ cee wayɩ yɔ.

TƖMNƖ ƐSƆ SE ƐSƖNƖ-Ŋ

Ye ŋsɔɔlaa se ŋɖɔ Ɛsɔ paɣtʋ yɔɔ, ɛlɛ pɩwɛ-ŋ kaɖɛ se ŋyele labʋ mbʋ Ɛsɔ tɔŋ se pɩfɛyɩ ɖeu yɔ yɔ, ɛbɛ ŋpɩzɩɣ nɛ ŋla? Ye pɩkɛ mbʋ nɛ ŋkpɛlɩkɩ nɛ ŋtɩlɩ Ɛsɔ camɩyɛ yɔ, pɩsɩɣnɩ-ŋ kpem.

Yele nɛ ɖɩyɔɔdɩ halʋ nɔɔyʋ tɔm, payaɣ-ɩ se Sakura. Ɛcakaɣ kʋzʋʋ kɩdɛkɛdʋʋ wezuu. Ɛpaɣzɩ Bibl kpɛlɩkʋʋ lɛ, ɛtɩlɩ Ɛsɔ paɣtʋ natʋyʋ; tɩtɔŋ se “Ise kʋzʋʋ kɩdɛkɛdʋʋ.” (1 Kɔrɛntɩ mba 6:18) Sakura tɩmnɩ Ɛsɔ se ɛha-ɩ ɖoŋ nɛ ɛpɩzɩ nɛ ɛwa lakasɩ kɩdɛkɛdɩsɩ nzɩ; nɛ mbʋ pɩlaba ɖɔɖɔ. Ɛlɛ, pɩɩwɛɛ se ewolo pɩ-yɔɔ ɛlʋbɩnɩ takɩm. Ɛyɔɔdaa se: “Kʋzʋʋ kɩdɛkɛdʋʋ lɩmaɣza kɔŋ ma-ñʋʋ taa lɛ, mantɩmɩɣ nɛ meheyi Yehowa toovenim; manawa se men-ɖeke maapɩzɩɣ malʋbɩnɩ lɩmaɣza ana nɛ mawabɩ-yɛ. Adɩma sɩnɩ-m nɛ mɔñɔtɩnɩ Yehowa nɛ pɩkɩlɩ.” Ɛzɩ Sakura yɔ, ɛyaa miiliyɔɔwaa sakɩyɛ ɖiɣni kpɛlɩkʋʋ nɛ patɩlɩɣ Ɛsɔ. Ɛwɛɛ nɛ ɛhaɣ-wɛ ɖoŋ weyi ɩpɩzɩɣ ɩsɩnɩ-wɛ nɛ pɛlɛɣzɩ pe-wezuu caɣʋ nɛ pɔ-tɔm kɛdɩnɩ-ɩ yɔ.—Filiipi mba 4:13.

Ŋwɛɣ nɛ ŋkpɛlɩkɩɣ nɛ ŋtɩlɩɣ Ɛsɔ nɛ pɩkɩlɩɣ lɛ, ‘Ɛsɔ tɩlɩɣ-ŋ’ nɛ pɩkɩlɩ ɖɔɖɔ. (Galaatii mba 4:9; Keɣa 24:14) Mbʋ kaɣnɩ yebu nɛ ŋmʋna se ŋcaɣ wezuu ɛjaɖɛ kɩfaɖɛ taa. Ɛlɛ, ɛzɩma ɛjaɖɛ kɩfaɖɛ nɖɩ ɖɩkaɣ wɛʋ? Tɔm ñʋʋ ŋgʋ kɩkɔŋ yɔ, kɩkaɣ cosuu tɔm ndʋ tɩ-yɔɔ

a Bibl wɩlɩɣ se Ɛsɔ hɩɖɛ lɛ Yehowa.