Ye ŋkɛ ɛyʋ kɩbanʋ piyeki se piɖeni-ŋ cee wayɩ?

Pɩlakɩ pɩnzɩ mɩnɩŋ sakɩyɛ yɔ, ɛyaa sakɩyɛ maɣzaɣ se ye ɛyʋ nɔɔyʋ ɛlakɩ kɩbandʋ yɔ, pɩkaɣ-ɩ ɖenuu e-wezuu caɣʋ taa. Kɩɖaʋ nakʋyʋ yɔ: Payaɣaɣ Wɩsɩ ɖɩlɩyɛ ɛjaɖɛ naɖɩyɛ taa wɩlɩyʋ lɔnsɩnɖʋ nɔɔyʋ se Confucius, (ɛcaɣ wezuu kpaɣnɩ pɩnaɣ 551 piwolo pɩnaɣ 479 P.P.Y.) nɛ ɛyaa ñaŋaɣ-ɩ siŋŋ. Ɛyɔɔdaa se: “Mbʋ ŋtɩsɔɔlɩ se palabɩ-ŋ yɔ, taalabɩ-pʋ lalaa.”a

ƐYAA SAKƖYƐ ÑAKƖ PANA SE PALA KƖBANDƲ NƐ PƖSA NƐ PEHIƔ KOBOYAƔ CEE WAYƖ

Halɩ nɛ sɔnɔ ɛyaa sakɩyɛ maɣzɩɣ se camɩyɛ lakasɩ yeki se piɖeni ɛyʋ cee wayɩ. Pañakɩ pana se pɛwɛɛnɩ ñamtʋ, pɛwɛɛnɩ wɛtʋ kɩbandʋ, patɩlɩ po-lone nɛ pɛwɛɛnɩ ɛhʋyɛ kɩbanɖɛ. Payaɣ Vɩyɛtɩnam ɛjaɖɛ taa halʋ nɔɔyʋ se Linh nɛ ɛyɔɔdaa se: Mamaɣzaɣ paa ɛzɩmtaa se ye mɔyɔɔdʋʋ toovenim nɛ mɛntɛŋ man-taa yɔ, pɩkaɣ-m ɖenuu me-wezuu caɣʋ taa.

Halʋ kʋɖʋm ɛnʋ ɛwɛɛ nɛ ɛɖʋʋ tɔɔnaɣ kʋñɔndɩnaa nɛ mba pɛfɛyɩnɩ ɖɩzʋyɛ yɔ.

Nabɛyɛ lɛ, tɔm ndʋ pawɩlɩɣ-wɛ pɛ-Ɛsɔ sɛtʋ agbaa taa yɔ, ndʋ seɣtiɣni-wɛ se pala kɩbandʋ. Payaɣ Tayɩwaanɩ ɛjaɖɛ taa abalʋ nɔɔyʋ se Hsu-Yun. Ɛyɔɔdaa se: Pawɩlɩ-m se mbʋ ɛyʋ lakɩ alɩwaatʋ ndʋ ɛwɛ wezuu yɔ, mbʋ kaɣnɩ wɩlʋʋ se ɛkaɣ hiɣu tam tam koboyaɣ yaa ɛkaɣ nɩʋ siziŋ ɛ-sɩm wayɩ.

ƐBƐ LƖƔ PƖ-TAA?

Evemiye tɛma lɛ pɩnɩ halʋ nɛ ɛtaa fɛyɩ leleŋ nɛ ɛnʋʋ ɛ-pɩyalʋ.

Pɩkɛ toovenim se alɩwaatʋ ndʋ ɖɩlakɩ lalaa kɩbandʋ yɔ, ɖihikiɣ wazasɩ sakɩyɛ. Ɛlɛ paa mbʋ yɔ, ɛyaa sakɩyɛ mba pañakɩ nɛ palakɩ lalaa kɩbandʋ yɔ, peɖiɣzinaa se pɩtɛkɛ paa ɛzɩmtaa piɖeɣni-wɛ ɛzɩ pɔsɔɔlʋʋ yɔ. Payaɣ Hong Kong ɛjaɖɛ taa halʋ nɔɔyʋ se Shiu Ping nɛ ɛyɔɔdaa se: “Ma-maɣmaɣ menɖiɣzinaa se ɛyaa mba palakɩ kɩbandʋ yɔ, paahikiɣ pi-lone taa wazasɩ paa ɛzɩmtaa. Malabɩ mbʋ payɩ manpɩzɩɣ yɔ se mɔncɔnɩ mɔ-hɔʋ yɔɔ nɛ mala kɩbandʋ. Ɛlɛ me-nesi ɖɔkʋʋ kɔm nɛ pɩwɛɛkɩ nɛ ma-walʋ se nɛ eyele ma nɛ man-pɩyalʋ.”

Ɛyaa sakɩyɛ ɖiɣzinaa se mba powoki Ɛsɔ sɛtʋ agbaa taa yɔ pɩtɩkɛ patɩŋa pɛkɛnɩ ɛyaa kɩbama. Payaɣ halʋ nɔɔyʋ Japɔŋ ɛjaɖɛ taa se Etsuko nɛ ɛyɔɔdaa se: “Mansʋ cooci nakʋyʋ taa, nɛ manpɩsɩ kɩ-taa piya evelisi tʋma ñʋʋdʋ. Pɩɩcɛyɩ-m kpem se cooci ŋgʋ kɩ-taa ñɩma nabɛyɛ taacakɩ wezuu kɩbaŋʋ, palʋkaɣ wala yɔɔ nɛ pataalakɩnɩ cooci liidiye tʋmɩyɛ camɩyɛ.”

“Malabɩ mbʋ payɩ manpɩzɩɣ yɔ se mɔncɔnɩ mɔ-hɔʋ yɔɔ nɛ mala kɩbandʋ. Ɛlɛ me-nesi ɖɔkʋʋ kɔm nɛ pɩwɛɛkɩ nɛ ma-walʋ se nɛ eyele ma nɛ man-pɩyalʋ.”—SHIU PING, HONG KONG

Mba paasɔɔlɩ cooci tɔm nɛ pañakɩ pana se pala kɩbandʋ yɔ, pitibi po-toma taa alɩwaatʋ ndʋ panawa se paahikiɣ kɩhɛyʋʋ kɩbandʋ ndʋ palakɩ yɔ ti-lone taa yɔ. Payaɣ halʋ nɔɔyʋ Vɩyɛtɩnam ɛjaɖɛ taa se Van nɛ ɛyɔɔdaa se: “Paa ɖooye mayakaɣ tɩŋ pee, hɛtʋ nɛ tɔɔnaɣ nɛ mansɩɣ mɔn-cɔzɔnaa mba pasɩba yɔ pa-altaarunaa yɔɔ, mamaɣzaɣ se pɩkaɣ yebu nɛ mehiɣ wazasɩ nɛ ɛsɩndaa. Paa maawobi pɩ-yɔɔ nɛ malakɩ kɩbandʋ nɛ mɔnɖɔŋ cooci sɔnzɩ yɔɔ pɩnzɩ sakɩyɛ yɔ, ma-walʋ kaahɩnɩ kʋdɔŋ sɔsɔʋ nakʋyʋ siŋŋ. Pʋwayɩ lɛ mɛn-pɛlɛ weyi ɛwɛ ɛjaɖɛ lɛɛɖɛ taa nɛ ɛlakɩ sukuli yɔ ɛkɔɔ nɛ ɛsɩ; ɛɛkɛ pɩɣa peleɣa yem.”

YE ŊKƐ ƐYƲ KƖBANƲ ƐBƐ YƆƆ PI-ÐEKE TƖMAƔ?

Pɩcɛyaa se ɖɩkɛ ɛyaa kɩbama, ɛlɛ pi-ɖeke piiyeki se piɖeni-ɖʋ cee wayɩ. Ɛbɛ yɔɔ? Iyele nɛ ɖɩna tɔm ndʋ Takayaɣ kiɖeɖeɣa yɔɔdʋʋ yɔ.

PƖTƖKƐ ƐYAA TƖŊA LƖZƖƔNA SE PALAKƖ KƖBANDƲ.

“Ɛlɛ ɛyʋ kʋyʋm weyi ɛwɛɛkaa yɔ elesiɣ ñɩm sakɩyɛ.”—EKLESƖYASTƖ 9:18.

Paa ŋñakɩ pana siŋŋ se ŋkɛ ɛyʋ kɩbanʋ yɔ, piɖeni men-ɖeke lakasɩ nzɩ ɛyaa lalaa wɛna yɔ, sɩpɩzɩɣ siyele nɛ piiɖeɣni-ŋ. Kɩɖaʋ nakʋyʋ yɔ: Kʋdɔŋ kɩɖɛɖɛʋ nakʋyʋ alɩwaatʋ taa, ŋpɩzɩɣ nɛ ŋɖɔŋ lɔŋ weyi komina ñʋndɩnaa ɖʋwa se ɖɩtaakɩlɩ ɖama ñɔtɩnʋʋ yɔ ɩ-yɔɔ. Ye nɔɔyʋ ekizaa se ɛɛɖɔŋ lɔŋ ɛnɩ ɩ-yɔɔ, ɛbɛ pɩkaɣ tɛmnʋʋ? Ɛ-ɖɔnɛ pɩzɩɣ piyele nɛ kʋdɔŋ kpa mba pɛwɛɛ nɛ pañakɩ pana se pɔɖɔ lɔŋ ɛnɩ ɩ-yɔɔ yɔ.

PƖPƖZƖƔ NƐ PICOÐI ƐYAA NƐ PAATƖLƖƔ MBƲ PƖKƐ KƖBAM YAA KƖDƐKƐDƖM YƆ.

“Nʋmɔʋ nakʋyʋ cakɩ ɛyʋ ɛzɩ kɩbaŋʋ yɔ, wayɩ wayɩ lɛ kiwokini sɩm taa.”—ADUWA 14:12.

Ɛyaa sakɩyɛ labɩ mbʋ pamaɣzaɣ se pɩtʋʋzaa yɔ, ɛlɛ pʋwayɩ pɔkɔɔ nɛ peɖiɣzina se mbʋ palaba yɔ pɩtɩtʋʋzɩ. Paa pamaɣzaɣ se mbʋ paawɛɛ nɛ palakɩ yɔ pɩtʋʋzaa yɔ, lɩmaɣza kɩdɛkɛda wena pakpaɣaa yɔ ayeba nɛ pɛwɛɛ nɛ panɩɣ siziŋ.

NƆƆYƲ ƐƐSƖŊ MBƲ PƖKAƔ LABƲ NƐ ƐSƖNDAA YƆ.

“Ɩɩsɩŋ ɛzɩma mi-wezuu kaɣ wɛʋ cee yɔ.”—YAKUBU 4:14.

Paa ɛyʋ kaalakaɣ kɩbandʋ ɛzɩma yɔ, sɩm pɩzɩɣ nɛ pɩkpaɣ-ɩ yem tuda. Kɩɖaʋ nakʋyʋ yɔ: COVID-19 kʋdɔŋ alɩwaatʋ taa, ɛyaa sakɩyɛ lesi pe-weziŋ mbʋ pʋyɔɔ yɔ paawɛɛ nɛ pasɩɣnɩ lalaa. Payaɣ halʋ nɔɔyʋ Siini ɛjaɖɛ taa se Liting; ɛ-caa sɩbɩ kɛgbɛdɩsaɣ nakɛyɛ taa. Ɛyɔɔdaa se: “Mantaatɩlɩ mbʋ pʋyɔɔ ɛyʋ kɩbanʋ ɛzɩ ɛnʋ mbʋ yɔ pɩzɩɣ nɛ elesi e-wezuu yɔ. Man-caa lakaɣ tʋmɩyɛ nɛ kpekpeka, ɛɛwɛnɩ tɩ luzuu siŋŋ nɛ ɛɛwɛ toovenim ɖɔɖɔ. Ɛyaa mba paawɛ lɔɔɖɩyɛ taa yɔ, pa-taa lɛ e-ɖeke koŋ ɛsɩbɩna.”

Ye ɛyʋ kɩbanʋ kɛʋ ɖeke eeyeki se piɖeni-ɖʋ cee wayɩ, ɛbɛ kaɣ yebu nɛ piɖeni-ɖʋ yɔ? Pɩsa nɛ ɖihiɣ tɔm ndʋ tɩ-yɔɔ cosuu lɛ, pɩpɔzʋʋ se weyi papɩzɩɣ nɛ pataa-ɩ liu yɔ ɛsɩnɩ-ɖʋ. Weyi ɛpɩzɩɣ nɛ ecosi tɔm ndʋ ɖɩpɔzʋʋ ɖa-tɩ yɔ tɩ-yɔɔ nɛ ɛwɩlɩ-ɖʋ nʋmɔʋ ŋgʋ kɩ-taa pɩwɛɛ se ɖɩɖɔ nɛ piɖeni-ɖʋ cee wayɩ yɔ. Apɩzɩɣ nɛ ɛsɩnɩ-ɖʋ?

a Ye ŋsɔɔlaa se ŋtɩlɩ Confucius wɩlɩtʋ nɛ pɩkpaɖɩ yɔ, kalɩ takayaɣ ŋga payaɣ se L’humanité à la recherche de Dieu tɛ ñʋʋ 7, tayʋʋ 31-35. Yehowa Aseɣɖe Tɩnaa lɩzɩnɩ-kɛ nɛ kɛwɛ www.jw.org yɔɔ.